‘സമസ്തയുടെ പ്രതികരണം മനസില്‍ വര്‍ഗീയ ചിന്തയുള്ളത് കൊണ്ട്’; വിമര്‍ശനവുമായി പി. ജയരാജന്‍

കണ്ണൂര്‍: മുഖ്യമന്ത്രി പിണറായി വിജയനെതിരെ മുഖപ്രസംഗം എഴുതിയ സമസ്ത മുഖപത്രത്തിനെതിരെ വിമര്‍ശനവുമായി സിപിഐഎം നേതാവ് പി. ജയരാജന്‍. മനസില്‍ വര്‍ഗീയ ചിന്തയുള്ളത് കൊണ്ടാണ് മുസ്ലീം ലീഗിനെ വിമര്‍ശിക്കുന്നത് വര്‍ഗീയതയുടെ അനുരണനമാണെന്ന തരത്തില്‍ സുപ്രഭാതം മുഖപ്രസംഗം എഴുതിയതെന്ന് ജയരാജന്‍ വ്യക്തമാക്കി. മതനിരപേക്ഷതക്ക് വേണ്ടി ഉറച്ച നിലപാട് സ്വീകരിക്കുന്ന മുഖ്യമന്ത്രിയും സര്‍ക്കാരുമാണ് ഇവിടെയുള്ളതെന്നും അത്തരത്തിലുള്ള മുഖ്യമന്ത്രിയെയും സര്‍ക്കാറിനെയും ഇത്തരത്തില്‍ ചിത്രീകരിക്കുന്നത് ശരിയായ കാര്യമല്ലെന്നും പി. ജയരാജന്‍ വ്യക്തമാക്കി.

”മതനിരപേക്ഷതക്ക് വേണ്ടി ഉറച്ച നിലപാട് സ്വീകരിക്കുന്ന മുഖ്യമന്ത്രിയും സര്‍ക്കാരുമാണ് കേരളത്തിലുള്ളത്. അത്തരത്തിലുള്ള മുഖ്യമന്ത്രിയെയും സര്‍ക്കാറിനെയും ഇത്തരത്തില്‍ ചിത്രീകരിക്കുന്നത് ശരിയായ കാര്യമല്ല. മുസ്ലീം സമുദായത്തിന് അകത്ത് സ്വത്വ ബോധം ഉല്‍പാദിപ്പിച്ച് അതിന്റെ അടിസ്ഥാനമാക്കി ഒരു വര്‍ഗീയ രാഷ്ട്രീയത്തിനുള്ള നീക്കമാണ് തദ്ദേശ തെരഞ്ഞെടുപ്പില്‍ നടത്തിയത്. പലയിടത്തും വെല്‍ഫെയര്‍ പാര്‍ട്ടിയുമായും ചില സ്ഥലങ്ങളില്‍ എസ്ഡിപിഐയുമായും സഹകരിക്കുന്ന നിലപാടാണ് ലീഗും കോണ്‍ഗ്രസും സ്വീകരിച്ചത്. വര്‍ഗീയ ചേരിതിരിവ് സൃഷ്ടിച്ച്, കഴിഞ്ഞ ലോക്്‌സഭ തെരഞ്ഞെടുപ്പിലെ പോലെ ഇടതുപക്ഷ വിരുദ്ധ ജ്വരം ഉണ്ടാക്കാന്‍ ശ്രമിച്ചു. അത് പരാജയപ്പെട്ട കാര്യമാണ് മുഖ്യമന്ത്രി ചൂണ്ടിക്കാണിച്ചത്.”