‘നന്നായി പോയി, സിപിഐഎം ആപ്പീസിനകത്ത് കാവിക്കൊടിയുമായി ഷൂട്ടിംഗ് നടത്തിയാല്‍ സഖാക്കള്‍ വകവച്ചു തരുമോ’; പിന്തുണച്ച് സന്ദീപ് വാര്യര്‍

പാലക്കാട് കടമ്പഴിപ്പുറത്ത് വായില്യാം കുന്ന് ക്ഷേത്ര പരിസരത്തെ സിനിമാ ഷൂട്ടിംഗ് തടഞ്ഞതിനെ പിന്തുണച്ച് ബിജെപി വക്താവ് സന്ദീപ് വാര്യര്‍. ഷൂട്ടിംഗ് തടഞ്ഞെങ്കില്‍ അത് നന്നായി പോയെന്നും,
അനുമതിയില്ലാതെ സിപിഎം ആപ്പീസിനകത്ത് കയറി കാവിക്കൊടി പിടിച്ച് ഷൂട്ടിംഗ് നടത്തിയാല്‍ സഖാക്കള്‍ വകവച്ചു തരുമോയെന്നുമാണ് സന്ദീപ് വാര്യരുടെ വാദം. അനുമതിയില്ലാതെ സര്‍ക്കാര്‍ സ്ഥാപനങ്ങളില്‍ ഷൂട്ടിംഗ് സാധ്യമല്ലെങ്കില്‍ ദേവസ്വം സ്ഥാപനങ്ങളിലും അത് സാധ്യമല്ലെന്ന് സന്ദീപ് വാര്യര്‍ പറഞ്ഞു.

സന്ദീപ് വാര്യരുടെ പ്രതികരണം–

“പാലക്കാട് കടമ്പഴിപ്പുറം ശ്രീ വായില്യാംകുന്ന് ഭഗവതി ക്ഷേത്ര മുറ്റത്ത് , ദേവസ്വം അനുമതിയില്ലാതെ കയ്യേറി മത , രാഷ്ട്രീയ ചിഹ്നങ്ങളുപയോഗിച്ച് നടത്തിയ സിനിമാ ഷൂട്ടിംഗ് തടഞ്ഞ വിശ്വാസികളുടെ നടപടിയെ പിന്തുണയ്ക്കുന്നു . അനുമതിയില്ലാതെ സിപിഎം ആപ്പീസിനകത്ത് കയറി കാവിക്കൊടി പിടിച്ച് ഷൂട്ടിംഗ് നടത്തിയാല്‍ സഖാക്കള്‍ വകവച്ചു തരുമോ ?
അനുമതിയില്ലാതെ സര്‍ക്കാര്‍ സ്ഥാപനങ്ങളില്‍ ഷൂട്ടിംഗ് സാധ്യമാണോ ? ദേവസ്വം സ്ഥാപനങ്ങളിലും അത് സാധ്യമല്ല . നിരവധി മലയാള സിനിമകള്‍ തൊട്ടടുത്ത് പരിയാനം പറ്റ ഭഗവതി ക്ഷേത്രത്തില്‍ അനുമതിയോടു കൂടി ഷൂട്ടിംഗ് നടത്തിയപ്പോഴൊന്നും ആരും തടത്തിട്ടില്ല . ഇത് സംഘര്‍ഷമുണ്ടാക്കാനുള്ള ദുരുദ്ദേശത്തോടെ നടത്തിയ ഒരു മൂന്നാംകിട സിനിമയുടെ ഷൂട്ടിംഗാണ്. തടഞ്ഞെങ്കില്‍ നന്നായിപ്പോയി .
കഴിഞ്ഞ വര്‍ഷം ഇതേ ക്ഷേത്രത്തിന്റെ വകയായ ഭൂമി സ്വകാര്യ വ്യക്തികള്‍ കയ്യേറിയപ്പോള്‍ കമ്പിവേലി തകര്‍ത്ത് ക്ഷേത്രഭൂമി മോചിപ്പിച്ചിരുന്നു.”

സംഭവത്തില്‍ അഞ്ച് ബിജെപി പ്രവര്‍ത്തകരെ അറസ്റ്റ് ചെയ്തിരുന്നു.
കടമ്പഴിപ്പുറം സ്വദേശികളായ ശ്രീജിത്, സുബ്രഹ്മണ്യന്‍, ബാബു, സച്ചിദാനന്ദന്‍, ശബരീഷ് എന്നിവരെയാണ് അറസ്റ്റ് ചെയ്തത്. ഹിന്ദു- മുസ്ലീം പ്രണയം ചിത്രീകരിക്കാന്‍ അനുവദിക്കില്ലെന്ന് പറഞ്ഞാണ് ബിജെപി സംഘം ചിത്രീകരണം തടഞ്ഞതെന്ന് തിരക്കഥാകൃത്ത് സല്‍മാന്‍ ഫാരിസ് പറഞ്ഞിരുന്നു. ഷൂട്ടിങ്ങ് ഉപകരണങ്ങളും സംഘം നശിപ്പിച്ചു.

നീയാം നദി എന്ന സിനിമയുടെ ഷൂട്ടിംഗ് ആണ് തടഞ്ഞത്. ഹിന്ദു- മുസ്ലീം പ്രണയമാണ് ചിത്രത്തിന്റെ ഇതിവൃത്തം. സിനിമ ഷൂട്ട് ചെയ്യുവാന്‍ ക്ഷേത്ര അധികൃതരുടെ അനുമതി വാങ്ങിയിരുന്നു. ചിത്രീകരണ സമയത്ത് സംഘപരിവാര്‍ പ്രവര്‍ത്തകര്‍ എത്തുകയും ഷൂട്ട് ചെയ്യാന്‍ അനുവദിക്കുകയില്ലെന്ന് ഭീഷണിപ്പെടുത്തുകയും ചെയ്തു. തുടര്‍ന്ന് ഉപകരണങ്ങള്‍ നശിപ്പിക്കുകയും ചെയ്തുവെന്നാണ് തിരക്കഥാകൃത്ത് പറഞ്ഞത്. തീവ്രവാദികള്‍ എന്നാരോപിച്ചാണ് സംഘപരിവാര്‍ പ്രവര്‍ത്തകര്‍ തങ്ങള്‍ക്ക് നേരെ അതിക്രമം നടത്തിയതെന്നും അദ്ദേഹം കൂട്ടിച്ചേര്‍ത്തു.

അനുമതിയില്ലാതെ ചിത്രീകരണം നടത്തിയതിനാലാണ് തടഞ്ഞതെന്നും ലീഗിന്റെ ഉള്‍പ്പടെയുളള കൊടികള്‍ ക്ഷേത്രമുറ്റത്ത് കയറ്റിയതിനേയാണ് തടഞ്ഞയെന്നും സംഘപരിവാര്‍ പ്രവര്‍ത്തകര്‍ പറഞ്ഞു. ആഷിഖ് ഷിനു സല്‍മാനാണ് ചിത്രം സംവിധാനം ചെയ്യുന്നത്.