Top

2024 ലോക്സഭാ തെരഞ്ഞെടുപ്പ്; ബിഹാറില്‍ 35 സീറ്റുകള്‍ നേടുകയാണ് ലക്ഷ്യമെന്ന് ബിജെപി

'ബിഹാറിലെ മഹാസഖ്യ സര്‍ക്കാര്‍ ജനങ്ങളെ കബളിപ്പിക്കുന്ന കൂട്ടുകെട്ടാണ്. ഇതിനെതിരെ തെരുവ് മുതല്‍ നിയമസഭ വരെ ബിജെപി പോരാടും' ബിഹാര്‍ ബിജെപി അധ്യക്ഷന്‍ ജയ്സ്വാള്‍ പറഞ്ഞു

17 Aug 2022 12:05 AM GMT
റിപ്പോർട്ടർ നെറ്റ്‌വർക്ക്

2024 ലോക്സഭാ തെരഞ്ഞെടുപ്പ്; ബിഹാറില്‍ 35 സീറ്റുകള്‍ നേടുകയാണ് ലക്ഷ്യമെന്ന് ബിജെപി
X

ന്യൂഡല്‍ഹി: നിതീഷ് കുമാറിന്റെ നേതൃത്വത്തിലുള്ള ജെഡിയു എന്‍ഡിഎ സഖ്യം വിട്ടതിന് പിന്നാലെ 2024 ലെ ലോക്സഭാ തെരഞ്ഞെടുപ്പില്‍ ബിഹാറില്‍ 35 സീറ്റുകള്‍ നേടുകയെന്ന ലക്ഷ്യവുമായി ബിജെപി. ചൊവ്വാഴ്ച ഡല്‍ഹിയിലെ പാര്‍ട്ടി ആസ്ഥാനത്ത് കേന്ദ്ര ആഭ്യന്തര മന്ത്രി അമിത് ഷായുടെയും പാര്‍ട്ടി ദേശീയ അധ്യക്ഷന്‍ ജെപി നദ്ദയുടെയും സാന്നിധ്യത്തില്‍ ബിഹാര്‍ ബിജെപി കോര്‍ കമ്മിറ്റി യോഗം ചേര്‍ന്നു.

ബിഹാര്‍ ബിജെപി സംസ്ഥാന അധ്യക്ഷന്‍ സഞ്ജയ് ജയ്സ്വാള്‍, ബിഎല്‍ സന്തോഷ്, രവിശങ്കര്‍ പ്രസാദ്, ഷഹനവാസ് ഹുസൈന്‍, മംഗള്‍ പാണ്ഡെ, ജനക് റാം, നന്ദ് കിഷോര്‍ യാദവ് തുടങ്ങിയ നേതാക്കള്‍ യോഗത്തില്‍ പങ്കെടുത്തു. 'ബിഹാറിലെ മഹാസഖ്യ സര്‍ക്കാര്‍ ജനങ്ങളെ കബളിപ്പിക്കുന്ന കൂട്ടുകെട്ടാണ്. ഇതിനെതിരെ തെരുവ് മുതല്‍ നിയമസഭ വരെ ബിജെപി പോരാടും'. 2024ലെ ലോക്സഭാ തെരഞ്ഞെടുപ്പില്‍ 35 സീറ്റുകള്‍ നേടാനാണ് പാര്‍ട്ടി ലക്ഷ്യമിടുന്നതെന്നും യോഗത്തിന് ശേഷം ബിഹാര്‍ ബിജെപി അധ്യക്ഷന്‍ ജയ്സ്വാള്‍ പറഞ്ഞു.

'ബിഹാര്‍ കോര്‍ കമ്മിറ്റി യോഗം ഇന്ന് പാര്‍ട്ടി അധ്യക്ഷന്‍ ജെ പി നദ്ദ ജിയുടെയും കേന്ദ്ര ആഭ്യന്തര മന്ത്രി അമിത് ഷാ ജിയുടെയും സാന്നിധ്യത്തില്‍ നടന്നു. എല്ലാ വിഷയങ്ങളിലും വളരെ സമഗ്രവും വിശദവുമായ ചര്‍ച്ച നടന്നിട്ടുണ്ട്. മഹാസഖ്യം ജനങ്ങളെ വഞ്ചിക്കുകയാണെന്ന് എല്ലാവര്‍ക്കും അറിയാം. ഇത് ലാലു രാജ് പുനഃസ്ഥാപിക്കാന്‍ ശ്രമിക്കുന്ന ഒരു പിന്‍വാതില്‍ സഖ്യമാണെന്നും' ജയ്‌സ്വാള്‍ കൂട്ടിച്ചേര്‍ത്തു.

ബിഹാറില്‍ 40 ലോക്സഭാ സീറ്റുകളാണുള്ളത്. അതില്‍ ബിജെപിക്ക് 17ഉം ജെഡിയുവിന് 16 സീറ്റുകളുമാണ് ഉള്ളത്. കൂടാതെ ലോക് ജനശക്തി പാര്‍ട്ടിക്ക് ആറ് സീറ്റും കോണ്‍ഗ്രസിന് ഒരു സീറ്റുമാണുള്ളത്.

Story highlights: 2024 Lok Sabha Elections; BJP aims to win 35 seats in Bihar

Next Story