ബെം​ഗളൂരു: ഐപിഎൽ ഉദ്ഘാടന മത്സരത്തിൽ ചെന്നൈയോട് പരാജയപ്പെട്ടിരിക്കുകയാണ് റോയൽ ചലഞ്ചേഴ്സ്. ഭേദപ്പെട്ട സ്കോർ ഉയർത്തിയിട്ടും ബൗളിം​ഗിൽ ബെം​ഗളൂരു നിര തീർത്തും പരാജയമായി. മത്സരത്തിലുടനീളം എതിർ ടീമിനെ പ്രതിരോധത്തിലാക്കാൻ കഴിയാതിരുന്നതാണ് തോൽവിക്ക് കാരണമെന്ന് ബെം​ഗളൂരു വിക്കറ്റ് കീപ്പർ ബാറ്റർ ദിനേശ് കാർത്തിക്ക് പറഞ്ഞു.

റോയൽ ചലഞ്ചേഴ്സിന് വലിയൊരു ബാറ്റിം​ഗ് ലൈനപ്പുണ്ട്. ആക്രമിച്ച് കളിക്കാനാണ് ബെം​ഗളൂരു താരങ്ങൾക്ക് ഇഷ്ടം. അത് എതിർ ടീമിനെ എപ്പോഴും സമ്മർദ്ദത്തിലാക്കാനാണ്. എല്ലാ താരങ്ങളും എതിരാളികളെ സമ്മർദ്ദത്തിലാക്കാൻ ശ്രമിക്കണം. അനുജ് റാവത്തും താനും അതാണ് ചെയ്യാൻ ശ്രമിച്ചതെന്നും കാർത്തിക്ക് പറഞ്ഞു.

മത്സരത്തിൽ ഒരു ഘട്ടത്തിൽ ബെം​ഗളൂരു അഞ്ചിന് 78 എന്ന നിലയിൽ തകർന്നിരുന്നു. പിന്നാലെ ദിനേശ് കാർത്തിക്കിന്റെയും അനുജ് റാവത്തിന്റെയും ബാറ്റിം​ഗാണ് ബെം​ഗളൂരുവിനെ ഭേദപ്പെട്ട സ്കോറിലെത്തിച്ചത്. ഇരുവരും ആറാം വിക്കറ്റിൽ 95 റൺസ് കൂട്ടിച്ചേർത്തു.