Top

ഫിനഹാസ് റമ്പാന്‍ അന്തരിച്ചു

6 July 2022 1:43 AM GMT
റിപ്പോർട്ടർ നെറ്റ്‌വർക്ക്

ഫിനഹാസ് റമ്പാന്‍ അന്തരിച്ചു
X

എറണാകുളം: അന്ത്യോഖ്യാ സിംഹാസനത്തിന് കീഴിലുള്ള മലേക്കുരിശ് ദയറായില്‍ താപസ ജീവിതം നയിച്ചിരുന്ന ഫിനഹാസ് റമ്പാന്‍ അന്തരിച്ചു. വാര്‍ധക്യ സഹജമായ അസുഖത്തെ തുടര്‍ന്നായിരുന്നു അന്ത്യം. മലേക്കുരിശ് ദയറാധിപന്‍ കുര്യാക്കോസ് മോര്‍ ദിയസ്‌കോറോസ് അന്ത്യശുശ്രൂഷകള്‍ നല്‍കി. ചൊവ്വാഴ്ച മലേക്കുരിശ് ദയറാ പള്ളിയില്‍ മൃതദേഹം പൊതുദര്‍ശനത്തിന് വച്ചു. ബുധനാഴ്ച രാവിലെ ഏഴിന് കുര്‍ബാനയോടെ പൊതുദര്‍ശനത്തിന് വയ്ക്കും.

വൈകീട്ട് നാലിന് ശ്രേഷ്ഠ ബസേലിയോസ് തോമസ് പ്രഥമന്‍ കാതോലിക്കാ ബാവയുടെ പ്രധാന കാര്‍മ്മികത്വത്തില്‍ സംസ്‌കാര ശുശ്രൂഷകള്‍ ആരംഭിക്കും. ദയറായില്‍ പ്രത്യേകം തയാറാക്കിയ കല്ലറയില്‍ ഭൗതിക ശരീരം സംസ്‌കരിക്കും.1934ല്‍ ചെറായി വാഴപ്പിള്ളില്‍ പത്രോസ് കോര്‍-എപ്പികോപ്പയുടെയും മണര്‍കാട് മാന്താറ്റില്‍ മറിയത്തിന്റെയും മകനായി ജനിച്ചു. ജോസഫ് എന്നായിരുന്നു അദ്ദേഹത്തിന്റെ പേര്. തപാല്‍ വകുപ്പ് ഉദ്യോഗസ്ഥനായിരുന്ന അദ്ദേഹം മൂവാറ്റുപുഴയിലാണ് ഔദ്യോഗിക ജീവിതം ആരംഭിച്ചത്.

പൗലോസ് മോര്‍ പീലക്‌സിനോസിന്റെ(പിന്നീട് കാതോലിക്ക ബാവ) അരമനയില്‍ സുറിയാനി പഠനം. 1967ല്‍ തിരുവനന്തപുരത്ത് ജോലി ചെയ്തിരുന്ന സമയത്താണ് സന്യാസ ജീവിതം തെരഞ്ഞെടുത്തത്. മുവാറ്റുപുഴ അരമനയിലും പിറമാടം ദയറിലും മഞ്ഞിനിക്കര ദയറയിലും കഴിഞ്ഞു. 1976ല്‍ മലേകുരിശിലെത്തി. പൗരസ്ത്യ കാതോലിക്ക ശ്രേഷ്ഠ ബസേലിയോസ് പൗലോസ് രണ്ടാമന്‍ ബാവ നിര്‍ബന്ധിച്ചിട്ടും പൗരോഹിത്യം സ്വീകരിക്കാന്‍ അദ്ദേഹം വിസമ്മതിച്ചു. ദയറിയില്‍ അധ്യാപകനായി തുടര്‍ന്നു.

2006 ഒക്ടോബര്‍ 21ന് കുര്യാക്കോസ് മോര്‍ ദിയസ്‌കോറോസ് മലേകുരിശ് ദയറായില്‍ വച്ച് പൂര്‍ണ ശെമ്മാശ പട്ടവും 28ന് വൈദിക പട്ടവും നല്‍കി. ഇതേ വര്‍ഷം നവംബര്‍ 2ന് റമ്പാന്‍ സ്ഥാനവും നല്‍കി. ചിട്ടയായ ജീവിതം നയിച്ചു. ഒരു നേരം ഭക്ഷണം. ദയറായിലെ പരിശുദ്ധ പിതാക്കന്‍മാരുടെ തിരുശേഷിപ്പുകള്‍ സൂക്ഷിച്ചിട്ടുള്ള മുറിയില്‍ തറയിലാണ് അദ്ദേഹം ഉറങ്ങിയിരുന്നത്. സുറിയാനിയിലും ഇംഗ്ലീഷിലും സംസ്‌കൃതത്തിലും റമ്പാന് പാണ്ഡിത്യമുണ്ടായിരുന്നു. മാതൃകാപരമായ ജീവിതത്തിന് പരിശുദ്ധ ഇഗ്നാത്തിയോസ് സഖാ ഒന്നാമന്‍ പാത്രിയര്‍ക്കീസ് ബാവ 2010 സെപ്റ്റംബര്‍ 22ന് ഇദ്ദേഹത്തിന് ദയറോ നാശീഹോ ശീര്‍ഷകം നല്‍കി ആദരിച്ചു. വത്സ ഫിലിപ്പ്, നാന്‍സി ഔസേഫി, പരേതരായ പൗലോസ്, ജോര്‍ജ് ഏലിയാസ്, സാറാമ്മ എന്നിവര്‍ സോഹദരങ്ങളാണ്.

Next Story