‘സംഘപരിവാര്‍ അജണ്ടയുടെ ഭാഗം’; ദേവാലയം പൊളിച്ച സംഭവത്തില്‍ സുധാകരന്‍

ഡല്‍ഹി അന്ധേരിയ മോഡിലെ ദേവാലയം പൊളിച്ച അധികൃതരുടെ നടപടി മതേതരത്വത്തിനെതിരേയുള്ള കടുത്ത വെല്ലുവിളിയാണെന്ന് കെപിസിസി അധ്യക്ഷന്‍ കെ സുധാകരന്‍. ഭരണ പരാജയത്തിന് നേരെ ചോദ്യങ്ങളുയരുമ്പോള്‍ അത് മറച്ചുപിടിക്കാന്‍ രാജ്യാമെമ്പാടും പ്രശ്‌നങ്ങള്‍ സൃഷ്ടിക്കുന്ന സംഘപരിവാര്‍ അജണ്ടയുടെ ഭാഗമാണ് ഇതും. ആരാധനാലയം തകര്‍ത്ത നടപടി ഭരണകൂടത്തെ ദുരുപയോഗം ചെയ്ത് കൊണ്ട് മതസ്വാതന്ത്യത്തെ ഹനിക്കുന്നതും സംശയാസ്പദവുമാണെന്നും കെ സുധാകരന്‍ വ്യക്തമാക്കി.

കെ സുധാകരന്‍ പറഞ്ഞത്: ”ഡല്‍ഹി അന്ധേരിയ മോഡിലെ ലിറ്റില്‍ ഫ്‌ലവര്‍ കത്തോലിക്ക ദേവാലയം പൊളിച്ച അധികൃതരുടെ നടപടി മതേതരത്വത്തിനെതിരേയുള്ള കടുത്ത വെല്ലുവിളി ആണ്. ഭരണ പരാജയത്തിന് നേരെ ചോദ്യങ്ങളുയരുമ്പോള്‍ അത് മറച്ചുപിടിക്കാന്‍ രാജ്യാമെമ്പാടും പ്രശ്‌നങ്ങള്‍ സൃഷ്ടിക്കുന്ന സംഘപരിവാര്‍ അജണ്ടയുടെ ഭാഗമാണ് ഇതും. മതിയായ നടപടിക്രമങ്ങള്‍ പോലും പാലിക്കാതെ, പ്രവൃത്തി സമയത്തിന് മുന്‍പ് ആരാധനാലയം തകര്‍ത്ത നടപടി ഭരണകൂടത്തെ ദുരുപയോഗം ചെയ്ത് കൊണ്ട് മതസ്വാതന്ത്യത്തെ ഹനിക്കുന്നതും സംശയാസ്പദവുമാണ്.”

”ഇഷ്ടമുള്ള മതത്തില്‍ വിശ്വസിക്കാനും ആരാധന നടത്താനും അവകാശം ഉള്ള രാജ്യമാണ് ഇന്ത്യ. തദ്ദേശ ഭരണകൂടങ്ങള്‍ ബലംപ്രയോഗിച്ച് ആരാധനാലയങ്ങള്‍ പൊളിച്ചു മാറ്റുന്നത് വിശ്വാസികളോടുള്ള വെല്ലുവിളി മാത്രമല്ല തികഞ്ഞ ഭരണഘടനാ ലംഘനം കൂടിയാണ്. പതിറ്റാണ്ടുകളായി നിലകൊള്ളുന്ന ദേവാലയം നിയമവിരുദ്ധമായ ഭൂമിയില്‍ ആണെന്ന വാദം സാമാന്യ ബുദ്ധിക്ക് നിരക്കുന്നതല്ല. പ്രാദേശിക ഭരണകൂടത്തിന് എന്തെങ്കിലും അഭിപ്രായ ഭിന്നതകള്‍ ഉണ്ടെങ്കില്‍ തന്നെ അനേകം വിശ്വാസികളുടെ ആരാധനാലയമായ വിശുദ്ധ മന്ദിരം പൊളിച്ചു മാറ്റുന്നത് ജനാധിപത്യ വിരുദ്ധമാണ്. ഫാ: സ്റ്റാന്‍ സാമിയോട് ഹിന്ദുത്വ ഭരണകൂടം കാണിച്ച നീതി നിഷേധത്തിന്റെ തുടര്‍ച്ചയാണ് ഈ കിരാത നടപടി.”

”ഡല്‍ഹിയില്‍ മഹാഭൂരിപക്ഷവും മലയാളികളെ ഉള്‍ക്കൊള്ളുന്ന ഇടവകയിലെ കൃസ്തീയ ദേവാലയത്തിനെതിരായ നടപടിയില്‍ ശക്തമായ പ്രതിഷേധം രേഖപെടുത്തുന്നു. വിശ്വാസികളുടെ അവകാശങ്ങള്‍ സംരക്ഷിക്കാനുള്ള നിയമപോരാട്ടങ്ങള്‍ക്ക് പിന്തുണ നല്‍കുന്നു. തന്യൂനപക്ഷങ്ങക്കെതിരെ രാജ്യമെമ്പാടും ഉയര്‍ന്നുവരുന്ന അസഹിഷ്ണുതയും അക്രമങ്ങളും തടയുന്നതിന് നടപടി സ്വീകരിക്കണമെന്നും അവര്‍ക്ക് ഭരണഘടന ഉറപ്പു നല്‍കിയിരിക്കുന്ന അവകാശങ്ങള്‍ സംരക്ഷിക്കണമെന്നും ആവശ്യപ്പെട്ട് പ്രധാനമന്ത്രിക്ക് കത്ത് നല്‍കിയിട്ടുണ്ട്.”