Top

സിൽവർലെെൻ ഡിപിആറിന് കേന്ദ്രാനുമതി തേടി വീണ്ടും സംസ്ഥാന സർക്കാർ; കത്തയച്ചത് തൃക്കാക്കര വോട്ടെടുപ്പിന് ഒരാഴ്ച മുമ്പ്

7 Jun 2022 2:55 AM GMT
റിപ്പോർട്ടർ നെറ്റ്‌വർക്ക്

സിൽവർലെെൻ ഡിപിആറിന് കേന്ദ്രാനുമതി തേടി വീണ്ടും സംസ്ഥാന സർക്കാർ; കത്തയച്ചത് തൃക്കാക്കര വോട്ടെടുപ്പിന് ഒരാഴ്ച മുമ്പ്
X

തിരുവനന്തപുരം: സിൽവർലെെൻ പദ്ധതിയിൽ കേന്ദ്രാനുമതി തേടി വീണ്ടും സംസ്ഥാന സർക്കാർ. പദ്ധതിയുടെ ഡിപിആർ സമർപ്പിച്ച് രണ്ട് വർഷം പിന്നിടുന്ന സാഹചര്യത്തിൽ അനുമതി വേഗത്തിലാക്കണമെന്ന് ആവശ്യപ്പെട്ടാണ് ചീഫ് സെക്രട്ടറി റെയിൽവേ ബോർഡ് ചെയർമാന് കത്തെഴുതിയത്. സംയുക്ത സർവ്വേ നന്നായി മുന്നേറിയെന്നതടക്കം കാണിച്ചാണ് കേന്ദ്രാനുമതി വേഗത്തിലാക്കാനുള്ള കേരളത്തിൻറെ ശ്രമം.

2020 ജൂൺ 17 നാണ് ഡിപിആർ സമർപ്പിച്ചത്. ഡിപിആറിന് അനുമതി തേടി കഴിഞ്ഞ മാർച്ചിൽ മുഖ്യമന്ത്രി പിണറായി വിജയൻ പ്രധാനമന്ത്രി നരേന്ദ്ര മോദിയെ കണ്ടിരുന്നു. അനുകൂല പ്രതികരണമാണെന്നു മുഖ്യമന്ത്രി അവകാശപ്പെട്ടെങ്കിലും നടപടികളുണ്ടായില്ല. തൃക്കാക്കര വോട്ടെടുപ്പിന് ഒരാഴ്ച മുൻപാണു ചീഫ് സെക്രട്ടറി കത്തയച്ചത്. ബോർഡ് നിർദേശിച്ച നടപടിക്രമങ്ങളുടെ തൽസ്ഥിതി വിവരിച്ചും സംയുക്ത സർവേ പൂർത്തിയാകുന്ന മുറയ്ക്ക് അനുമതി നൽകണമെന്ന് ആവശ്യപ്പെട്ടുമാണു കത്ത്. എന്നാൽ കത്തിന് കേന്ദ്രം ഇതുവരെ മറുപടി നൽകിയിട്ടില്ല. കേന്ദ്ര നിലപാട് അറിഞ്ഞതിന് ശേഷം തുടർനടപടി സ്വീകരിക്കാമെന്നാണ് സംസ്ഥാനത്തിൻറെ നീക്കം.

കഴിഞ്ഞ ഡിസംബറിൽ റെയിൽവേ ബോർഡുമായി ചീഫ് സെക്രട്ടറി ഉൾപ്പെടെയുള്ളവർ നടത്തിയ ചർച്ചയിൽ, റെയിൽവേ ഭൂമി സംബന്ധിച്ച സംശയങ്ങളുന്നയിച്ചാണ് കേന്ദ്രം ഡിപിആർ മാറ്റിവച്ചത്. അലൈൻമെന്റിൽ ഉൾപ്പെടുന്ന റെയിൽവേ ഭൂമി സംബന്ധിച്ച കൂടുതൽ സാങ്കേതിക രേഖകൾ ബോർഡ് ആവശ്യപ്പെട്ടു. ദക്ഷിണ റെയിൽവേയുമായി ചേർന്നു സംയുക്ത സർവേ നടത്താനും നിർദേശിച്ചിരുന്നു. ഈ സർവേയുടെ ടെൻഡർ നടപടികൾ കെ–റെയിൽ പൂർത്തീകരിച്ച സാഹചര്യത്തിലാണ് അനുമതി തേടി വീണ്ടും കേന്ദ്രത്തെ സമീപിച്ചത്.

അതേസമയം ഡിപിആർ അപൂർണമാണെന്നന് കാണിച്ച് കേന്ദ്രം ഹൈക്കോടതിയെ സമീപിച്ചിരുന്നു. സിൽവർലൈനിനായി നടക്കുന്ന സർവേയും കല്ലിടലും റെയിൽവേ മന്ത്രാലയത്തിന്റെ അറിവോടെയോ സമ്മതത്തോടെയോ അല്ലെന്നാണ് കേന്ദ്ര സർക്കാർ ഹൈക്കോടതിയെ അറിയിച്ചത്. സമഗ്രമായ ഡിപിആർ തയാറാക്കുന്നതിനായാണ് തത്വത്തിലുള്ള അനുമതി കൊടുത്തിരിക്കുന്നത്. അതിനപ്പുറമുള്ള നടപടികൾക്കായല്ല അനുമതിയെന്നും കേന്ദ്രം വ്യക്തമാക്കിയിരുന്നു.

STORY HIGHLIGHTS: State government seeks central approval for Silver Line project

Next Story