Top

'രാജിയുമൊരു രാഷ്ട്രീയപ്രവര്‍ത്തനമാണ്'; സജി ചെറിയാന്റെ രാജിയില്‍ സെെബർ സിപിഐഎം

''മുഴുവന്‍ സ്വത്തും മരണശേഷം കരുണയ്ക്ക് എഴുതി വെച്ച മനുഷ്യനാണ് സജി ചെറിയാന്‍.''

6 July 2022 2:28 PM GMT
റിപ്പോർട്ടർ നെറ്റ്‌വർക്ക്

രാജിയുമൊരു രാഷ്ട്രീയപ്രവര്‍ത്തനമാണ്; സജി ചെറിയാന്റെ രാജിയില്‍ സെെബർ സിപിഐഎം
X

ഭരണഘടന വിരുദ്ധ പ്രസംഗത്തിന്റെ പേരില്‍ രാജി പ്രഖ്യാപിച്ച സജി ചെറിയാന്റെ തീരുമാനത്തില്‍ പ്രതികരണങ്ങളുമായി സെെബർ സിപിഐഎം. തന്റെ ഒരു വാക്ക് കൊണ്ട് പാര്‍ട്ടിക്കോ മുന്നണിക്കോ സര്‍ക്കാരിനോ പ്രതിസന്ധി സൃഷ്ടിക്കുന്നുവെന്ന് തോന്നിയാല്‍ രാജിയും ഒരു രാഷ്ട്രീയ പ്രവര്‍ത്തനമാണെന്നാണ് പത്തനംതിട്ട അരുവാപ്പുലം പഞ്ചായത്ത് പ്രസിഡന്റ് കൂടിയായ രേഷ്മ മറിയം റോയി അടക്കമുള്ളവര്‍ അഭിപ്രായപ്പെടുന്നത്.

പരമ്പരാഗതമായി കിട്ടിയത് ഉള്‍പ്പെടെ മുഴുവന്‍ സ്വത്തും മരണശേഷം കരുണയ്ക്ക് എഴുതി വെച്ച മനുഷ്യനാണ് സജി ചെറിയാന്‍. ഡോക്ടര്‍മാരായ മക്കളോട് മാസത്തില്‍ 10 ദിവസം പാവപ്പെട്ടവര്‍ക്ക് സൗജന്യ ചികിത്സ നടത്തണമെന്ന് മുദ്രപത്രത്തില്‍ എഴുതി വാങ്ങിയ പിതാവ് കൂടിയാണ് സജി ചെറിയാനെന്ന് രേഷ്മ പറഞ്ഞു.

രേഷ്മ മറിയം റോയി പറഞ്ഞത്: പരമ്പരാഗതമായി കിട്ടിയത് ഉള്‍പ്പെടെ മുഴുവന്‍ സ്വത്തും (വീട് ഉള്‍പ്പെടെ) തന്റെ മരണശേഷം കരുണയ്ക്ക് എഴുതി വെച്ച മനുഷ്യന്‍. ഡോക്ടര്‍മാരായ മക്കളോട് മാസത്തില്‍ 10 ദിവസം പാവപ്പെട്ടവര്‍ക്ക് സൗജന്യ ചികിത്സ നടത്തണമെന്ന് മുദ്രപത്രത്തില്‍ എഴുതി വാങ്ങിയ പിതാവ്.

ചെങ്ങന്നൂര്‍ എന്ന വലതുപക്ഷ മണ്ഡലത്തില്‍ ഇടതുപക്ഷത്തിന്റെ അടിയുറച്ച കോട്ടയാക്കാന്‍ മാത്രം ജനഹൃദയങ്ങളില്‍ നിങ്ങള്‍ ഉണ്ടാക്കിയ ആഴമേറിയ വേരുകള്‍ അവര്‍ക്ക് അത്രമേല്‍ അസ്വസ്ഥത ഉണ്ടാക്കി എന്നത് തിരിച്ചറിയേണ്ടതായിരുന്നു സഖാവേ. പറഞ്ഞ കാര്യങ്ങള്‍ അപ്രിയങ്ങളായ സത്യങ്ങളായേക്കാം. പക്ഷേ ഭരണഘടന തൊട്ട് സത്യം ചെയ്ത മന്ത്രി അത് പറയാമോ എന്നതാണ് പ്രശ്‌നം. എങ്കിലും തന്റെ ഒരു വാക്ക് കൊണ്ട് പാര്‍ട്ടിക്കോ മുന്നണിക്കോ സര്‍ക്കാറിനോ പ്രതിസന്ധി സൃഷ്ടിക്കുന്നുവെന്ന് തോന്നിയാല്‍ രാജിയും ഒരു രാഷ്ട്രീയ പ്രവര്‍ത്തനമാണ്. പ്രിയ സഖാവേ ലാല്‍ സലാം'


