ശ്രീ നാരായണഗുരു ഓപ്പണ്‍ യൂണിവേഴ്‌സിറ്റി : മുഖ്യമന്ത്രി ഓണ്‍ലൈനിലൂടെ ഇന്ന് ഉദ്ഘാടനം നിര്‍വ്വഹിക്കും

സംസ്ഥാനത്തെ ആദ്യ ഓപ്പണ്‍ സര്‍വകലാശാലക്ക് ഇന്ന് തുടക്കമാകും. കൊല്ലത്ത് ആരംഭിക്കുന്ന ശ്രീനാരായണഗുരു ഓപ്പണ്‍ യൂണിവേഴ്‌സിറ്റിയുടെ ഉദ്ഘാടനം ഇന്ന് മുഖ്യമന്ത്രി പിണറായി വിജയന്‍ ഓണ്‍ലൈനിലൂടെയാണ് നിര്‍വഹിക്കുന്നത്. ചടങ്ങില്‍ ഉന്നത വിദ്യാഭ്യാസമന്ത്രി കെടി ജലീല്‍ അധ്യക്ഷനാകും, മന്ത്രിമാരായ കെ രാജു , ജെ മേഴ്‌സിക്കുട്ടിയമ്മ തുടങ്ങയവരാണ് മുഖ്യാതിഥികള്‍. കൊല്ലം തൃക്കടവൂര്‍ കുരീപ്പുഴയില്‍ വാടകയ്‌ക്കെടുത്ത ബിള്‍ഡിംങ്ങിലാണ് സര്‍വകലാശാല താല്‍ക്കാലികമായി പ്രവര്‍ത്തിക്കുക. മൂന്ന് വര്‍ഷത്തിനുള്ളില്‍ സര്‍വകലാശാലക്ക് സ്ഥിരമായ ആസ്ഥാനമൊരുക്കും എന്നാണ് കരുതുന്നത്.

33,000 ചതുരശ്ര അടിയുള്ള ഒന്‍പത് നിലയുളള കെട്ടിടത്തില്‍ ക്ലാസ്മുറികള്‍, ഹാള്‍, ഓഫിസ് തുടങ്ങിയ സൗകര്യങ്ങളാണ് തയ്യാറാക്കുന്നത്. നിലവില്‍ കേരള സര്‍വ്വകലാശാല, എംജി സര്‍വ്വകലാശാല, കാലിക്കറ്റ് സര്‍വ്വകലാശാല, കണ്ണൂര്‍ സര്‍വകലാശാല എന്നിവയുടെ വിദൂരവിദ്യാഭ്യാസ പഠനകേന്ദ്രങ്ങള്‍ സംയോജിപ്പിച്ചാണ് ഓപ്പണ്‍ യൂണിവേഴ്‌സിറ്റി ആരംഭിക്കുന്നത്. സര്‍ക്കാര്‍-എയ്ഡഡ് കോളെജുകളിലെ ലാബുകളും മറ്റ് അടിസ്ഥാന സൗകര്യങ്ങളും പ്രയോജനപ്പെടുത്തും.