Top

‘എന്റെ സപ്പോര്‍ട്ട് പ്രതീക്ഷിച്ച് വരരുതെന്ന് ചാണ്ടി ഉമ്മനോട് പറഞ്ഞിട്ടുണ്ട്’; ഉമ്മന്‍ ചാണ്ടി

മകന്‍ ചാണ്ടി ഉമ്മന് രാഷ്ട്രീയത്തില്‍ തന്റെ ഭാഗത്ത് നിന്ന് യാതൊരു പിന്തുണയോ തടസമോ ഉണ്ടാകില്ലെന്ന് ഉമ്മന്‍ ചാണ്ടി. റിപ്പോര്‍ട്ടര്‍ ടിവി ക്ലോസ് എന്‍കൗണ്ടറിലാണ് മുന്‍ മുഖ്യമന്ത്രിയുടെ പ്രതികരണം. ‘മകന്‍ ചാണ്ടി ഉമ്മന്‍ അടുത്ത നിയമസഭാ തെരഞ്ഞെടുപ്പില്‍ മത്സരിക്കുന്നുണ്ടോ?’ എന്ന ചോദ്യത്തിന് മുതിര്‍ന്ന കോണ്‍ഗ്രസ് നേതാവിന്റെ മറുപടി ഇങ്ങനെ. ചാണ്ടി വളരെ സജീവമായിട്ട് രാഷ്ട്രീയരംഗത്തൊക്കെയുണ്ട്. കെ എസ് യുവിലുണ്ടായിരുന്നു. യൂത്ത് കോണ്‍ഗ്രസിലുണ്ട്. പക്ഷെ, രാഷ്ട്രീയത്തില്‍ വരുന്ന സമയത്ത് തന്നെ ചാണ്ടിയോട് പറഞ്ഞിട്ടുണ്ട്. ‘എന്തു വേണമെങ്കിലും ആകാം. നിങ്ങള്‍ക്ക് ഏത് […]

19 Jan 2021 1:31 AM GMT

‘എന്റെ സപ്പോര്‍ട്ട് പ്രതീക്ഷിച്ച് വരരുതെന്ന് ചാണ്ടി ഉമ്മനോട് പറഞ്ഞിട്ടുണ്ട്’; ഉമ്മന്‍ ചാണ്ടി
X

മകന്‍ ചാണ്ടി ഉമ്മന് രാഷ്ട്രീയത്തില്‍ തന്റെ ഭാഗത്ത് നിന്ന് യാതൊരു പിന്തുണയോ തടസമോ ഉണ്ടാകില്ലെന്ന് ഉമ്മന്‍ ചാണ്ടി. റിപ്പോര്‍ട്ടര്‍ ടിവി ക്ലോസ് എന്‍കൗണ്ടറിലാണ് മുന്‍ മുഖ്യമന്ത്രിയുടെ പ്രതികരണം. ‘മകന്‍ ചാണ്ടി ഉമ്മന്‍ അടുത്ത നിയമസഭാ തെരഞ്ഞെടുപ്പില്‍ മത്സരിക്കുന്നുണ്ടോ?’ എന്ന ചോദ്യത്തിന് മുതിര്‍ന്ന കോണ്‍ഗ്രസ് നേതാവിന്റെ മറുപടി ഇങ്ങനെ.

ചാണ്ടി വളരെ സജീവമായിട്ട് രാഷ്ട്രീയരംഗത്തൊക്കെയുണ്ട്. കെ എസ് യുവിലുണ്ടായിരുന്നു. യൂത്ത് കോണ്‍ഗ്രസിലുണ്ട്. പക്ഷെ, രാഷ്ട്രീയത്തില്‍ വരുന്ന സമയത്ത് തന്നെ ചാണ്ടിയോട് പറഞ്ഞിട്ടുണ്ട്. ‘എന്തു വേണമെങ്കിലും ആകാം. നിങ്ങള്‍ക്ക് ഏത് പ്രവര്‍ത്തനം വേണമെങ്കിലും ആകാം. ഞാന്‍ തടസം നില്‍ക്കില്ല. പക്ഷെ, എന്റെ ഒരു സപ്പോര്‍ട്ട് കിട്ടും എന്ന് ധരിച്ച് വരരുത്’ എന്നാണ് ചാണ്ടിയോട് പറഞ്ഞത്. അച്ചു പഠിക്കുന്ന സമയത്ത്, അച്ചുവിനും ചില താല്‍പര്യങ്ങളൊക്കെയുണ്ടായിരുന്നു. അച്ചുവിനോടും ഞാന്‍ പറഞ്ഞിട്ടുണ്ട്.

പുതുപ്പള്ളിയില്‍ ചാണ്ടി ഉമ്മന്‍ മത്സരിക്കുമെന്ന് അഭ്യൂഹങ്ങളുണ്ടല്ലോയെന്ന് ചോദ്യത്തിനോട് പ്രതികരിച്ചത് ഇങ്ങനെ.

അതിപ്പോള്‍ ഒത്തിരി മണ്ഡലങ്ങളില്‍ ഇങ്ങനെ പേര് വരുന്നുണ്ട്. ഓരോ വാര്‍ത്തകള്‍.

