‘ഹിന്ദു ദൈവങ്ങളെ അപമാനിച്ചു’; മാപ്പ് പറഞ്ഞ് താണ്ഡവിന്റെ അണിയറ പ്രവര്‍ത്തകര്‍

ഹിന്ദു ദൈവങ്ങളെ അപമാനിച്ചു എന്ന ആരോപണത്തില്‍ മാപ്പ് പറഞ്ഞ് ആമസോണ്‍ പ്രൈമിലെ താണ്ഡവ് സീരീസിന്റെ അണിയറ പ്രവര്‍ത്തകരും അഭിനേതാക്കളും. സീരീസിന്റെ സംവിധായകന്‍ അലി അബ്ബാസ് സഫറാണ് തന്റെ ട്വിറ്ററിലൂടെ ക്ഷമ പറഞ്ഞുള്ള കുറിപ്പ് പങ്കുവെച്ചത്. സീരീസുമായി ബന്ധപ്പെട്ട് ഉണ്ടായ വിവാദങ്ങളും കേസുമാണ് മാപ്പ് പറയാന്‍ കാരണം. താണ്ഡവ് എന്നുള്ളത് സാങ്കല്‍പ്പികമായ ഒരു കലാ സൃഷ്ടി മാത്രമാണ്. സീരീസിന്റെ അണിയറ പ്രവര്‍ത്തകരോ അഭിനേതാക്കളോ മനപൂര്‍വ്വം ഒരു മതത്തേയോ, വിശ്വാസങ്ങളെയോ അപമാനിക്കാന്‍ ശ്രമിച്ചിട്ടില്ലെന്നാണ് ട്വീറ്റില്‍ പറയുന്നത്.

വാര്‍ത്ത പ്രക്ഷേപണ മന്ത്രാലയവുമായുള്ള ചര്‍ച്ചക്ക് മുന്നേ സീരീസില്‍ പ്രേക്ഷകര്‍ ചൂണ്ടിക്കാണിക്കുന്ന പ്രശ്‌നങ്ങള്‍ സൂക്ഷ്മമായി പരിശോധിച്ചിരുന്നു. സീരീസുമായി ബന്ധപ്പെട്ട് നിരവധി പ്രേക്ഷകര്‍ക്ക് പ്രശ്‌നങ്ങളുണ്ടായി, നിരവധി പരാതികള്‍ സീരീസിന്റെ പേരില്‍ ലഭിച്ചു എന്ന് വാര്‍ത്ത പ്രക്ഷേപണ മന്ത്രാലയം അണിയറ പ്രവര്‍ത്തകരെ അറിയിച്ചിരുന്നു എന്നും സംവിധായകന്‍ പങ്കുവെച്ച കുറിപ്പില്‍ പറയുന്നു.

താണ്ഡവ് എന്ന സീരീസ് സാങ്കല്‍പ്പികമായ ഒരു കലാ സൃഷ്ടി മാത്രമാണ്. സീരീസിലെ ചില ഭാഗങ്ങള്‍ യഥാര്‍ത്ഥ ജീവിതവുമായി സാദൃശ്യം തോന്നിയെങ്കില്‍ അത് തികച്ചും യാദൃശ്ചികം മാത്രമാണ്. സീരീസിന്റെ അണിയറ പ്രവര്‍ത്തകരോ, അഭിനേതാക്കളോ മനപ്പൂര്‍വ്വം ഒരു മതത്തേയോ, വിശ്വാസത്തേയോ, ജീവിച്ചിരിക്കുന്നതോ മരിച്ചതോ ആയ ഒരു രാഷ്ട്രീയ നേതാക്കളെയോ, വ്യക്തികളെയോ അപമാനിക്കാന്‍ ശ്രമിച്ചിട്ടില്ല. പ്രേക്ഷകര്‍ പറഞ്ഞ പ്രശ്‌നങ്ങളെ കുറിച്ച് ഞങ്ങള്‍ ചര്‍ച്ച നടത്തിയിരുന്നു. സീരീസ് കാരണം ആരുടെയെങ്കിലും വികാരങ്ങളും വിശ്വാസങ്ങളും വ്രണപ്പെട്ടുവെങ്കില്‍ ക്ഷമ ചോദിക്കുന്നു.

