'ഗ്രാമീണര്‍ ഓവുചാല്‍ മണ്ണിട്ട് നികത്തി'; ബെംഗളൂരു-മൈസൂരു അതിവേ​ഗപാതയിലെ വെള്ളക്കെട്ടില്‍ വിശദീകരണം

ബെം​ഗളൂരു: ബെം​ഗളൂരു-മൈസൂരു അതിവേ​ഗപാതയിലെ വെളളക്കെട്ടിന് കാരണം ​ഗ്രാമീണരാണെന്ന് കർണാടക റോഡ് ​ഗതാ​ഗത, ദേശീയപാത വകുപ്പ്. രാമന​ഗരം മേഖലയിലെ ഓവുചാൽ ​ഗ്രാമീണർ അടച്ചതാണ് വെളളക്കെട്ട് രൂപപ്പെടാൻ കാരണമായത്. മദപുരത്തേയും സമീപ ​ഗ്രാമങ്ങളിലേയും ​ഗ്രാമീണർ അതിവേ​ഗപാതയുടെ ഓവുചാൽ മണ്ണിട്ടു നികത്തിയത്. അവരുടെ ​ഗ്രാമങ്ങളിലേക്കും കൃഷിയിടത്തിലേക്കും കടക്കുന്നതിന് വേണ്ടിയാണ് മണ്ണിട്ടുനികത്തിയത്. മാർ‌ച്ച് 18 ന് മണ്ണ് നീക്കം ചെയ്തതായും ​ഗതാ​ഗത വകുപ്പ് ഇറക്കിയ പ്രസ്താവനയിൽ വ്യക്തമാക്കി.

തങ്ങളുടെ കൃഷിയിടങ്ങളിലേക്കും ഗ്രാമങ്ങളിലേക്കും പ്രവേശിക്കുന്നതിനായി മദപുരത്തേയും സമീപഗ്രാമങ്ങളിലേയും ഗ്രാമീണര്‍ അതിവേഗപാതയുടെ 42+640 ഭാഗത്തുള്ള ഓവുചാല്‍ മൂന്ന് മീറ്ററോളം വീതിയില്‍ മണ്ണിട്ടുനികത്തി എളുപ്പവഴി നിര്‍മിച്ചു. ഇതോടെ ഓവുചാലിലൂടെയുള്ള നീരൊഴുക്ക് തടസപ്പെടുകയും അതിവേഗപാതയില്‍ വെള്ളം കയറുകയും ചെയ്തു. ഗ്രാമീണര്‍ നിര്‍മിച്ച 'കുറുക്കുവഴി' മാര്‍ച്ച് 18ന് രാവിലെ തന്നെ നീക്കം ചെയ്തിട്ടുണ്ട്, കർണാടക റോഡ് ​ഗതാ​ഗത, ദേശീയപാത വകുപ്പ് ഇറക്കിയ പ്രസ്താവനയിൽ പറഞ്ഞു.

മാർച്ച് 12 ന് ആണ് 118 കിലോമീറ്റർ ദൈർഘ്യമുളള ബെം​ഗളൂരു-മൈസൂരു അതിവേ​ഗപാത ഉദ്ഘാടനം ചെയ്തത്. മാർച്ച് 18 ന് പെയ്ത മഴയിൽ പാതയിൽ വെളളം കയറുകയും ​ഗതാ​ഗതം തടസ്സപ്പെടുകയും ചെയ്തിരുന്നു. ​ഗതാ​ഗത കുരുക്കിന് പിന്നാലെ വാഹനാപകടവും ഉണ്ടായി. വെളളകെട്ടിൽ കുടുങ്ങിയ കാറിനു പിന്നാലെ മറ്റ് വാഹനങ്ങൾ വന്നിടിക്കുകയായിരുന്നു. വെളളക്കെട്ടിലൂടെ വാഹനങ്ങൾ നീങ്ങുന്ന വീഡിയോകൾ പുറത്തുവന്നിരുന്നു. തെരഞ്ഞെടുപ്പ് മുമ്പിൽ കണ്ട് ബിജെപി ധൃതിയിൽ റോഡ് ഉദ്ഘാടനം ചെയ്യുകയായിരുന്നുവെന്ന വിമർശനവുമായി പ്രതിപക്ഷം രം​ഗത്തെത്തിയിരുന്നു.

STORY HIGHLIGHTS: Transport department explains about waterlogging on Bengaluru-Mysore Expressway