ഒരിക്കല്‍ കൂടി മുഖ്യമന്ത്രിയാകണമെന്ന് കോണ്‍ഗ്രസ് ഹൈക്കമാന്‍ഡ് ആവശ്യപ്പെട്ടാല്‍ തനിക്ക് പറയാനുള്ളത് പറയും. എന്നെ സംബന്ധിച്ചിടത്തോളം, ധാരാളം അവസരം കിട്ടിയിട്ടുള്ള ആളാണ് ഞാന്‍. പൂര്‍ണ സംതൃപ്തനാണ്. പിന്നെ, ഹൈക്കമാന്‍ഡിനെ ധിക്കരിക്കാന്‍ കഴിവുള്ള ആളൊന്നുമല്ല ഞാന്‍. പക്ഷെ, അന്നേരവും എനിക്ക് എന്റേതായ അഭിപ്രായം പറയാനുള്ള സ്വാതന്ത്ര്യം അവിടേയുമുണ്ട്.

വീണ്ടും മുഖ്യമന്ത്രിയാകാന്‍ ആഗ്രഹിക്കുന്നോ എന്ന ചോദ്യത്തിന് യുഡിഎഫ് അധികാരത്തില്‍ വരിക എന്ന ഒറ്റ ലക്ഷ്യം മാത്രമാണുള്ളതെന്ന് ഉമ്മന്‍ ചാണ്ടി പറഞ്ഞു. ഞാന്‍ രണ്ട് വര്‍ഷം മുഖ്യമന്ത്രിയായ ആളാണ്. എനിക്ക് 50 വര്‍ഷം എംഎല്‍എ ആകാന്‍ പാര്‍ട്ടി അവസരം തന്നിട്ടുള്ളതാണ്. ഈ അവസരത്തില്‍ ഒരു പരിപാടിയും പദ്ധതിയോടെയല്ല. ഒരു കാര്യം ഞാന്‍ പറയാം, കേരളത്തില്‍ നേതൃപ്രശ്നം സംബന്ധിച്ച് ഒരു തര്‍ക്കവും ഉണ്ടാകാന്‍ പോകുന്നില്ല. കഴിഞ്ഞ കാലങ്ങളിലെല്ലാം സ്മൂത്തായാണ് പോയിരിക്കുന്നത്. ഇപ്രാവശ്യവും അങ്ങനെയാകും. ഞങ്ങള്‍ക്ക് ഒറ്റ ലക്ഷ്യമേയുള്ളൂ ‘യുഡിഎഫ് അധികാരത്തില്‍ വരിക’. ഒറ്റക്കെട്ടായി മുന്നോട്ട് പോകും. അഞ്ച് വര്‍ഷമായി പദവിയില്ലെങ്കിലും ഞാന്‍ എല്ലാത്തിനുമുണ്ട്. ജയിക്കാന്‍ എന്ത് വിട്ടുവീഴ്ച്ചയ്ക്കും ഏത് പാര്‍ട്ടിയും നേതാവും തയ്യാറാണ്. രമേശനും മുല്ലപ്പള്ളിയുമായി മിക്കവാറും ദിവസങ്ങളില്‍ ഫോണിലൂടെയെങ്കിലും ബന്ധപ്പെടുന്നുണ്ട്.

ഘടകകക്ഷികള്‍ പ്രതിപക്ഷ നേതാവിനേക്കുറിച്ച് തൃപ്തിക്കുറവ് ഉള്ളതായി അറിയിച്ചിട്ടില്ല. എ കെ ആന്റണി പ്രതിപക്ഷ നേതാവായിരുന്നപ്പോഴും ഞാന്‍ ആയിരുന്നപ്പോഴും പ്രവര്‍ത്തനം പോരാ എന്ന വിമര്‍ശനമുണ്ടായിരുന്നു. അത് രമേശിനോട് മാത്രമുള്ള ചോദ്യമല്ല. ഞങ്ങളോട് മുന്‍പ് ചോദിച്ചിട്ടുള്ളതാണ്. രമേശ് ചെന്നിത്തല ആരോപണങ്ങളും വിമര്‍ശനങ്ങളും ഉന്നയിക്കുമ്പോള്‍ പരിഹസിക്കുകയാണ് ഭരണപക്ഷം ചെയ്തത്. പിന്നീടതെല്ലാം സത്യമായി.

പരസ്പരം സഹകരിക്കുന്നതാണ് എന്റേയും രമേശിന്റേയും രീതി. കേരളത്തിലെ കോണ്‍ഗ്രസ് വലിയ പ്രസ്ഥാനമാണ്. ഒരാളുടെ കൈയ്യില്‍ ഒതുങ്ങുന്നതല്ല. ഒരു നേതാവ് മാത്രമല്ല. എല്ലാവരും കൂടി കൂടുമ്പോഴാണ് സംഘടനയാകുന്നത്. അമിതമായ സ്വാതന്ത്ര്യം നേതാക്കന്‍മാര്‍ക്കും അണികള്‍ക്കും ഈ പാര്‍ട്ടിയില്‍ എടുക്കാന്‍ സാധിക്കും. ആ അമിത സ്വാതന്ത്ര്യം വഴിവിട്ടുപോകാതിരിക്കാനാണ് ഞങ്ങള്‍ ശ്രമിക്കുന്നത്.

