'കെകെ രമയുടെ കൈക്ക് പരുക്ക് ഉണ്ടോ ഇല്ലയോ എന്ന കാര്യം അറിയില്ല'; അതില്‍ പാര്‍ട്ടി ഇടപെടേണ്ട കാര്യമില്ലെന്ന് എം വി ഗോവിന്ദന്‍

തിരുവനന്തപുരം: കെകെ രമയുടെ പരാതിയില്‍ കേസെടുക്കുന്ന കാര്യം തീരുമാനിക്കേണ്ടത് പൊലീസാണെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദന്‍. രമയുടെ കൈക്ക് പരുക്ക് ഉണ്ടോ ഇല്ലയോ എന്ന കാര്യം അറിയില്ലെന്നും അതില്‍ പാര്‍ട്ടി ഇടപെടേണ്ട കാര്യമില്ലെന്നും അദ്ദേഹം പറഞ്ഞു.

കെകെ രമ എംഎല്‍എയുടെ പരിക്കില്ലാത്ത കൈക്കാണ് പ്ലാസ്റ്റര്‍ ഇട്ടതെന്ന് എംവി ഗോവിന്ദന്‍ പറഞ്ഞിരുന്നു. പ്രതിപക്ഷം നിയമസഭയില്‍ കോപ്രായം കാണിക്കുകയാണ്. പിണറായിയെ പ്രതിപക്ഷം വ്യക്തിപരമായി ആക്രമിക്കുന്നുവെന്നും എം വി ഗോവിന്ദന്‍ ആരോപിച്ചിരുന്നു. ജനകീയ പ്രതിരോധ ജാഥയുടെ സമാപനസമ്മേളനത്തിലാണ് എം വി ഗോവിന്ദന്റെ പ്രതികരണം.

മൂന്നാം തവണയും എല്‍ഡിഎഫ് അധികാരത്തില്‍ വരാതിരിക്കാന്‍ വേണ്ടിയാണ് യുഡിഎഫ് വികസന പ്രവര്‍ത്തനങ്ങളെയെല്ലാം തടയുന്നത്. ഇടത് സര്‍ക്കാരിനെതിരെ ചരിത്രത്തിലില്ലാത്ത കടന്നാക്രമണമാണ് കേന്ദ്ര ഏജന്‍സികളും വര്‍?ഗീയ ശക്തികളും നടത്തുന്നത്. വലിയൊരു വിഭാ?ഗം മാധ്യമങ്ങളും അവര്‍ക്കൊപ്പമുണ്ട്. പക്ഷെ ജനങ്ങള്‍ അത് തിരിച്ചറിഞ്ഞിരിക്കുന്നുവെന്നും എം വി ഗോവിന്ദന്‍ പറഞ്ഞു.

കേരളം ദത്തെടുത്തത് അംബാനിയേയൊ അദാനിയേയൊ അല്ല ദരിദ്ര കുടുംബങ്ങളെയാണ്. വീട്ടമ്മമാര്‍ക്കുളള പെന്‍ഷന്‍ പദ്ധതി ഉടന്‍ നടപ്പാക്കും. സാമ്പത്തിക പ്രതിസന്ധി കാരണമാണ് പദ്ധതി നടപ്പിലാക്കാന്‍ സാധിക്കാതിരുന്നത്. പെന്‍ഷന്റെ പണമല്ല പ്രശ്‌നം, അംഗീകാരമാണ്. മൂന്നുവര്‍ഷം കൊണ്ട് അതിദരിദ്രര്‍ ഇല്ലാത്ത സംസ്ഥാനമാക്കി മാറ്റുമെന്നും അദ്ദേഹം പറഞ്ഞു. ജാഥയ്ക്ക് എതിരായ വിമര്‍ശനങ്ങള്‍ മൈന്‍ഡ് ചെയ്തിട്ടില്ല. ജനങ്ങള്‍ക്ക് ഒപ്പം നിന്ന് മുന്നോട്ടു പോയി. ജനങ്ങളും മൈന്‍ഡ് ചെയ്തിട്ടില്ല. മൈന്‍ഡ് ചെയ്തിരുന്നെങ്കില്‍ അവര്‍ വരുമോ എന്നും എം വി ഗോവിന്ദന്‍ ചോദിച്ചു.

Story Highlights: mv govindan about kk rema