Top

'ഹൈക്കോടതി വിധിയെ മാനിക്കുന്നു'; നിയമവിദഗ്ധരുമായി ആലോചിച്ച് തുടര്‍നടപടിയെന്ന് പ്രിയ വര്‍ഗീസ്

അസോ.പ്രൊഫസര്‍ നിയമനത്തിന് വേണ്ടത് 8 വര്‍ഷത്തെ അധ്യാപന പരിചയമാണ്. ക്ലാസില്‍ പോയി പഠിപ്പിച്ച് പരിചയം വേണം. നല്ല അധ്യാപകന്‍ മെഴുകുതിരികളാണ്. മറ്റുള്ളവര്‍ക്കായി പ്രകാശം പരത്തി എരിഞ്ഞുതീരണമെന്നും ഹൈക്കോടതി വ്യക്തമാക്കി. മുഖ്യമന്ത്രിയുടെ പ്രൈവറ്റ് സെക്രട്ടറിയും മുന്‍ രാജ്യസഭാ എംപിയുമായ കെകെ രാഗേഷിന്റെ ഭാര്യയാണ് പ്രിയ വര്‍ഗീസ്.

17 Nov 2022 11:29 AM GMT
റിപ്പോർട്ടർ നെറ്റ്‌വർക്ക്

ഹൈക്കോടതി വിധിയെ മാനിക്കുന്നു; നിയമവിദഗ്ധരുമായി ആലോചിച്ച് തുടര്‍നടപടിയെന്ന് പ്രിയ വര്‍ഗീസ്
X

തിരുവനന്തപുരം: കണ്ണൂര്‍ സര്‍വ്വകലാശാല അസോസിയേറ്റ് പ്രൊഫസര്‍ നിയമന പട്ടിക റദ്ദാക്കിയ ഹൈക്കോടതി വിധിയെ മാനിക്കുന്നുവെന്ന് പ്രിയ വര്‍ഗീസ്. നിയമവിദഗ്ധരുമായി ആലോചിച്ച് തുടര്‍നടപടികള്‍ തീരുമാനിക്കുമെന്നും പ്രിയ തിരുവനന്തപുരത്ത് മാധ്യമങ്ങളോട് പറഞ്ഞു. കൂടുതല്‍ പ്രതികരിക്കാന്‍ പ്രിയ വര്‍ഗീസ് തയ്യാറായില്ല. മാധ്യമങ്ങളോടുള്ള പ്രതികരണം ചുരുക്കി തിരിഞ്ഞു നടക്കുകയായിരുന്നു.

'കോടതി വിധിയെ ഞാന്‍ മാനിക്കുന്നു. നിയമവിദഗ്ധരുമായി ആലോചിച്ച് തുടര്‍നടപടികള്‍ തീരുമാനിക്കും. എന്നാണ് പ്രിയ വര്‍ഗീസിന്റെ പ്രതികരണം.

യുജിസി മാനദണ്ഡം അംഗീകരിച്ചുകൊണ്ടാണ് ഹൈക്കോടതി നിയമനം റദ്ദാക്കിയത്. ഡോ. ജോസഫ് സ്‌കറിയയുടെ ഹര്‍ജി ഹൈക്കോടതി അംഗീകരിച്ചു. അസോസിയേറ്റ് പ്രൊഫസറായി പ്രിയ വര്‍ഗീസിനെ പരിഗണിക്കാനാവില്ലെന്ന് ഹൈക്കോടതി വ്യക്തമാക്കി.