പ്രാദേശിക സിപിഐഎം പേജുകളിലും ഈ പോസ്റ്റ് പ്രചരിക്കുന്നുണ്ട്.


ഒരു മണിക്കൂര്‍ നീണ്ട പ്രസംഗത്തിലെ ഏതാനും ചില ഭാഗങ്ങള്‍ അടര്‍ത്തി മാറ്റിയാണ് തനിക്കെതിരെ മാധ്യമങ്ങളിലൂടെ ദുഷ്പ്രചരണം നടന്നതെന്ന് സജി ചെറിയാന്‍ രാജി പ്രഖ്യാപനത്തില്‍ പറഞ്ഞിരുന്നു. വിമര്‍ശനം ഉന്നയിച്ചപ്പോള്‍ തന്റേതായ ഭാഷയും ശൈലിയുമാണ് ഉപയോഗിച്ചത്. ഒരിക്കല്‍ പോലും ഭരണഘടനയോടുള്ള അവമതിപ്പായി വ്യാഖ്യാനിക്കപ്പെടുമെന്ന് കരുതിയില്ല. അങ്ങനെ ഉദ്ദേശിച്ചിട്ടേയില്ല. ഇക്കാര്യം നിയമസഭയില്‍ വ്യക്തമാക്കിയതാണ്. എങ്കിലും ചില വാക്കുകള്‍ തെറ്റിദ്ധാരണാജനകമായ പ്രചരണത്തിന് വ്യാപകമായി ഉപയോഗിച്ചുകൊണ്ടിരിക്കുകയാണ്. ഒരിക്കല്‍ പോലും ഭരണഘടനയെ അവഹേളിക്കാന്‍ ഉദ്ദേശിച്ചിട്ടില്ലെന്നും സജി ചെറിയാന്‍ പറഞ്ഞു.

സജി ചെറിയാന്‍ പറഞ്ഞത് പൂര്‍ണരൂപം: പത്തനംതിട്ട ജില്ലയിലെ മല്ലപ്പള്ളിയില്‍ ജൂലൈ 3, 2022ന് സി.പി.ഐ (എം) ന്റെ ഒരു പരിപാടിയില്‍ പങ്കെടുത്തുകൊണ്ട് പ്രസംഗിക്കുമ്പോള്‍ ഞാന്‍ ഭരണഘടനയെ വിമര്‍ശിച്ചു എന്ന രീതിയില്‍ വാര്‍ത്തകള്‍ വരികയാണ്. നമ്മുടെ ഭരണഘടനയെ ബഹുമാനിക്കുകയും ഭരണഘടനാ മൂല്യങ്ങളെ ആദരിക്കുകയും ചെയ്യുന്ന ഒരു പൊതുപ്രവര്‍ത്തകനാണ് ഞാന്‍.

ഞാന്‍ പ്രവര്‍ത്തിക്കുന്ന രാഷ്ട്രീയ പ്രസ്ഥാനം നമ്മുടെ ഭരണഘടന ഇന്ന് നേരിടുന്ന അസാധാരണമായ വെല്ലുവിളികള്‍ക്കെതിരായി അതിശക്തമായ പ്രതിരോധം തീര്‍ക്കാനുള്ള പ്രയത്‌നത്തിലാണ്. നിയമപരമായും രാഷ്ട്രീയമായുമുള്ള എല്ലാ മാര്‍ഗങ്ങളും ഉപയോഗിച്ചാണ് ഞങ്ങള്‍ മതനിരപേക്ഷജനാധിപത്യഫെഡറല്‍ മൂല്യങ്ങളെ സംരക്ഷിക്കാനുള്ള ശ്രമകരമായ പ്രയത്‌നത്തിലേര്‍പ്പെട്ടിരിക്കുന്നത്. ഇതിനായി നമ്മുടെ ഭരണഘടനാ മൂല്യങ്ങള്‍ ശാക്തീകരിക്കപ്പെടണമെന്ന കാര്യത്തില്‍ സുചിന്തിതമായ അഭിപ്രായമാണ് സി.പി.ഐ (എം) എന്ന പ്രസ്ഥാനത്തിന്റെ ഭാഗമായി പ്രവര്‍ത്തിക്കുന്ന എനിക്കുള്ളത്. ഭരണഘടനാ സംരക്ഷണം പ്രധാന രാഷ്ട്രീയ ഉത്തരവാദിത്വമായി ഏറ്റെടുത്തവരാണ് സി.പി.ഐ (എം) ഉം ഇടതുപക്ഷവും.

