Top

മധു വധക്കേസ്: കൂറുമാറിയ വനംവകുപ്പ് ജീവനക്കാരനെ പിരിച്ചുവിട്ടു

കേസില്‍ 32 മുതല്‍ 34 വരെയുള്ള സാക്ഷികളെ നാളെ വിസ്തരിക്കും.

14 Sep 2022 11:44 AM GMT
റിപ്പോർട്ടർ നെറ്റ്‌വർക്ക്

മധു വധക്കേസ്: കൂറുമാറിയ വനംവകുപ്പ് ജീവനക്കാരനെ പിരിച്ചുവിട്ടു
X

അട്ടപ്പാടി മധു വധക്കേസില്‍ കൂറുമാറിയ ഒരു വനം വകുപ്പ് വാച്ചറെ കൂടി പിരിച്ചുവിട്ടു. 29-ാം സാക്ഷിയായിരുന്നു സുനില്‍ കുമാറിനെയാണ് വനം വകുപ്പ് പിരിച്ചുവിട്ടത്. ഇതോടെ കൂറുമാറിയതിനെ തുടര്‍ന്ന് പിരിച്ചു വിടുന്ന താത്കാലിക വാച്ചര്‍മാരുടെ എണ്ണം നാലായി.

30-ാം സാക്ഷി താജുദ്ധീന്‍ മരണപ്പെട്ടതോടെ രണ്ട് പേരെയാണ് വിചാരണ കോടതി ഇന്ന് വിസ്തരിച്ചത്. രണ്ടു പേരും കൂറുമാറുകയായിരുന്നു. ഇതോടെ കേസില്‍ കൂറുമാറിയവരുടെ എണ്ണം 16 ആയി. വിസ്തരാണത്തിനിടെ സ്വന്തം ഫോട്ടോ തിരിച്ചറിയാന്‍ കഴിയാത്തതിനാല്‍ വനം വകുപ്പ് വാച്ചറായ 29-ാം സാക്ഷി സുനില്‍കുമാറിന്റെ കാഴ്ച പരിശോധിക്കാന്‍ കോടതി നിര്‍ദേശിച്ചു. ഇതെ തുടര്‍ന്ന് ഇയാളെ പാലക്കാട് ജില്ലാ ആശുപത്രിയില്‍ കാഴ്ച പരിശോധനയ്ക്ക് വിധേയനാക്കുകയും ചെയ്തിരുന്നു.

കേസുമായി ബന്ധപ്പെട്ട ഒന്നും അറിയില്ലെന്നും പൊലീസിന് മൊഴി നല്‍കിയിട്ടില്ലെന്നുമാണ് 31-ാം സാക്ഷി ദീപു കോടതിയില്‍ പറഞ്ഞത്. എന്നാല്‍ ഇയാളെ പ്രതികള്‍ നിരന്തരം ഫോണിലൂടെ ബന്ധപ്പെട്ടതിന്റെ തെളിവുകള്‍ കോടതിയില്‍ ഹാജരാക്കിയിരുന്നതായും, പ്രതികള്‍ സാക്ഷികളെ ഇപ്പോളും സ്വാധീനിക്കുകയാണെന്നും സ്‌പെഷ്യല്‍ പബ്ലിക്ക് പ്രോസിക്യൂട്ടര്‍ പറഞ്ഞു.

കേസില്‍ 32 മുതല്‍ 34 വരെയുള്ള സാക്ഷികളെ നാളെ വിസ്തരിക്കും.

Next Story