പ്രിയ വര്‍ഗീസിന് യഥാര്‍ത്ഥ അധ്യാപന പരിചയമില്ലെന്ന് ഹൈക്കോടതി നിരീക്ഷിച്ചു. യുജിസിയുടെ നിബന്ധനകള്‍ക്കപ്പുറം പോകാന്‍ കോടതിക്ക് കഴിയില്ല. യുജിസി റെഗുലേഷന്‍ ആണ് പ്രധാനം എന്ന് സുപ്രീംകോടതി പറഞ്ഞിട്ടുണ്ടെന്നും കോടതി ചൂണ്ടികാട്ടി. മറ്റിടങ്ങളിലെ പ്രവര്‍ത്തി പരിചയം അധ്യാപന പരിചയമായി കണക്കാക്കാനാവില്ല. എന്‍എസ്എസ് കോഡിനേറ്റര്‍ പദവിയും ഗവേഷണ കാലയളവും അധ്യാപന പരിചയമായി കണക്കാക്കില്ല. സമൂഹിക സേവനത്തില്‍ പരിചയമുണ്ടാക്കലാണ് എന്‍എസ്എസിന്റെ ഉത്തരവാദിത്തം. ഭാഷാ ഇന്‍സ്റ്റിറ്റ്യൂട്ടിലെ ഡെപ്യൂട്ടേഷനും അധ്യാപന പരിചയനല്ലെന്നും ഹൈക്കോടതി. എന്‍എസ്എസ് കോര്‍ഡിനേറ്റര്‍ കാലയളവില്‍ അധ്യാപന പരിചയമുണ്ടെന്ന് കാണിക്കാന്‍ രേഖകളില്ലെന്നും ഹൈക്കോടതി പറഞ്ഞു.

അസോ.പ്രൊഫസര്‍ നിയമനത്തിന് വേണ്ടത് 8 വര്‍ഷത്തെ അധ്യാപന പരിചയമാണ്. ക്ലാസില്‍ പോയി പഠിപ്പിച്ച് പരിചയം വേണം. നല്ല അധ്യാപകന്‍ മെഴുകുതിരികളാണ്. മറ്റുള്ളവര്‍ക്കായി പ്രകാശം പരത്തി എരിഞ്ഞുതീരണമെന്നും ഹൈക്കോടതി വ്യക്തമാക്കി. മുഖ്യമന്ത്രിയുടെ പ്രൈവറ്റ് സെക്രട്ടറിയും മുന്‍ രാജ്യസഭാ എംപിയുമായ കെകെ രാഗേഷിന്റെ ഭാര്യയാണ് പ്രിയ വര്‍ഗീസ്.

പ്രിയ വര്‍ഗീസിന്റെ വാദങ്ങളെ സാധൂകരിക്കാനാവില്ല. നിരവധി പേര്‍ കക്ഷി ചേര്‍ന്ന കേസില്‍ പ്രിയയുടെ നിയമനം ചോദ്യം ചെയ്തുള്ള രണ്ടാം റാങ്കുകാരനായ പ്രൊഫസര്‍ ജോസഫ് സ്‌കറിയയുടെ ഹര്‍ജി നിലനില്‍ക്കില്ലെന്ന വാദം ഉന്നയിച്ചത് പ്രിയയുടെ അഭിഭാഷകന്‍ മാത്രമാണെന്നും സര്‍വ്വകലാശാല രജിസ്ട്രാര്‍ പോലും ആ വാദം ഉന്നയിച്ചിട്ടില്ലെന്നും കോടതി നിരീക്ഷിച്ചു.

മാനദണ്ഡങ്ങള്‍ പാലിച്ചല്ല പ്രിയ വര്‍ഗീസിന്റെ നിയമനം എന്ന് കാണിച്ചാണ് ഹര്‍ജി. പ്രിയാ വര്‍ഗീസിനെ നിയമനപട്ടികയില്‍ നിന്നും ഒഴിവാക്കണമെന്ന് ആവശ്യപ്പെട്ട് നിയമന പട്ടികയില്‍ രണ്ടാമതുള്ള ഡോ. ജോസഫ് സ്‌കറിയയാണ് ഹര്‍ജി നല്‍കിയത്. ഹര്‍ജിയില്‍ പ്രിയാ വര്‍ഗീസിന്റെ നിയമനം നേരത്തെ കോടതി സ്റ്റേ ചെയ്തിരുന്നു. നിയമന ശുപാര്‍ശ നല്‍കിയത് ചട്ടങ്ങള്‍ മറികടന്നാണെന്നും പിഎച്ച്ഡി കാലയളവ് അധ്യാപന പരിചയമായി കണക്കാക്കാനാകില്ലെന്നുമാണ് യുജിസിയുടെ വാദം. അസോസിയേറ്റ് പ്രൊഫസറാകാനുള്ള യോഗ്യതയുണ്ടെന്ന് പ്രിയയും വാദിച്ചിരുന്നു. രണ്ട് ദിവസത്തെ വാദം കേട്ടതിന് ശേഷമാണ് കേസില്‍ ഹൈക്കോടതി വിധി പറയുന്നത്.

Next Story