സ്വാതന്ത്ര്യത്തിനുശേഷമുള്ള ഏഴര ദശാബ്ദ കാലയളവില്‍ പല ഘട്ടങ്ങളിലും ഭരണഘടനയില്‍ വിഭാവനം ചെയ്തിട്ടുള്ള ജനാധിപത്യവും പൗരസ്വാതന്ത്ര്യങ്ങളും മാത്രമല്ല, സാമ്പത്തിക നീതിക്കുവേണ്ടിയുള്ള ലക്ഷ്യങ്ങളും അട്ടിമറിക്കപ്പെട്ടതായി നമ്മള്‍ കണ്ടതാണ്. ഈ ഘട്ടങ്ങളിലെല്ലാം ഇത്തരം നീക്കങ്ങളെ ചെറുക്കുന്നതില്‍ ഞാനുള്‍പ്പെടുന്ന പ്രസ്ഥാനം അഭിമാനാര്‍ഹമായ പങ്കാണ് വഹിച്ചിട്ടുള്ളത്; ഇപ്പോഴും വഹിച്ചുകൊണ്ടിരിക്കുന്നത്. 197577 ലെ അടിയന്തരാവസ്ഥ, 2019 ല്‍ കേന്ദ്ര സര്‍ക്കാര്‍ കൊണ്ടുവന്ന പൗരത്വ നിയമ ഭേദഗതി, വ്യവസ്ഥാപിതമായ നടപടിക്രമങ്ങള്‍ പാലിക്കാതെ അനുച്ഛേദം 370 റദ്ദാക്കുകയും ജമ്മുകാശ്മീരിനെ രണ്ട് കേന്ദ്രഭരണ പ്രദേശങ്ങളായി വിഭജിക്കുകയും ചെയ്ത നടപടികള്‍ എന്നിവയ്‌ക്കെതിരെയെല്ലാം ഉള്ള ജനകീയ സമരങ്ങളില്‍ എന്റെ പ്രസ്ഥാനം മുന്‍പന്തിയില്‍ നിന്നിട്ടുണ്ട്. കോണ്‍ഗ്രസ്സും ഇന്നത്തെ ഭരണകക്ഷിയായ ബി.ജെ.പിയും ഭരണഘടനയുടെ അന്തഃസത്ത ഉയര്‍ത്തിപ്പിടിക്കുന്നതില്‍ പല ഘട്ടങ്ങളിലും പരാജയപ്പെട്ടിട്ടുണ്ട്. ജനങ്ങള്‍ തെരഞ്ഞെടുത്ത സംസ്ഥാന സര്‍ക്കാരുകളെ പിരിച്ചുവിടുന്നത് ഇവര്‍ വ്യാപകമായി നടപ്പാക്കി. 1959ല്‍ കേരളത്തിലെ കമ്മ്യൂണിസ്റ്റ് മന്ത്രിസഭയെ ഈ രീതിയിലാണ് പിരിച്ചുവിട്ടത്. മതനിരപേക്ഷ മൂല്യങ്ങള്‍ ഇപ്പോള്‍ നേരിടുന്ന വെല്ലുവിളി വളരെ കടുത്തതാണ്. ഏറ്റവും ഒടുവില്‍ ഗുജറാത്ത് കലാപത്തിന് ഉത്തരവാദികളായവരെ തുറന്നുകാട്ടാന്‍ ശ്രമിച്ചവര്‍ക്കെതിരെ സ്വീകരിച്ച ജനാധിപത്യവിരുദ്ധ നടപടികളും നാം കാണുകയാണ്.

