Top

ഒരു കിലോയിലേറെ സ്വര്‍ണവുമായി യാത്രക്കാരന്‍ പിടിയില്‍; കരിപ്പൂരിലെ ഈ വര്‍ഷത്തെ ആദ്യ കേസ്

രഹസ്യവിവരത്തിന്റെ അടിസ്ഥാനത്തിലാണ് പൊലീസ് കസ്റ്റഡിയില്‍ എടുക്കുന്നത്

4 Jan 2023 7:38 AM GMT
റിപ്പോർട്ടർ നെറ്റ്‌വർക്ക്

ഒരു കിലോയിലേറെ സ്വര്‍ണവുമായി യാത്രക്കാരന്‍ പിടിയില്‍; കരിപ്പൂരിലെ ഈ വര്‍ഷത്തെ ആദ്യ കേസ്
X

മലപ്പുറം: കരിപ്പൂര്‍ വിമാനത്താവളം വഴി സ്വര്‍ണം കടത്തിയ യുവാവ് പിടിയില്‍. ഒരു കിലോയിലേറെ സ്വര്‍ണവുമായാണ് മലപ്പുറം കരുവാരക്കുണ്ട് സ്വദേശി മുനീഷ്(32) പൊലീസ് പിടിയിലായത്. നാല് ക്യാപ്സ്യൂളുകളാക്കി ശരീരത്തിനുള്ളില്‍ ഒളിപ്പിച്ചാണ് ഇയാള്‍ 1.162 കിലോ സ്വര്‍ണം കടത്തിയതെന്ന് പൊലീസ് പറഞ്ഞു. പിടിച്ചെടുത്ത സ്വര്‍ണത്തിന് വിപണിയില്‍ 63 ലക്ഷം രൂപ വിലവരുമെന്നും പൊലീസ് വ്യക്തമാക്കി.

ബുധനാഴ്ച്ച വൈകിട്ട് ജിദ്ദയില്‍ നിന്നുള്ള എയര്‍ ഇന്ത്യ എക്സ്പ്രസ് വിമാനത്തിലാണ് മുനീഷ് കരിപ്പൂരിലെത്തിയത്. കസ്റ്റംസ് പരിശോധന കഴിഞ്ഞ് പുറത്തിറങ്ങിയ ഇയാളെ രഹസ്യവിവരത്തിന്റെ അടിസ്ഥാനത്തിലാണ് പൊലീസ് കസ്റ്റഡിയില്‍ എടുക്കുന്നത്. എന്നാല്‍ ചോദ്യം ചെയ്യലില്‍ സ്വര്‍ണം കടത്തിയിട്ടില്ലെന്നായിരുന്നു ഇയാളുടെ മറുപടി.

തുടര്‍ന്ന് നടത്തിയ എക്സറേ പരിശോധനയിലാണ് നാല് കാപ്സ്യൂളുകളാക്കി സ്വര്‍ണമിശ്രിതം ശരീരത്തിനുള്ളില്‍ ഒളിപ്പിച്ചതായി കണ്ടെത്തിയത്. കരിപ്പൂരില്‍ നിന്ന് ഈ വര്‍ഷം പൊലീസ് പിടികൂടുന്ന ആദ്യ സ്വര്‍ണക്കടത്താണിത്. കഴിഞ്ഞവര്‍ഷം ഇവിടെ 90 സ്വര്‍ണക്കടത്തു കേസുകളാണ് പൊലീസ് രജിസ്റ്റര്‍ ചെയ്തത്. 4 കിലോ സ്വര്‍ണവും പിടിച്ചെടുത്തിരുന്നു.

Story Highlights: One Kilogram Of Gold Seized In Karipur Airport

Next Story