'നീരവ് മോദിയെപ്പോലെ രാജ്യംവിടും'; രാജ് കുന്ദ്രയുടെ ജാമ്യാപേക്ഷയെ എതിർത്ത് മുംബെെ പൊലീസ്

നീലച്ചിത്രനിര്‍മ്മാണത്തില്‍ അറസ്റ്റിനെതിരെ നടി ശില്പ്പ ഷെട്ടിയുടെ ഭര്‍ത്താവും വ്യവസായിയുമായ രാജ് കുന്ദ്രയ്ക്ക് ജാമ്യം നൽകരുത് എന്ന് മുംബൈ പൊലീസ്. രാജ് കുന്ദ്രയ്ക്ക് ജാമ്യം ലഭിച്ചാൽ നീരവ് മോദിയെപ്പോലെ രാജ്യം വിട്ടേക്കുമെന്നാണ് മുംബൈ പൊലീസ് പറയുന്നത്. കുന്ദ്രയുടെ ജാമ്യാപേക്ഷയെ കോടതിയിൽ എതിർത്ത് കൊണ്ടായിരുന്നു പൊലീസിന്റെ പ്രസ്താവന.

രാജ് കുന്ദ്രയ്ക്ക് ജാമ്യം നൽകുന്നത് തെറ്റായ സന്ദേശം നൽകുമെന്നും ജാമ്യം ലഭിച്ചാൽ കുറ്റം വീണ്ടും ചെയ്തേക്കുമെന്നും പോലീസ് കോടതിയെ അറിയിച്ചു. കോടതി കേസ് ഓഗസ്റ്റ് 20-ന് പരിഗണിക്കും.

തന്റെ പേര് ഏപ്രിലിൽ ഫയൽചെയ്ത എഫ്ഐആറിൽ ഇല്ലെന്നാണ് രാജ് കുന്ദ്രയുടെ വാദം. കുറ്റപത്രത്തിൽ പേരുള്ള എല്ലാവരും തന്നെ ഇപ്പോൾ ജാമ്യംനേടി പുറത്തുനടക്കുകയാണെന്നും കുന്ദ്ര കോടതിയിൽ നൽകിയ ജാമ്യാപേക്ഷയിൽ പറയുന്നു. ഇതിനു മറുപടിയായി രാജ് കുന്ദ്രയുടേത് ഗുരുതര സ്വഭാവമുള്ള കുറ്റകൃത്യമാണെന്നും എല്ലാ വീഡിയോകളും അപ്‌ലോഡ് ചെയ്തിട്ടുണ്ടോയെന്ന് പരിശോധിക്കുകയാണെന്നും പൊലീസ് അറിയിച്ചു. നേരത്തെ മജിസ്‌ട്രേറ്റ് കോടതി രാജ് കുന്ദ്രയുടെ ജാമ്യപേക്ഷ തള്ളിക്കളഞ്ഞിരുന്നു.