Top

'സംഘടനയെ ഉടച്ചുവാര്‍ക്കാന്‍ സംഘാടകശേഷിയുള്ളവരാണ് നിയുക്ത അധ്യക്ഷന്‍മാര്‍'; തീരുമാനം നേതാക്കളുടെ ആശീര്‍വാദത്തോടെയെന്ന് സുധാകരന്‍

അണികളുടെയും അനുഭാവികളുടെയും പ്രതീക്ഷകള്‍ പരിഗണിച്ചു കൊണ്ടാണ് പുതിയ നേതൃത്വം തിരഞ്ഞെടുക്കപ്പെട്ടിരിക്കുന്നത്

29 Aug 2021 3:27 PM GMT
റിപ്പോർട്ടർ നെറ്റ്‌വർക്ക്

സംഘടനയെ ഉടച്ചുവാര്‍ക്കാന്‍ സംഘാടകശേഷിയുള്ളവരാണ് നിയുക്ത അധ്യക്ഷന്‍മാര്‍; തീരുമാനം നേതാക്കളുടെ ആശീര്‍വാദത്തോടെയെന്ന് സുധാകരന്‍
X

സംഘടനയെ ഉടച്ചുവാര്‍ക്കാന്‍ തക്ക സംഘാടകശേഷിയുള്ളവരാണ് നിയുക്ത ഡിസിസി അധ്യക്ഷന്‍മാരെന്ന് കെപിസിസി അധ്യക്ഷന്‍ കെ സുധാകരന്‍. മുതിര്‍ന്ന നേതാക്കളുടെ ആശീര്‍വാദത്തോടെ അണികളുടെയും അനുഭാവികളുടെയും പ്രതീക്ഷകള്‍ പരിഗണിച്ചു കൊണ്ടാണ് പുതിയ നേതൃത്വം തെരഞ്ഞെടുക്കപ്പെട്ടിരിക്കുന്നതെന്ന് സുധാകരന്‍ വ്യക്തമാക്കി.

കെ സുധാകരന്‍ പറയുന്നു: പ്രതിഭാധനരായ ഒട്ടനവധി നേതാക്കളാല്‍ സമ്പന്നമാണ് ഇന്ത്യന്‍ നാഷണല്‍ കോണ്‍ഗ്രസ് എന്ന പ്രസ്ഥാനം. അവരില്‍ നിന്നും 14 ജില്ലകളിലെ കോണ്‍ഗ്രസിനെ നയിക്കാന്‍ അധ്യക്ഷന്‍മാരെ കണ്ടെത്തുക എന്ന ശ്രമകരമായ ദൗത്യത്തിന് അന്ത്യം കുറിച്ചിരിക്കുന്നു. സംഘടനയെ ഉടച്ചുവാര്‍ക്കാന്‍ തക്ക സംഘാടകശേഷിയുള്ളവരാണ് നിയുക്ത അദ്ധ്യക്ഷന്‍മാര്‍. മുതിര്‍ന്ന നേതാക്കളുടെ ആശീര്‍വാദത്തോടെ അണികളുടെയും അനുഭാവികളുടെയും പ്രതീക്ഷകള്‍ പരിഗണിച്ചു കൊണ്ടാണ് പുതിയ നേതൃത്വം തിരഞ്ഞെടുക്കപ്പെട്ടിരിക്കുന്നത്.

ജനങ്ങളെ കോര്‍ത്തിണക്കി പ്രസ്ഥാനത്തിന് കൂടുതല്‍ കരുത്തു പകര്‍ന്ന് കേന്ദ്രസംസ്ഥാന ജന വിരുദ്ധ ഭരണകൂടങ്ങള്‍ക്കെതിരെ പ്രതിഷേധ പരമ്പരകള്‍ ഉയര്‍ത്തേണ്ട സമയം ആസന്നമായിരിക്കുന്നു. ഈ ദുരിതകാലത്ത് അവശതയനുഭവിക്കുന്ന ജനതയ്ക്ക് സഹായവുമായി ഓടിയെത്തേണ്ട നിയോഗവും പുതിയ അധ്യക്ഷന്‍മാരില്‍ നിക്ഷിപ്തമാണ്. സംഘടനയെ ശക്തിപ്പെടുത്താനും, ജനങ്ങള്‍ക്ക് ദുരിതങ്ങളില്‍ ആശ്വാസമാകാനും, ഭരണകൂട കെടുകാര്യസ്ഥതകള്‍ക്കെതിരെ കൊടുങ്കാറ്റാകാനും കഴിയുന്ന വിധം ജില്ലാ കോണ്‍ഗ്രസ് കമ്മിറ്റികളെ നയിക്കാന്‍ നിയുക്ത പ്രസിഡന്റുമാര്‍ക്ക് കഴിയട്ടെ എന്നാശംസിക്കുന്നു.

അവര്‍ക്ക് എല്ലാവിധ സഹായ സഹകരണങ്ങളും നല്‍കണമെന്ന് പ്രിയപ്പെട്ട സഹപ്രവര്‍ത്തകരോടും പാര്‍ട്ടി അണികളോടും അനുഭാവികളോടും സ്‌നേഹപുരസ്സരം അഭ്യര്‍ത്ഥിക്കുന്നു.


Next Story