വോട്ട് ചെയ്യല്‍ കര്‍ശനമാക്കല്‍ ബില്‍; വോട്ട് ചെയ്യാത്തവരെ ശിക്ഷിക്കാനാകില്ലെന്ന് കേന്ദ്രം

ന്യൂഡൽഹി: ജനങ്ങളെ വോട്ട് ചെയ്യാൻ നിർബന്ധിക്കരുതെന്ന് കേന്ദ്ര സർക്കാർ. വോട്ട് ചെയ്യുന്നത് ജനങ്ങളുടെ കടമയാണെന്നും അതിന് ആരെയും നിർബന്ധിക്കാൻ കഴിയില്ലെന്നും കേന്ദ്രമന്ത്രി എസ് പി സിം​ഗ് ബാ​ഗേൽ പാർലമെന്റിൽ പറഞ്ഞു. വോട്ട് ചെയ്യൽ കർശനമാക്കുന്നതുമായി ബന്ധപ്പെട്ട് 2019 ൽ ജനാർദ്ദൻ സിം​ഗ് അവതരിപ്പിച്ച ബിൽ ചർച്ചയായതോടെയാണ് കേന്ദ്ര നിയമ മന്ത്രിയുടെ പരാമർശം.

വോട്ടവകാശം വിനിയോ​ഗിക്കേണ്ടത് ഓരോ വ്യക്തിയുടെയും തീരുമാനമായതുകൊണ്ട് തന്നെ വോട്ട് ചെയ്യാത്തതിന്റെ പേരിൽ ആരെയും ശിക്ഷിക്കാൻ കഴിയില്ലെന്നാണ് കേന്ദ്രസർക്കാരിന്റെ നിലപാട്. രാജ്യത്ത് ​ഗുജറാത്ത് സർക്കാർ വോട്ടെടുപ്പ് നിർബന്ധമാക്കി കൊണ്ടുള്ള ബിൽ നിയമസഭയിൽ പാസാക്കിയിരുന്നു. എന്നാൽ, ഈ ബിൽ ഹൈക്കോടതി സ്റ്റേ ചെയ്തിരിക്കുകയാണ്. ഇതിനുപുറമെ, ഫിലിപ്പീൻസ്, സ്‌പെയിൻ, സിംഗപ്പൂർ, തായ്‌ലൻഡ്, തുർക്കി, ഉറുഗ്വേ, വെനസ്വേല, ബൾഗേറിയ, ചിലി തുടങ്ങിയ ചില സ്ഥലങ്ങളിൽ നിലവിൽ നിർബന്ധിത വോട്ടിം​ഗ് സമ്പ്രദായം നിലനിൽക്കുന്നുണ്ട്. എന്നാൽ, ഇത് ജനങ്ങൾക്കിടയിൽ സർക്കാരുകൾക്കെതിരെ വിമർശനങ്ങൾ ഉയരാൻ കാരണമാകുന്നുണ്ടെന്നും ജനങ്ങളെ കൊണ്ട് നിർബന്ധിച്ച് വോട്ട് ചെയ്യിപ്പിക്കുക എന്ന പാർലമെന്റിലെ അം​ഗങ്ങളുടെ നിലപാടിനോട് താൻ യോജിക്കുന്നില്ലെന്നും ബാ​ഗേൽ പാർലമെന്റിൽ പറഞ്ഞു.

പോളിംഗ് ബൂത്തുകളിലേക്ക് ജനങ്ങളെ കൂടുതലായി കൊണ്ടുവരാൻ വേണ്ടിയാണ് കോൺ​ഗ്രസ് ബിൽ പാസാക്കാൻ ആവശ്യപ്പെടുന്നത്. ജനങ്ങൾക്കിടയിൽ പ്രധാനമന്ത്രി നരേന്ദ്രമോദി നടത്തിയ വികസനങ്ങൾ കൊണ്ടാണ് 2009 നെ അപേക്ഷിച്ച് 2014 ൽ പോളിങ് ശതമാനം വർധിക്കാൻ കാരണമെന്ന് ബാ​ഗേൽ പാർലമെന്റിൽ പറഞ്ഞു. 2004ൽ ബി എസ് റാവത്തും 2009ൽ ജെ പി അഗർവാളും വോട്ട് ചെയ്യുന്നത് കർശനമാക്കണമെന്ന ബിൽ അവതരിപ്പിച്ചെങ്കിലും പിന്നീട് പിൻവലിച്ചതായി അദ്ദേഹം കൂട്ടിച്ചേർത്തു. അതുകൊണ്ട് തന്നെ വോട്ട് ചെയ്യുന്നത് നിർബന്ധിതമാക്കുന്ന ബിൽ നടപ്പിലാക്കാൻ കഴിയില്ലെന്ന് ബാ​ഗേൽ പറഞ്ഞു.

Story highlights: Voting Bill; The Center cannot punish those who do not vote