പിണറായി വിജയനെതിരെ മത്സരിക്കാന്‍ തയ്യാര്‍; നിലപാടറിയിച്ച് ഷമ മുഹമ്മദ്

കണ്ണൂര്‍: സംസ്ഥാനത്ത് വരുന്ന തെരഞ്ഞെടുപ്പില്‍ മത്സരിക്കാന്‍ തയ്യാറാണെന്ന് എഐസിസി വക്താവ് ഷമ മുഹമ്മദ്. ഇക്കാര്യം നേതൃത്വത്തെ അറിയിച്ചിട്ടുണ്ടെന്നും ഷമ മുഹമ്മദ് ട്വന്റി ഫോര്‍ ന്യൂസിനോട് പറഞ്ഞു.

സ്വന്തം നാടായതിനാല്‍ കണ്ണൂര്‍ മണ്ഡലത്തോട് പ്രത്യേക അടുപ്പമുണ്ട്. പാര്‍ട്ടി നിര്‍ദേശിച്ചാല്‍ ഏത് മണ്ഡലത്തിലും സ്ഥാനാര്‍ത്ഥിയാവും. പിണറായി വിജയനെതിരെ മത്സരിക്കാനും തയ്യാറാണെന്ന് ഷമ മുഹമ്മദ് പറഞ്ഞു.

സ്ഥാനാര്‍ത്ഥിത്വത്തെ കുറിച്ച് പാര്‍ട്ടി തീരുമാനമെടുക്കും. അക്കാര്യം അംഗീകരിക്കുക മാത്രം ചെയ്യും. മത്സരിക്കാന്‍ സന്നദ്ധതാണെന്നുള്ളത് പാര്‍ട്ടിക്ക് അറിയാമെന്നും ഷമ മുഹമ്മദ് പറഞ്ഞു.

കണ്ണൂര്‍ ജില്ലയിലാണ് വളര്‍ന്നത്. അതിനാല്‍ കണ്ണൂരിനോട് കൂടുതല്‍ അടുപ്പമുണ്ട്. പാര്‍ട്ടി പറഞ്ഞാല്‍ ആര്‍ക്കെതിരെയും മത്സരിക്കും. പിണറായി വിജയനെതിരെ മത്സരിക്കാനും തയ്യാറാണ്. എല്‍ഡിഎഫിന്റെ സീറ്റുകള്‍ പിടിച്ചെടുക്കുമെന്നും ഷമ മുഹമ്മദ് പറഞ്ഞു.

കോണ്‍ഗ്രസ് വക്താവും മാഹി ചെറുകല്ലായി സ്വദേശിയുമായ ഷമ മുഹമ്മദിനെ ധര്‍മ്മടത്ത് സ്ഥാനാര്‍ത്ഥിയാക്കുവാന്‍ എഐസിസിക്ക് താല്‍പര്യമുണ്ട്. എഐസിസി സംഘടന ചുമതലയുള്ള സെക്രട്ടറി കെസി വേണുഗോപാല്‍ തന്നെ ഷമ മൂഹമ്മദിന് വേണ്ടി സംസാരിക്കുന്നുണ്ട്. ദല്‍ഹി കേന്ദ്രീകരിച്ചാണ് ഷമ മുഹമ്മദ് ഇപ്പോള്‍ പ്രവര്‍ത്തിക്കുന്നത്. അവിടെ ഡോക്ടറായും പ്രാക്ടീസ് ചെയ്യുന്നുണ്ട്. ധര്‍മ്മടത്തേക്ക് മറ്റൊരു സ്ഥാനാര്‍ത്ഥി വരികയാണെങ്കില്‍ ഷമ മുഹമ്മദിനെ തളിപ്പറമ്പ് മണ്ഡലത്തിലേക്ക് പരിഗണിച്ചേക്കും.

ധര്‍മ്മടം മണ്ഡലം സിപിഐഎമ്മിന്റെ ഉറച്ച മണ്ഡലമാണ്. 2008ല്‍ രൂപീകരിച്ചത് മുതല്‍ ഇടതുപക്ഷത്തോടൊപ്പം ഉറച്ച് നില്‍ക്കുന്ന ഈ മണ്ഡലത്തില്‍ എട്ട് ഗ്രാമഞ്ചായത്തുകളാണുള്ളത്. ചെമ്പിലോട്. കടമ്പൂര്‍, പെരളശേരി, വേങ്ങാട്, മുഴപ്പിലങ്ങാട്, അഞ്ചരക്കണ്ടി, ധര്‍മ്മടം എന്നിങ്ങനെയാണ് പഞ്ചായത്തുകള്‍. കഴിഞ്ഞ തെരഞ്ഞെടുപ്പില്‍ കടമ്പൂരും മുഴപ്പിലങ്ങാടും ഒഴിച്ചുള്ള പഞ്ചായത്തുകളില്‍ എല്‍ഡിഎഫ് വന്‍ വിജയം നേടിയിരുന്നു.

കടമ്പൂര്‍ ഇക്കുറി യുഡിഎഫ് തിരിച്ചു പിടിക്കുകയായിരുന്നു. മുഴപ്പിലങ്ങാട് എല്‍ഡിഎഫ് ഭരണം നിലനിര്‍ത്തിയെങ്കിലും കേവല ഭൂരിപക്ഷമില്ല.

2011ല്‍ മമ്പറം ദിവാകരന്‍ തന്നെയാണ് യുഡിഎഫ് സ്ഥാനാര്‍ത്ഥിയായി മത്സരിച്ചത്. അന്ന് 9000ത്തിലേറെ വോട്ടുകള്‍ക്കാണ് എല്‍ഡിഎഫ് സ്ഥാനാര്‍ത്ഥി കെകെ നാരായണന്‍ വിജയിച്ചത്. 2016ലും മമ്പറം ദിവാകരന്‍ തന്നെയായിരുന്നു യുഡിഎഫ് സ്ഥാനാര്‍ത്ഥി.