വി മുരളീധരനെതിരെ കേന്ദ്ര വിജിലന്‍സ് അന്വേഷണം; നടപടി പ്രോട്ടോക്കോള്‍ ലംഘന പരാതിയില്‍

കേന്ദ്ര വിദേശകാര്യ സഹമന്ത്രിയും ബിജെപി മുന്‍ സംസ്ഥാന അദ്ധ്യക്ഷനുമായി വി മുരളീധരനെതിരെ കേന്ദ്ര ഏജന്‍സി അന്വേഷണം. വിദേശത്ത് നടന്ന മന്ത്രിതല യോഗത്തില്‍ പ്രോട്ടോക്കോള്‍ ലംഘിച്ച് പി ആര്‍ ഏജന്റിനെ പങ്കെടുപ്പിച്ചെന്ന പരാതിയില്‍ വിദേശകാര്യ ചീഫ് വിജിലന്‍സ് ഓഫീസര്‍ അന്വേഷണം നടത്തും. കേന്ദ്ര വിജിലന്‍സ് കമ്മീഷനാണ് നിര്‍ദ്ദേശം നല്‍കിയിരിക്കുന്നത്. ലോക് താന്ത്രിക് യുവജനതാതള്‍ ദേശീയ അദ്ധ്യക്ഷന്‍ സലിം മടവൂര്‍ നല്‍കിയ പരാതിയിലാണ് കേന്ദ്ര ഏജന്‍സിയുടെ അന്വേഷണം.

വി മുരളീധരനെതിരായ പ്രോട്ടോക്കോള്‍ ലംഘന പരാതി പ്രധാനമന്ത്രിയുടെ ഓഫീസ് അന്വേഷിച്ച് തീര്‍പ്പാക്കിയിരുന്നു. വി മുരളീധരന്‍ പ്രോട്ടോക്കോള്‍ ലംഘിച്ചിട്ടില്ലെന്നാണ് പിഎംഓയുടെ കണ്ടെത്തല്‍. ആരോപണം ഉന്നയിച്ച് സലിം മടവൂര്‍ നല്‍കിയതടക്കം എല്ലാ പരാതികളും ഒക്ടോബര്‍ 21ന് തള്ളിയിരുന്നു.

അബുദാബിയിലെ മന്ത്രിതല സമ്മേളനത്തില്‍ മുരളീധരന്‍ മാനദണ്ഡങ്ങള്‍ ലംഘിച്ച് മഹിളാ മോര്‍ച്ച നേതാവും പിആര്‍ ഏജന്റുമായ സ്മിതാ മേനോനെ പങ്കെടുപ്പിച്ചെന്ന ആരോപണം വിവാദമായിരുന്നു.

മുരളീധരനെതിരെ ഉയര്‍ന്ന ആരോപണത്തില്‍ വസ്തുതയില്ലെന്നാണ് വിദേശകാര്യമന്ത്രാലയം വ്യക്തമാക്കിയത്. പരാതികളിലുള്ളത് വസ്തുതാ വിരുദ്ധമായ ആരോപണങ്ങളാണെന്നും മന്ത്രാലയം പറയുന്നു. പരാതിയേത്തുടര്‍ന്ന് കേന്ദ്രം യുഎഇ വെല്‍ഫെയര്‍ ഓഫീസറുടെ റിപ്പോര്‍ട്ട് തേടിയിരുന്നു. ഈ റിപ്പോര്‍ട്ടിന്റെ അടിസ്ഥാനത്തിലാണ് പരാതി തള്ളിയത്.