നേടിയ സീറ്റ് തോറ്റ പാര്‍ട്ടിക്ക് കൊടുക്കണമെന്ന വാദം വിചിത്രമെന്ന് പീതാംബരന്‍ മാസ്റ്റര്‍; കോണ്‍ഗ്രസ് നേതാവിന്റെ അനുസ്മരണത്തിലും വിശദീകരണം

കോട്ടയം: പാലാ സീറ്റില്‍ വിട്ടുവീഴ്ചകള്‍ക്കില്ലെന്ന് ആവര്‍ത്തിച്ച് എന്‍സിപി. തോറ്റ പാര്‍ട്ടിക്ക് സീറ്റ് തിരിച്ചുകൊടുക്കണമെന്ന വാദം വിചിത്രമാണെന്ന് പാര്‍ട്ടി സംസ്ഥാനാധ്യക്ഷന്‍ ടിപി പീതാംബരന്‍ മാസ്റ്റര്‍ പ്രതികരിച്ചു. എല്‍ഡിഎഫിന്റെ നയം അതല്ലെന്നും അദ്ദേഹം പറഞ്ഞു.

മുന്നണി മാറ്റവുമായി ബന്ധപ്പെട്ട് ഇതുവരെ യുഡി എഫുമായി ചര്‍ച്ച നടത്തിയിട്ടില്ലെന്നും പീതാംബരന്‍ മാസ്റ്റര്‍ വ്യക്തമാക്കി. ‘പാലാ സീറ്റിനെ സംബന്ധിച്ച് തര്‍ക്കമുണ്ട്. സീറ്റ് എന്‍സിപിയില്‍ നിന്ന് തിരിച്ചെടുക്കുന്നത് ശരിയായ നടപടിയല്ല. സീറ്റ് തോറ്റ പാര്‍ട്ടിക്ക് തിരിച്ചു കൊടുക്കണമെന്ന് വാദം വിചിത്രമാണ്. എല്‍ഡിഎഫിന്റെ നയം അങ്ങനെയല്ല. ഒരു സീറ്റും എന്‍സിപി വിട്ട് നല്‍കില്ല’, അദ്ദേഹം പറഞ്ഞു.

പുതിയ പാര്‍ട്ടികള്‍ മുന്നണിയില്‍ വരുമ്പോള്‍ വിട്ടുകൊടുക്കേണ്ടത് എന്‍സിപി മാത്രമല്ല. പാര്‍ട്ടിയില്‍ പിളര്‍പ്പുണ്ടാകുകയില്ല. പാര്‍ട്ടിക്ക് തദ്ദേശ തെരഞ്ഞെടുപ്പില്‍ പരിഗണന ലഭിച്ചില്ല എന്ന പരാതി പൊതുവില്‍ ജില്ലാ കമ്മിറ്റികള്‍ക്ക് ഉണ്ടെന്നും അദ്ദേഹം ചൂണ്ടിക്കാട്ടി.

കോണ്‍ഗ്രസ് എസ് നേതാവായിരുന്ന സിഎച്ച് ഹരിദാസിന്റെ അനുസ്മരണം കോട്ടയം ജില്ലയില്‍ സംഘടിപ്പിച്ചത് സംസ്ഥാന നേതൃത്വം അറിഞ്ഞ് നടത്തിയതല്ലെന്നും പീതാംബരന്‍ മാസ്റ്റര്‍ വിശദീകരിച്ചു. പരിപാടി പ്രദേശികമായി സംഘടിപ്പിച്ചതാവാം. അതിന് തടസമില്ല. ആരുടെയെങ്കിലും നിര്‍ദ്ദേശ പ്രകാരമാണ് എന്ന് കരുതുന്നില്ലെന്നും അദ്ദേഹം കൂട്ടിച്ചേര്‍ത്തു.