പ്രത്യേക കരാറോ ധാരണയോ കോണ്‍ഗ്രസിന് ആവശ്യമില്ല. അതൊന്നും ഇല്ലാതെ തന്നെ കോണ്‍ഗ്രസ് മുന്നോട്ടുപോകും ജയിക്കുകയും ചെയ്യും. വരുന്ന നിയമസഭാ തെരഞ്ഞെടുപ്പില്‍ മത്സരിക്കുമോയെന്ന് തീരുമേനിക്കേണ്ടത് പാര്‍ട്ടിയാണ്. എന്റെ പൊതുജീവിതത്തില്‍ ഇന്ത്യന്‍ നാഷണല്‍ കോണ്‍ഗ്രസ് നല്‍കിയ പിന്തുണയും അംഗീകാരവും ഏറ്റവും വലുതായി തന്നെ ഞാന്‍ കാണുന്നു. ഇനിയെന്താണ് എന്നുള്ളത് പാര്‍ട്ടിയാണ് തീരുമാനിക്കുന്നത്. പാര്‍ട്ടിയുടെ തീരുമാനം പറയുമ്പോള്‍ എനിക്ക് എന്റേതായ കാഴ്ച്ചപ്പാടുകള്‍ പറയാനും സാധിക്കും.

യുവാക്കള്‍ക്ക് അര്‍ഹമായ പ്രാതിനിധ്യം കൊടുക്കും. കഴിവുള്ള ഉത്തരവാദിത്വം ഏല്‍പിക്കാവുന്ന ചെറുപ്പക്കാര്‍ കോണ്‍ഗ്രസിലും യൂത്ത് കോണ്‍ഗ്രസിലും ഘടകകക്ഷികളിലും ധാരാളമുണ്ട്. അങ്ങനെയുള്ളവര്‍ക്ക് പരമാവധി പിന്തുണ നല്‍കുമെന്നതിന് യാതൊരു സംശയവും വേണ്ട. തിരുവനന്തപുരത്ത് ആര്യ രാജേന്ദ്രനെ മേയറാക്കിയത് നല്ല തീരുമാനമാണെന്നേ ഞാന്‍ പറയൂ. ഇത് കോണ്‍ഗ്രസ് ചെയ്തത് ആരും കണ്ടില്ലേ? 26ാം വയസിലാണ് സുരേഷ് കൊടിക്കുന്നില്‍ എന്ന ദളിത് വിഭാഗത്തില്‍ പെട്ടയാളെ ഇന്ത്യന്‍ പാര്‍ലമെന്റില്‍ എത്തിച്ചത്. വന്‍ ഭൂരിപക്ഷത്തോടെയാണ് രമ്യ ഹരിദാസ് ജയിച്ചത്. പി സി വിഷ്ണുനാഥ് 26-ാമത്തെ വയസിലാണ് എംഎല്‍എ ആയത്.

1970ല്‍ എ കെ ആന്റണി മുഖദാസ്, എന്‍ രാമകൃഷ്ണന്‍, കൊട്ടറ ഗോപാലകൃഷ്ണന്‍, എ കെ ആന്റണി എന്നിവരുള്‍പ്പെടെ ഞങ്ങള്‍ ഞ്ചു പേരുള്ള ടീമാണ് നിയമസഭയിലെത്തിയത്. അത് ആദ്യമായിട്ടായിരുന്നു. യുവാക്കള്‍ക്ക് കൂടുതല്‍ അവസരം കൊടുക്കുന്നത് നല്ലതാണ്. യുവാക്കള്‍ നല്ല രീതിയില്‍ പ്രവര്‍ത്തിക്കുമെന്നാണ് എനിക്ക് എന്റെ അനുഭവത്തില്‍ നിന്ന് മനസിലായിട്ടുള്ളത്. ചെറുപ്പക്കാര്‍ക്ക് അംഗീകാരം നല്‍കുന്ന സാഹചര്യമുണ്ടാകും.

തദ്ദേശ തെരഞ്ഞെടുപ്പില്‍ തിരിച്ചടിയുണ്ടായെന്ന് കരുതുന്നില്ല. പക്ഷെ, പ്രതീക്ഷ വെച്ചിരുന്നു. പ്രതിപക്ഷ നേതാവ് നല്ല നിലയില്‍ കൈകാര്യം ചെയ്തിരുന്നു. തദ്ദേശ തെരഞ്ഞെടുപ്പില്‍ എല്ലാക്കാലത്തും യുഡിഎഫ് പിന്നിലായിരിക്കും. ത്രിതല പഞ്ചായത്ത് ഫലം യുഡിഎഫിന് കുറവുകള്‍ മനസിലാക്കാനുള്ള അവസരമായെന്നും ഉമ്മന്‍ ചാണ്ടി കൂട്ടിച്ചേര്‍ത്തു.

Next Story