കോൺ​ഗ്രസ് എംഎൽഎ മനോജ് സിം​ഗ് മാണ്ഡവി ഹൃദയാഘാതത്തെ തുടർന്ന് അന്തരിച്ചു

ഛത്തീസ്​ഗഡ്: കോൺ​ഗ്രസ് എംഎൽഎയും ഛത്തീസ്​ഗഡ് നിയമസഭാ ഡെപ്യൂട്ടി സ്പീക്കറുമായ മനോജ് സിം​ഗ് മാണ്ഡവി(58) അന്തരിച്ചു. ഹൃദയാഘാതത്തെ തുടർന്നാണ് അന്ത്യം. ഹൃദയാഘാതം ഉണ്ടായതിനെ തുടർന്ന് ധംതാരിയിലുളള ആശുപത്രിയിൽ പ്രവേശിപ്പിച്ചിരുന്നു. പുലർച്ചെയോടെ മരണം സംഭവിക്കുകയായിരുന്നുവെന്ന് സംസ്ഥാന കോൺ​ഗ്രസ് വക്താവ് സുശീൽ ആനന്ദ് ശുക്ല അറിയിച്ചു.

മനോജ് സിം​ഗ് മാണ്ഡവിയുടെ വിയോ​ഗം നികത്താനാകാത്ത നഷ്ടമാണെന്ന് ഛത്തീസ്​ഗഡ് മുഖ്യമന്ത്രി ഭൂപേഷ് ബാ​ഗേൽ പറഞ്ഞു. കാൺകെർ ജില്ലയിലെ ഭാനുപ്രതാപ്പുർ മണ്ഡലത്തിൽ നിന്നുളള എംഎൽഎയാണ് മനോജ് സിം​ഗ് മാണ്ഡവി.

മനോജ് സിം​ഗ് മാണ്ഡവി മൂന്ന് തവണ എംഎൽഎ ആയിട്ടുണ്ട്. ബസ്തർ മേഖലയിൽ നിന്നുളള ആദിവാസി നേതാവ് കൂടിയായിരുന്നു മാണ്ഡവി. 2000-2003 കാലയളവിൽ അജിത് ജോഗി സർക്കാരിൽ ആഭ്യന്തര, ജയിൽ വകുപ്പ് സഹമന്ത്രിയായിരുന്നു മാണ്ഡവി. മനോജ് സിം​ഗ് മാണ്ഡവിയുടെ അന്ത്യകർമ്മങ്ങൾ കാങ്കറിലെ നതിയ നവഗാവിൽ നടക്കും.

STORY HIGHLIGHTS: Congress MLA Manoj Singh Mandavi passed away due to heart attack