ഈ വർഷം ഹജ്ജിന് ഒരു ദശലക്ഷം തീർത്ഥാടകർക്ക് സൗകര്യമൊരുക്കും

റിയാദ്: ഈ വർഷം ഹജ്ജിന് ഒരു ദശലക്ഷം തീർത്ഥാടകർക്ക് സൗകര്യമൊരുക്കുമെന്ന് സൗദി ഹജ്ജ്, ഉംറ മന്ത്രാലയം. പകർച്ചവ്യാധികളുളളതിനാൽ തീർത്ഥാടകരുടെ സുരക്ഷയും, നൽകുന്ന സേവനങ്ങളുടെ ​ഗുണനിലവാരവും ഉറപ്പാക്കുമെന്ന് മന്ത്രാലയം അറിയിച്ചു.

'തീർത്ഥാടകരുടെ ആരോഗ്യവും സുരക്ഷയും ഉറപ്പാക്കാൻ മന്ത്രാലയം എപ്പോഴും സജ്ജമാണ്, തീർത്ഥാടകർക്ക് നൽകുന്ന സേവനങ്ങൾ വികസിപ്പിക്കാനും രണ്ട് വിശുദ്ധ മസ്ജിദുകളിലേക്കുള്ള അവരുടെ പ്രവേശനം കൂടുതൽ സുഗമമാക്കാനുമാണ് കിംഗ്ഡം വിഷൻ 2030 ലക്ഷ്യമിടുന്നതെന്നും' ഡോ. തൗഫീഖ് അൽ-റബിയ പറഞ്ഞു.

തീർത്ഥാടകർക്ക് അവരുടെ ഉംറ വിസ, താമസം, യാത്ര എന്നീ സേവനങ്ങൾ ലഭ്യമാകുന്നതിന് ഡിജിറ്റലായി അപേക്ഷിക്കാം. ഇതിനുളള സംവിധാനങ്ങൾ ഏർപ്പെടുത്തിയതായും മന്ത്രാലയം അറിയിച്ചു.

തീർത്ഥാടകർ പാലിക്കേണ്ട ആരോ​ഗ്യ നിബന്ധനകൾ സൗദി സിവിൽ ഏവിയേഷൻ അതോറിറ്റി പുറത്തിറക്കിയിട്ടുണ്ട്. ഹജ്ജ് കർമങ്ങൾ നിർവഹിക്കുന്നതിനായെത്തുന്ന തീർത്ഥാടകർ നടപടിക്രമങ്ങൾ പാലിക്കുന്നുണ്ടോയെന്ന് വിമാന കമ്പനികൾ ഉറപ്പുവരുത്തണം. നിയമ ലംഘനം നടത്തുന്നവർക്കെതിരെ കർശന നടപടികൾ സ്വീകരിക്കുമെന്നും അധികൃതർ അറിയിച്ചു.

തീർത്ഥാടകർക്കുളള നിബന്ധനകൾ:

• യാത്രക്കാർ 65 വയസ്സിന് താഴെയുള്ളവരാകണം
  

• ആരോഗ്യ മന്ത്രാലയം അംഗീകരിച്ച കോവിഡ് വാക്സിൻ കുത്തിവെപ്പുകളും അടിസ്ഥാന പ്രതിരോധ കുത്തിവെപ്പും എടുക്കണം
  

• പുറപ്പെടുന്ന തീയതിക്ക് മുമ്പ് 72 മണിക്കൂറിനുള്ളിൽ എടുത്ത കോവിഡ് നെഗറ്റീവ് പരിശോധനാ ഫലം (പി.സി.ആർ)
  

STORY HIGHLIGHTS: Hajj Season will Accommodate One Million Pilgrims