സൗജന്യ വാക്‌സിനായി കേരളത്തിന്റെ പ്രമേയം; നാളെ പാസാക്കും, അവതരിപ്പിക്കുന്നത് മന്ത്രി വീണാ ജോര്‍ജ്

കേന്ദ്രസര്‍ക്കാര്‍ സൗജന്യ കൊവിഡ് വാക്‌സിന്‍ ലഭ്യമാക്കണമെന്ന് ആവശ്യപ്പെട്ട് നിയമസഭ നാളെ പ്രമേയം പാസാക്കും. ആരോഗ്യമന്ത്രി വീണ ജോര്‍ജ് ആണ് പ്രമേയം അവതരിപ്പിക്കുക. കൊവിഡിനെ ഉന്മൂലനം ചെയ്യാന്‍ സര്‍ക്കാരുകള്‍ പരമപ്രാധാന്യത്തോടെ പ്രവര്‍ത്തിക്കണമെന്നും കൊവിഡ് പ്രതിരോധത്തിന് അത്യന്താപേക്ഷിതമായ വാക്‌സിന്‍ കേന്ദ്രസര്‍ക്കാര്‍ സമയബന്ധിതവും സൗജന്യവുമായി ലഭ്യമാക്കണമെന്നും പ്രമേയത്തിലൂടെ കേരളം ആവശ്യപ്പെടും.

”കഴിഞ്ഞ ഒന്നരവര്‍ഷക്കാലമായി ലോകരാഷ്ട്രങ്ങളെ പിടിച്ചു കുലുക്കുന്ന മഹാമാരിയായ കൊവിഡ് 19നെ പ്രതിരോധിക്കാന്‍ കേന്ദ്ര, സംസ്ഥാന, പ്രാദേശിക സര്‍ക്കാരുകള്‍ വിവിധ തരത്തിലുള്ള പരിശ്രമങ്ങള്‍ നടത്തിക്കൊണ്ടിരിക്കുകയാണ്. കൊവിഡിന്റെ ആദ്യ ഘട്ടത്തില്‍ ലോക്ഡൗണ്‍ ഉള്‍പ്പെടെയുള്ള നടപടികള്‍ സ്വീകരിക്കേണ്ടിവന്നതിനാല്‍ ദുര്‍ബലമായ സമ്പദ്ഘടനയെ അത് കൂടുതല്‍ പ്രതിസന്ധിയിലെത്തിച്ചിരിക്കുകയാണ്. കൊവിഡിന്റെ ഒന്നാം തരംഗം തന്നെ സമ്പദ്ഘടനയെ പ്രതിസന്ധിയില്‍ എത്തിച്ച ഘട്ടത്തിലാണ് ഈ മഹാമാരിയുടെ രണ്ടാം തരംഗം ഉണ്ടായിരിക്കുന്നത്.”

”കൊവിഡ് 19 മഹാമാരിയെ ഉന്മൂലനം ചെയ്യുന്ന ലക്ഷ്യത്തിന് എല്ലാ തലത്തിലുള്ള സര്‍ക്കാരുകളും പരമപ്രാധാന്യത്തോടെ പ്രവര്‍ത്തിച്ചെങ്കില്‍ മാത്രമേ സാധിക്കൂ. ഇതിനായുള്ള ഏറ്റവും നല്ല മാര്‍ഗം സാമൂഹ്യതലത്തില്‍ 19 മഹാമാരിക്കെതിരെയുള്ള പ്രതിരോധ നിര്‍മ്മിതിയാണ്. ഇതിന് ഏറ്റവും പ്രധാനമായത് സാര്‍വത്രികമായ വാക്‌സിനേഷനാണ്. അത് എല്ലാ ജനവിഭാഗങ്ങള്‍ക്കും ലഭ്യമാകണമെങ്കില്‍ വാക്‌സിന്‍ സൗജന്യവും സാര്‍വത്രികവുമായി നല്‍കാന്‍ കഴിയണം. അതിലൂടെ വാക്‌സിനേഷന്‍ എത്രയും പെട്ടെന്ന് നടപടിയെടുത്താല്‍ അത് രാജ്യത്തിനുണ്ടാക്കുന്ന സാമ്പത്തിക ലാഭം ചെറുതായിരിക്കില്ല. കേരളത്തില്‍ കോവിഡ് വാക്്‌സിന്‍ ആവശ്യക്കാര്‍ക്ക് ഫലപ്രദമായ രീതിയില്‍ നല്‍കാനുള്ള കാര്യക്ഷമമായ സംവിധാനം നിലവിലുണ്ട്. അതിനാല്‍ വാക്‌സിന്‍ ലഭ്യമായാല്‍ ഈ രോഗത്തെ പ്രതിരോധിക്കാന്‍ തീര്‍ച്ചയായും നമുക്കു കഴിയും. വര്‍ത്തമാന കാലത്ത് കോവിഡ് പ്രതിരോധത്തിന് അത്യന്താപേക്ഷിതമായ വാക്‌സിന്‍ കേന്ദ്ര സര്‍ക്കാര്‍ സമയബന്ധിതവും സൗജന്യവുമായി ലഭ്യമാക്കണമെന്ന് ഈ സഭ ഐകകണ്‌ഠേന ആവശ്യപ്പെടുന്നു.”

Also Read: ‘സുരേന്ദ്രന്‍ വിഡ്ഢികളാക്കിയത് മലയാളികളെയല്ല, ബിജെപി നേതാക്കളെ’; ‘എ ക്ലാസ് മണ്ഡലത്തില്‍ മാത്രം 200 കോടി’; തെരഞ്ഞെടുപ്പിലൂടെ സ്വന്തമാക്കിയത് കോടികളെന്ന് എസ്‌കെ സജീഷ്