Top

ഹരിതയ്ക്ക് പുതിയ സംസ്ഥാന കമ്മിറ്റി; പുതിയ അധ്യക്ഷ മരവിപ്പിച്ച കമ്മിറ്റിയിലെ ട്രഷറര്‍

ഹരിതാ നേതാക്കള്‍ നല്‍കിയ പരാതിയില്‍ ആയിഷ ഒപ്പ് വച്ചിരുന്നില്ല

12 Sep 2021 11:03 AM GMT
റിപ്പോർട്ടർ നെറ്റ്‌വർക്ക്

ഹരിതയ്ക്ക് പുതിയ സംസ്ഥാന കമ്മിറ്റി; പുതിയ അധ്യക്ഷ മരവിപ്പിച്ച കമ്മിറ്റിയിലെ ട്രഷറര്‍
X

എംഎസ്എഫ് വനിതാ വിഭാഗമായ ഹരിതയുടെ പുതിയ സംസ്ഥാന കമ്മിറ്റി നിലവില്‍ വന്നു. പിഎച്ച് ആയിഷ ബാനുവാണ് പുതിയ അധ്യക്ഷ. ജനറല്‍ സെക്രട്ടറിയായി റുമൈസ റഫീഖിനെയും ട്രഷററായി നയന സുരേഷിനെയും നിയമിച്ചു. വൈസ് പ്രസിഡന്റുമാരായി നജ്‌വ ഹനീന (മലപ്പുറം), ഷാഹിദ റാഷിദ് (കാസര്‍ഗോഡ്), അയ്ഷ മറിയം (പാലക്കാട്) എന്നിവരെയും സെക്രട്ടറിമാരായി അഫ്ഷില (കോഴിക്കോട്), ഫായിസ. എസ് (തിരുവനന്തപുരം), അഖീല ഫര്‍സാന (എറണാകുളം) എന്നിവരെയും നിയമിച്ചു.

കഴിഞ്ഞ കമ്മിറ്റിയിലെ സംസ്ഥാന ട്രഷററായിരുന്നു ആയിഷ ബാനു. ഹരിതാ നേതാക്കള്‍ നല്‍കിയ പരാതിയില്‍ ആയിഷ ഒപ്പ് വച്ചിരുന്നില്ല. മാത്രമല്ല, പികെ നവാസിനും നേതൃത്വത്തിനും അനുകൂല നിലപാട് സ്വീകരിച്ച വ്യക്തി കൂടിയായിരുന്നു ആയിഷ. റുമൈസ റഫീഖ് നേരത്തെ ജില്ലാ ഭാരവാഹിത്വത്തിലുണ്ടായിരുന്നു വ്യക്തിയാണ്. മലപ്പുറം സ്വദേശിയാണ് നയന സുരേഷ്. പിഎംഎ സലാമാണ് പുതിയ കമ്മിറ്റിയെ പ്രഖ്യാപിച്ചത്.

അതേസമയം, ഹരിത വിവാദം വിശദീകരിച്ച് പിഎംഎ സലാം വീണ്ടും രംഗത്തെത്തി. വിവാദത്തിന് പിന്നില്‍ ഗൂഢാലോചനയുണ്ട്. ഹരിത ഭാരവാഹികള്‍ക്ക് നിഗൂഡമായ ഉദ്ദേശങ്ങള്‍ ഉണ്ടായിരുന്നു. പാണക്കാട് കുടുംബത്തിന്റെ തീരുമാനം ലംഘിക്കുന്നത് അംഗീകരിക്കാനാകില്ല. വിവാദങ്ങള്‍ക്ക് പിന്നില്‍ ഗ്രൂപിസമെന്നും സലാം വിമര്‍ശിച്ചു.

ഹരിത തര്‍ക്കത്തിന് കാരണം നവാസിന്റെ പരാമര്‍ശങ്ങളല്ല. തര്‍ക്കം മുമ്പ് തന്നെ തുടങ്ങി, നവാസിന്റെ വാക്കുകള്‍ വീണ് കിട്ടിയത് ഹരിതാ നേതാക്കള്‍ ആയുധമാക്കുകയായിരുന്നു. അവര്‍ക്ക് അഭിപ്രായ വ്യത്യാസം ഉണ്ടെങ്കില്‍ പാര്‍ട്ടിയിലാണ് പറയേണ്ടത്. നേതൃത്വത്തെ അറിയിക്കേണ്ടതിന് പകരം ചാനലുകളെ ആണ് അറിയിച്ചിരുന്നത്. നാല് വര്‍ഷമായി ഹരിതയുടെ യോഗത്തില്‍ പങ്കെടുക്കാത്തവര്‍ നവാനിനെതിരായ പരാതിയില്‍ ഒപ്പിട്ടിരുന്നെന്നും സലാം പറഞ്ഞു.

Next Story