Top

ഉണ്ണിത്താന് നേരെ തെറിവിളി; കോണ്‍ഗ്രസ് നേതാക്കള്‍ക്കെതിരെ നടപടി, വിശദീകരണമില്ലെങ്കില്‍ പുറത്തേക്ക്

അപമര്യാദയായി പെരുമാറിയത് ഗൗരവതരവും പാര്‍ട്ടിക്ക് അവമതിപ്പുണ്ടാക്കുന്നതുമാണ്

10 Aug 2021 12:19 PM GMT
റിപ്പോർട്ടർ നെറ്റ്‌വർക്ക്

ഉണ്ണിത്താന് നേരെ തെറിവിളി; കോണ്‍ഗ്രസ് നേതാക്കള്‍ക്കെതിരെ നടപടി, വിശദീകരണമില്ലെങ്കില്‍ പുറത്തേക്ക്
X

ട്രെയിനില്‍ വച്ച് രാജ്‌മോഹന്‍ ഉണ്ണിത്താന്‍ എംപിയെ അസഭ്യം പറഞ്ഞ കോണ്‍ഗ്രസ് നേതാക്കള്‍ക്കതിരെ നടപടി. ഉണ്ണിത്താനെ അസഭ്യം പറഞ്ഞ കോണ്‍ഗ്രസ് നേതാക്കളായ പത്മരാജന്‍ ഐങ്ങോത്ത്, അനില്‍ വാഴുന്നോറടി എന്നിവരെ ആറ് മാസത്തേക്ക് സസ്‌പെന്റ് ചെയ്തതെന്ന് കെപിസിസി അധ്യക്ഷന്‍ കെ സുധാകരന്‍ അറിയിച്ചു. ഉണ്ണിത്താനോട് അപമര്യാദയായി പെരുമാറിയത് ഗൗരവതരവും പാര്‍ട്ടിക്ക് അവമതിപ്പുണ്ടാക്കുന്നതുമാണ്. ഒരാഴ്ചക്കുള്ളില്‍ വിശദീകരണം നല്‍കിയില്ലെങ്കില്‍ തുടര്‍നടപടികള്‍ സ്വീകരിക്കുമെന്നും സുധാകരന്‍ വ്യക്തമാക്കി.


കഴിഞ്ഞ ദിവസം മാവേലി എക്‌സ്പ്രസിലെ യാത്രയ്ക്കിടയിലാണ് ഉണ്ണിത്താനെ കോണ്‍ഗ്രസുകാര്‍ അസഭ്യം പറഞ്ഞത്. കെപിസിസി സെക്രട്ടറി ബാലകൃഷ്ണന്‍ പെരിയക്കൊപ്പമായിരുന്നു എംപിയുടെ യാത്ര. ഇവര്‍ സഞ്ചരിച്ചിരുന്ന അതേ ബോഗിയില്‍ കയറിയ പത്മരാജന്‍ ഐങ്ങോത്തും അനിലും ചേര്‍ന്ന് ഉണ്ണിത്താനെ അസഭ്യം പറയുകയും മര്‍ദ്ദിക്കാന്‍ ശ്രമിക്കുകയും ചെയ്‌തെന്നാണ് പരാതി. സംഭവത്തില്‍ പ്രവാസി കോണ്‍ഗ്രസ് ജില്ലാ പ്രസിഡന്റ് പദ്മരാജന്‍ ഐങ്ങോത്തിനെ പൊലീസ് അറസ്റ്റ് ചെയ്തിരുന്നു.

Next Story