ഈ വിമര്‍ശനം ഉന്നയിച്ചപ്പോള്‍ ഞാന്‍ എന്റേതായ ഭാഷയും ശൈലിയുമാണ് ഉപയോഗിച്ചത്. ഒരിക്കല്‍ പോലും ഇത് ഭരണഘടനയോടുള്ള അവമതിപ്പായി വ്യാഖ്യാനിക്കപ്പെടുമെന്ന് ഞാന്‍ കരുതിയില്ല. അങ്ങനെ ഞാന്‍ ഉദ്ദേശിച്ചിട്ടേയില്ല. ഇക്കാര്യം ഇന്നലെ നിയമസഭയില്‍ തന്നെ വ്യക്തമാക്കിയതാണ്.

എന്നിരിക്കിലും ഞാന്‍ പറഞ്ഞ ചില വാക്കുകള്‍ തെറ്റിദ്ധാരണാജനകമായ പ്രചരണത്തിന് വ്യാപകമായി ഉപയോഗിച്ചുകൊണ്ടിരിക്കുകയാണ്. ഒരു മണിക്കൂര്‍ നീണ്ട എന്റെ പ്രസംഗത്തിലെ ഏതാനും ചില ഭാഗങ്ങള്‍ അടര്‍ത്തി മാറ്റിയാണ് ഈ ദുഷ്പ്രചരണം നടത്തുന്നത്. ഇത് സി.പി.ഐ (എം) ഉം ഇടതുപക്ഷ ജനാധിപത്യമുന്നണിയും സംസ്ഥാന സര്‍ക്കാരും ഉയര്‍ത്തിപ്പിടിക്കുന്ന സമീപനങ്ങളെ ദുര്‍ബലപ്പെടുത്താന്‍ ലക്ഷ്യമിട്ടുള്ളതാണ്.

ഇടതുപക്ഷ ജനാധിപത്യമുന്നണിയുടെയും സംസ്ഥാന സര്‍ക്കാരിന്റെയും നയസമീപനങ്ങളെ ദുര്‍ബ്ബലപ്പെടുത്താന്‍ എന്റെ പ്രസംഗം ദുര്‍വ്യാഖ്യാനം ചെയ്തുകൊണ്ടുള്ള പ്രചരണം ഉത്തരവാദപ്പെട്ട ഒരു പൊതുപ്രവര്‍ത്തകന്‍ എന്ന നിലയില്‍ എന്നില്‍ അതിയായ ദുഃഖം ഉണ്ടാക്കുന്നുണ്ട്. ഞാന്‍ ഒരിക്കല്‍ പോലും ഭരണഘടനയെ അവഹേളിക്കാന്‍ ഉദ്ദേശിച്ചിട്ടില്ല.

എന്റെ പ്രസംഗത്തിലെ പരാമര്‍ശങ്ങള്‍ സംബന്ധിച്ചുള്ള നിയമവശങ്ങളെപ്പറ്റി ബഹു. മുഖ്യമന്ത്രി അഡ്വക്കേറ്റ് ജനറലിന്റെ ഉപദേശം തേടിയിട്ടുള്ളതായും ഞാന്‍ മനസ്സിലാക്കുന്നു. ആ സാഹചര്യത്തില്‍ സ്വതന്ത്രമായ തീരുമാനമെടുക്കുന്നതിന് ഞാന്‍ മന്ത്രിസ്ഥാനത്ത് തുടരുന്നത് ശരിയല്ലെന്ന അഭിപ്രായമാണുള്ളത്. അതിനാല്‍, ഞാന്‍ എന്റെ മന്ത്രിസ്ഥാനം രാജിവയ്ക്കുകയാണ്. എന്റെ രാജിക്കത്ത് ബഹുമാനപ്പെട്ട മുഖ്യമന്ത്രിക്ക് നല്‍കിയിട്ടുണ്ട്.

മതനിരപേക്ഷ ജനാധിപത്യ മൂല്യങ്ങള്‍ ഉയര്‍ത്തിപ്പിടിക്കുന്നതിന് എന്റെ പ്രസ്ഥാനം നടത്തുന്ന എല്ലാ പ്രവര്‍ത്തനങ്ങളിലും ഞാന്‍ തുടര്‍ന്നും സജീവമായി ഉണ്ടായിരിക്കും എന്നുകൂടി പറയാന്‍ ആഗ്രഹിക്കുന്നു.


Next Story