‘രണ്ടിടത്ത് എല്‍ഡിഎഫിനെയും യുഡിഎഫിനെയും സഹായിച്ചു’; വെളിപ്പെടുത്തലുമായി എസ്ഡിപിഐ
നേമത്ത് എല്‍ഡിഎഫിനും തിരുവനന്തപുരത്ത് യുഡിഎഫിനും വോട്ട് ചെയ്‌തെന്ന് വെളിപ്പെടുത്തി എസ്ഡിപിഐ തിരുവനന്തപുരം ജില്ലാ പ്രസിഡന്റ് സിയാദ് കണ്ടള. ബിജെപിയുടെ സാധ്യത തടയാനാണ് ഇരു മുന്നണികളെയും സഹായിച്ചതെന്ന് എസ്ഡിപിഐ ജില്ലാ പ്രസിഡന്റ് പറഞ്ഞു. നേമത്ത് ബിജെപി സ്ഥാനാര്‍ത്ഥി കുമ്മനം രാജശേഖരന്റെ വിജയം തടയാന്‍ ഇടതു മുന്നണിയാണ് ഉചിതമെന്നതു കൊണ്ടാണ് സ്ഥാനാര്‍ത്ഥി വി ശിവന്‍കുട്ടിക്കൊപ്പം നിന്നത്.
കഴക്കൂട്ടത്ത് ഉള്‍പ്പെടെ പാര്‍ട്ടിക്ക് സ്ഥാനാര്‍ത്ഥിയില്ലിടത്ത് ഇരുമുന്നണികളും സഹായം തേടിയെന്നും സിയാദ് കണ്ടള പറഞ്ഞു. എന്നാല്‍ കഴക്കൂട്ടത്ത് ഒരു മുന്നണിയോടും മമത കാണിച്ചല്ലെന്നും പ്രവര്‍ത്തകര്‍ മനസാക്ഷി വോട്ട് ചെയ്‌തെന്നും എസ്ഡിപിഐ നേതാവ് പറഞ്ഞു.
നേമത്ത് പതിനായിരത്തോളം വോട്ടുകളും തിരുവനന്തപുരത്ത് മൂവായിരത്തോളം വോട്ടുകളും പാര്‍ട്ടിക്കുണ്ടെന്നും ഇദ്ദേഹം അവകാശപ്പെട്ടു. എസ്ഡിപിഐഎ അടക്കമുള്ള വര്‍ഗീയ പാര്‍ട്ടികളുമായി ബന്ധമില്ലെന്ന് തെരഞ്ഞെടുപ്പ് ഘട്ടത്തില്‍ ഇരു മുന്നണികളും അവകാശപ്പെട്ടിരുന്നു. ഈ വാദങ്ങളെ തള്ളുന്നതാണ് തിരുവന്തപുരം എസ്ഡിപിഐ ജില്ലാ പ്രസിഡന്റിന്റെ വെളിപ്പെടുത്തല്‍.
