ആലപ്പുഴ: സ്വർണക്കടയിൽ കയറി പകൽ കടയിൽ ഉണ്ടായിരുന്ന ആളുടെ കണ്ണ് വെട്ടിച്ച് മോഷണം നടത്തിയ യുവാവ് പിടിയിൽ. കഞ്ഞിക്കുഴി പഞ്ചായത്ത് വിഷ്ണുഭവനം വീട്ടിൽ കണ്ണനെയാണ് (കൊമ്പൻ കണ്ണൻ- 33) നോർത്ത് പൊലീസ് അറസ്റ്റ് ചെയ്തത്. കളത്തിവീട് ചന്തയ്ക്ക് സമീപമുള്ള വീട്ടിൽ നിന്നാണ് ഇയാളെ പൊലീസ് പിടികൂടിയത്.

വെള്ളിയാഴ്ച വൈകീട്ട് അഞ്ചിന് മുല്ലയ്ക്കൽ ആർഎൻഎ ജ്വല്ലറിയിലാണ് മോഷണം നടന്നത്. ഈ സമയം കടയുടമയുടെ മകൾ മാത്രമാണ് കടയിലുണ്ടായിരുന്നത്. പെൺകുട്ടിയുടെ ശ്രദ്ധതെറ്റിച്ച് ഇയാൾ മോഷണം നടത്തുന്നത് സിസിടിവി ദൃശ്യത്തിൽ വ്യക്തമാണ്. ഈ ദൃശ്യം ഉപയോഗിച്ചാണ് പൊലീസ് പ്രതിയെ തിരിച്ചറിഞ്ഞത്.

പെൺകുട്ടിയുടെ ശ്രദ്ധതെറ്റിക്കുന്നതിന് ഒരു കടലാസ് കഷ്ണം പ്രതി താഴെയിടുകയും അതെടുക്കാൻ പെൺകുട്ടി കുനിഞ്ഞപ്പോൾ സ്വർണാഭരണം മോഷ്ടിക്കുകയുമായിരുന്നു. തുടർന്ന് ഇയാൾ ബൈക്കിൽ കയറി പോയി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.