കുരങ്ങു പനി: ക്വാറന്‍റീൻ മാനദണ്ഡങ്ങൾ പ്രഖ്യാപിച്ച് യു എ ഇ

അബുദാബി: യു എ ഇയിൽ മൂന്ന്​ കുരങ്ങു പനി കൂടി റിപ്പോർട്ട്​ ചെയ്തു. ഇതിൻ്റെ അടിസ്ഥാനത്തിൽ യു എ ഇ ആരോ​ഗ്യമന്ത്രാലയം സുരക്ഷാ-പ്രതിരോധ മാനദണ്ഡങ്ങൾ പുറത്തിറക്കി. രോഗം ബാധിച്ചവർ പൂർണമായും ഭേദപ്പെടുന്നത്​ വരെ ആശുപത്രിയിൽ കഴിയണം. രോ​ഗിയുമായി അടുത്ത സമ്പർക്കം പുലർത്തിയവർ 21 ദിവസം ക്വാറന്‍റീനിൽ കഴിയണമെന്ന് മന്ത്രാലയം പുറത്തിറക്കിയ പ്രസ്താവനയിൽ പറയുന്നു.

രോ​ഗബാധിതർ വീട്ടിൽ ക്വാറൻ്റീനിൽ കഴിയണം. രോ​ഗിയുമായി അടുത്ത സമ്പർക്കം പുലർത്തുന്നവർ ഹോം ഐസൊലേഷൻ പാലിക്കുന്നുണ്ടെന്ന് ആരോഗ്യ വകുപ്പ്​ അധികൃതർ ഉറപ്പുവരുത്തണം. രോ​ഗം ബാധിച്ചവരുടെയും സമ്പർക്ക പട്ടികയിൽ ഉൾപ്പെട്ടവരുടെയും ആരോഗ്യനില അധികൃതർ നിരീക്ഷിക്കുകയും ചെയ്യണം. രോ​ഗം സംബന്ധിച്ച വിവരങ്ങൾ അറിയാൻ ഔദ്യോഗിക സംവിധാനങ്ങളെ ഉപയോഗപ്പെടുത്തണമെന്നും ഭീതിയും അഭ്യൂഹങ്ങളും പ്രചരിപ്പിക്കരുതെന്നും അധികൃതർ ആവശ്യപ്പെട്ടു.

മേയ്​ 24നാണ്​ യു എ ഇയിൽ ആദ്യമായി കുരങ്ങു പനി സ്ഥിരീകരിച്ചത്​. ആഫ്രിക്കയിൽ നിന്നെത്തിയ 29കാരിയിലാണ് രോഗം കണ്ടെത്തിയത്. യുഎസിലും വിവിധ യൂറോപ്യൻ രാജ്യങ്ങളിലും രോഗം റിപ്പോർട്ട്​ ചെയ്യപ്പെട്ട സാഹചര്യത്തിൽ രാജ്യത്ത്​ നിരീക്ഷണം ശക്​തമാക്കിയിരുന്നു. നിലവിൽ നാല്​ കേസുകളാണ്​ ആകെ സ്ഥിരീകരിച്ചിട്ടുള്ളത്​.

പനി, ശരീരവേദന, വിറയൽ, ക്ഷീണം എന്നിവയാണ്​ കുരങ്ങു പനിയുടെ ലക്ഷണങ്ങളായി അനുഭവപ്പെടുന്നത്​. രോഗം ഗുരുതരമായാൽ മുഖത്തും കൈകളിലും ചുണങ്ങുകളും മുറിവുകളും ഉണ്ടാകാം. മുറിവുകൾ ശരീരത്തിന്‍റെ മറ്റ് ഭാഗങ്ങളിലേക്കും വ്യാപിക്കും. കൂട്ടികളിൽ രോ​ഗം കൂടുതൽ ​ഗുരുതരമാകാറുണ്ടെന്നും പഠനങ്ങൾ പറയുന്നു.

STORY HIGHLIGHTS: UAE announce quarantine norm Against monkey pox