അണിയറ പ്രവര്‍ത്തകര്‍

Our sincere apologies . pic.twitter.com/Efr9s0kYnl

— ali abbas zafar (@aliabbaszafar) January 18, 2021

ഹിന്ദു ദൈവങ്ങളെ മോശമായി ചിത്രീകരിക്കുന്നുവെന്നും ഹിന്ദു മത വിശ്വാസത്തെ വൃണപ്പെടുത്തുന്നുവെന്നും ആരോപിച്ച് താണ്ഡവിനെതിരെ ബിജെപി കേന്ദ്ര വാര്‍ത്ത പ്രക്ഷേപണ മന്ത്രിക്ക് പരാതി നല്‍കിയിരുന്നു. കഴിഞ്ഞ ദിവസമാണ് ആമസോണ്‍ പ്രൈം പുതിയ വെബ് സീരീസ് ആയ താണ്ഡവ് പുറത്തുവിട്ടത്. തുടര്‍ന്ന് സീരിസിനെതിരെ നിരവധിപേര്‍ രംഗത്തെത്തിയിരുന്നു. ബിജെപി എംപി മനോജ് കൊട്ടക്ക് ഉള്‍പ്പടെ നിരവധിപേര്‍ സീരിസിനെതിരെ പരസ്യമായി വിമര്‍ശിച്ചിരുന്നു.

നടന്‍ സെയ്ഫ് അലി ഖാന്‍, സംവിധായകന്‍ അലി അബ്ബാസ് സഫര്‍ എന്നിവര്‍ക്കെതിരെ ചണ്ഡീഗഡ് പൊലീസിനും പരാതി നല്‍കിയിട്ടുണ്ട്. സീരീസ് നിരോധിക്കണമെന്നാണ് ബിജെപിയുടെ ആവശ്യം. സീരിസിലെ ഒരു രംഗത്തില്‍ ആയുബ് പരമശിവനായി സ്റ്റേജില്‍ വരുന്നുണ്ട്. അതിനു ശേഷം രാമന്റെ സോഷ്യല്‍ മീഡിയ ഫോളോവേഴ്‌സ് ദിനംപ്രതി വര്‍ധിക്കുന്നു, അതിനാല്‍ പുതിയ ചിത്രങ്ങളെന്തെങ്കിലും പോസ്റ്റ് ചെയ്യണമെന്ന് പറയുന്നുണ്ട്. ഇതാണ് വിവാദങ്ങള്‍ക്ക് ആധാരമായ സംഭവം.

സീരിസിനെതിരെ ട്വിറ്റര്‍ ഉള്‍പ്പടെയുള്ള സമൂഹ മാധ്യമങ്ങളിലൂടെ വന്‍ പ്രതിഷേധമാണ് നടന്നു കൊണ്ടിരിക്കുന്നത്. ബോയ്‌കോട്ട് താണ്ഡവ്, അറസ്റ്റ് ടീം താണ്ഡവ് എന്നിങ്ങനെയുള്ള ഹാഷ് ടാഗുകള്‍ ഉപയോഗിച്ചാണ് ട്വിറ്ററിലൂടെ പ്രതിഷേധിക്കുന്നത്. ബിജെപി നേതാക്കളായ ഗൗരവ് ഗോയല്‍ ഉള്‍പ്പടെ താണ്ഡവിന്റെ അണിയറപ്രവര്‍ത്തകരെ അറസ്‌ററ് ചെയ്യാന്‍ ആഹ്വാനം ചെയ്തിട്ടുണ്ട്.

നേരത്തെ ആദിപുരുഷ് എന്ന ചിത്രത്തെ കുറിച്ച് നല്‍കിയ അഭിമുഖത്തില്‍ രാവണന്റെ ഭാഷ്യമുണ്ടാകും എന്ന സെയ്ഫ് അലി ഖാന്റെ പരാമര്‍ശം വിവാദങ്ങള്‍ സൃഷ്ടിച്ചിരുന്നു. ഒടുവില്‍ സെയ്ഫ് അലി ഖാന്‍ മാധ്യങ്ങളിലൂടെ മാപ്പപേക്ഷിച്ചിരുന്നു.