'സര്‍ക്കാര്‍ അക്കൗണ്ടില്‍ പണമില്ല'; അസാം സംസ്ഥാന ചലച്ചിത്ര അവാര്‍ഡ് ജേതാക്കള്‍ക്ക് കൈമാറിയ ചെക്ക് മടങ്ങി

ഗുവഹത്തി: അസാം സംസ്ഥാന ചലച്ചിത്ര അവാർഡ് ജേതാക്കൾക്ക് നൽകിയ ചെക്കുകൾ മടങ്ങി. വെള്ളിയാഴ്ച പണമാക്കി എടുക്കാൻ ഹാജരാക്കിയപ്പോൾ ആണ് ചെക്കുകൾ മടങ്ങിയത്. എട്ട് പുരസ്‌കാര ജേതാക്കൾ ഒമ്പത് ചെക്കുകളാണ് ബാങ്കിൽ നൽകിയത്. പുരസ്‌കാര ചടങ്ങ് കഴിഞ്ഞ തിങ്കളാഴ്ചയാണ് നടന്നത്.

'ഞാൻ വെള്ളിയാഴ്ച ചെക്ക് സമർപ്പിച്ചു. പിന്നാലെ ചെക്ക് മടങ്ങിയതായി ബാങ്കിൽ നിന്നും അറിയിച്ചു. ഉടൻ തന്നെ ഞാൻ സംഘാടകരെ വിളിച്ചു, മതിയായ ബാലൻസ് ഇല്ലെന്ന് അവർ പറഞ്ഞു', അവാര്‍ഡ് ജേതാവ് അപരാജിത പൂജാരി പിടിഐയോട് വ്യക്തമാക്കി. 2018ലെ മികച്ച രചനയ്ക്കുള്ള സംസ്ഥാന പുരസ്‌കാരമാണ് പൂജാരി നേടിയത്.

അമൃത് പ്രീതം (സൗണ്ട് ഡിസൈൻ), ദേബജിത് ചാങ്‌മൈ (സൗണ്ട് മിക്‌സിംഗ്), പ്രഞ്ജൽ ദേക (സംവിധാനം), ദേബജിത് ഗയാൻ (സൗണ്ട് ഡിസൈനും മിക്‌സിംഗും), ബെഞ്ചമിൻ ഡൈമറി (അഭിനയം) തുടങ്ങിയ പ്രമുഖ സിനിമാ താരങ്ങൾക്ക് കൈമാറിയ ചെക്കുകളും മടങ്ങിയതായാണ് റിപ്പോർട്ട്. അസാം സ്റ്റേറ്റ് ഫിലിം ഫിനാൻസ് ആൻഡ് ഡെവലപ്‌മെന്റ് കോർപ്പറേഷനാണ് (എഎസ്എഫ്എഫ്ഡിസി) സംസ്ഥാന ചലച്ചിത്ര അവാർഡ് ദാന ചടങ്ങ് സംഘടിപ്പിക്കുന്നത്. ചെക്കുകളിൽ കൾച്ചറൽ അഫയേഴ്സ് ഡയറക്ടറാണ് ഒപ്പിട്ടിരിക്കുന്നത്.

സംഭവത്തിൽ ഉടൻ അന്വേഷണം നടത്താൻ സാംസ്‌കാരിക മന്ത്രി ബിമൽ ബോറ ഉദ്യോഗസ്ഥരോട് ആവശ്യപ്പെട്ടു. "സാങ്കേതിക കാരണത്താൽ ചെക്കുകൾ ബൗൺസ് ചെയ്തത്. ആദ്യ ദിവസം 18 ലക്ഷം രൂപയുടെ ചെക്കുകൾ ക്ലിയർ ചെയ്തു, എന്നാൽ രണ്ടാം ദിവസം എട്ട് പേരുടെ ഒമ്പത് ചെക്കുകൾ മടങ്ങി' എ എസ് എഫ് എഫ് ഡി സി ഔദ്യോഗികമായി അറിയിച്ചു. തകരാർ പരിഹരിച്ചതായും എട്ട് പേരെയും ചെക്ക് എട്ട് പേരോടും ചെക്ക് ശനിയാഴ്ച ബാങ്കില്‍ വീണ്ടും നല്‍കാന്‍ അറിയിച്ചതായും എഎസ്എഫ്എഫ്ഡിസി വ്യക്തമാക്കി.

Story Highlights: Cheques Given To Assam State Film Award Winners Bounced