'കണ്ണിനു വെറുപ്പേകുന്ന കോൺക്രീറ്റ് വസ്തു'; ദുബായ് മെട്രോയെ ശ്രദ്ധിക്കൂ, ഇന്ത്യൻ മെട്രോസ്റ്റേഷനുകളെ വിമർശിച്ച് ജെറ്റ് എയർവേസ് സിഇഒ

ന്യൂഡൽഹി: ഇന്ത്യയിലെ മെട്രോ റെയിൽവേ സ്റ്റേഷനുകളുടെ നിർമ്മാണത്തെ വിമർശിച്ച് ജെറ്റ് എയർവേസ് സിഇഒ സഞ്ജീവ് കപൂർ. ഇന്ത്യയിലേയും ദുബായിയിലേയും മെട്രോ സ്റ്റേഷനുകളെ താരതമ്യം ചെയ്തുകൊണ്ടായിരുന്നു സഞ്ജീവ് കപൂറിന്റെ വിമർശനം. ഇന്ത്യൻ മെട്രോ കലാപരമായതൊന്നുമില്ലാത്ത കണ്ണിന് വെറുപ്പേകുന്ന കോൺ​ക്രീറ്റ് വസ്തു മാത്രമാണെന്ന് കപൂർ ട്വീറ്റ് ചെയ്തു.

'ബെംഗളൂരു, ഗുരുഗ്രാം, കൊൽക്കത്ത... എന്തുകൊണ്ടാണ് നമ്മുടെ ഓവർഗ്രൗണ്ട് / ഓവർഹെഡ് മെട്രോ സ്റ്റേഷനുകൾ 'കലാപരമായതൊന്നുമില്ലാത്ത, കണ്ണിനു വെറുപ്പേകുന്ന കോൺക്രീറ്റ് വസ്തു'വായി മാറിയത്? ദുബായ് മെട്രോയെ ശ്രദ്ധിക്കൂ. 10 വർഷം മുൻപെങ്കിലുമാണ് ദുബായ് സ്റ്റേഷൻ പണിതത്,' സഞ്ജീവ് കപൂർ ട്വീറ്റ് ചെയ്തു. ബെം​ഗളൂരുവിലേയും ദുബായിയിലേയും മെട്രോ സ്റ്റേഷനുകളുടെ ചിത്രം ട്വീറ്റ് ചെയ്തുകൊണ്ടായിരുന്നു സഞ്ജീവ് കപൂറിന്റെ വിമർശനം.

ഇന്ത്യൻ മെട്രോ സ്റ്റേഷനുകളുടെ വാസ്തുവിദ്യ മോശമാണെന്നായിരുന്നു ട്വീറ്റിലൂടെ അദ്ദേഹം പ്രകടിപ്പിച്ചത്. മാർച്ച് 25ന് ബെംഗളൂരു മെട്രോയുടെ പർപ്പിൾ ലൈൻ (വൈറ്റ്ഫീൽഡ്–കെആർ പുരം മെട്രോ റൂട്ട്) പ്രധാനമന്ത്രി ഉദ്ഘാടനം ചെയ്യാനിരിക്കെയാണ് സഞ്ജീവ് കപൂറിന്റെ ട്വീറ്റ് എന്നതും ശ്രദ്ധേയമാണ്.

അതേസമയം സഞ്ജീവ് കപൂറിന്റെ ട്വീറ്റിനെ വിമർശിച്ചുകൊണ്ടും അനുകൂലിച്ചുകൊണ്ടുമുളള വാ​ദങ്ങൾ ഉയർന്നിട്ടുണ്ട്. സ്വന്തം രാജ്യത്തെ അഭിനന്ദിക്കാത്തവരുടെ പതിവ് പ്രതികരണം മാത്രമാണിതെന്ന് സഞ്ജീവ് കപൂറിനെ വിമർശിച്ചുകൊണ്ട് ചിലർ അഭിപ്രായപ്പെട്ടു. നമ്മുടെ പൊതുവായ സംവിധാനങ്ങൾ ഇക്കോഫ്രണ്ട്‌ലിയോ ചെലവു കുറഞ്ഞതോ അതിമനോഹരമോ അല്ലെന്നും പലതും പെട്ടെന്ന് കയറിച്ചെല്ലാനാകാത്ത വിധത്തിലാണ് പണിതിരിക്കുന്നതെന്നും സഞ്ജീവ് കപൂറിനെ അനുകൂലിച്ചു കൊണ്ട് ചിലർ അഭിപ്രായപ്പെട്ടു. സഞ്ജീവ് കപൂർ ട്വീറ്റ് കാണുന്നവരുടെ എണ്ണം പരിമിതപ്പെടുത്തിയിട്ടുണ്ട്.

STORY HIGHLIGHTS: Jet Airways CEO Criticizes Indian Metro Stations and Compared to Dubai Metro Stations