ഗവർണർക്കെതിരെ രാജ്ഭവന് മുമ്പിൽ ഇടതുമുന്നണി ധർണ; മുഖ്യമന്ത്രി പങ്കെടുക്കും

തിരുവനന്തപുരം: ​ഗവർണർക്കെതിരെ പോരാടാനുറച്ച് ഇടതുമുന്നണി. നവംബർ 15ന് രാജ്ഭവന് മുമ്പിൽ ധർണ്ണ നടത്തും. ​ധർണയിൽ മുഖ്യമന്ത്രി പിണറായി വിജയനും പങ്കെടുക്കും. ഗവർണറുമായി വിട്ടുവീഴ്ചക്ക് തയ്യാറല്ലെന്ന് നേതൃത്വം വാർത്താ സമ്മേളനത്തിൽ അറിയിച്ചു. മുഖ്യമന്ത്രി പിണറായി വിജയൻ, സിപിഐഎം സംസ്ഥാന സെക്രട്ടറി എംവി ​ഗോവിന്ദൻ, സിപിഐ സംസ്ഥാന സെക്രട്ടറി കാനം രാജേന്ദ്രൻ എന്നിവർ പങ്കെടുത്ത ഇടതുമുന്നണി യോ​ഗത്തിലാണ് തീരുമാനം.

ജില്ലാ തലങ്ങളിലും ധർണ്ണ സംഘടിപ്പിക്കാനാണ് തീരുമാനമുണ്ട്. ബിജെപിയുടെ അജണ്ട നടപ്പിലാക്കാൻ ഗവർണർ ശ്രമിക്കുന്നുണ്ടെന്ന വിമർശനം ശക്തമാക്കാനാണ് എൽഡിഎഫ് ലക്ഷ്യമിടുന്നത്. താൻ ആർഎസ്എസ് അനുഭാവിയാണെന്ന് ​ഗവർണർ സ്വയം പ്രഖ്യാപിക്കുകയാണെന്ന് എംവി ​ഗോവിന്ദൻ പറഞ്ഞു. ചാൻസലർ പദവി ദുരുപയോ​ഗം ചെയ്യുകയാണ്. ​ഗവർണറുടെ വഴിവിട്ട നീക്കം സംഘപരിവാർ അ‍ജണ്ടയുടെ ഭാ​ഗമാണെന്നും എംവി ​ഗോവിന്ദൻ ആരോപിച്ചു.

ഗവർണറുടെ തുടർച്ചയായ വ്യാജ പ്രചരണങ്ങളോട് ആ സമയത്ത് തന്നെ പ്രതികരിക്കേണ്ടതില്ലെന്ന് എംവി ​ഗോവിന്ദൻ പറഞ്ഞു. ആരോപണം ഉന്നയിച്ച ആൾക്കെതിരെ കേസ് കൊടുക്കുന്ന കാര്യം പരിശോധിക്കുമെന്നും എംവി ​ഗോവിന്ദൻ കൂട്ടിച്ചേർത്തു. ഇടതുപക്ഷത്തിന്റെ രാജ്ഭവൻ ധർണ ചരിത്രസംഭവമാകുമെന്ന് സിപിഐ സംസ്ഥാന സെക്രട്ടറി കാനം രാജേന്ദ്രൻ പറഞ്ഞു. ​ഗവർണർ അക്കാഡമിക് പണ്ഡിതരെ ആക്ഷേപിക്കുകയാണെന്നും എൽഡിഎഫ് യോ​ഗം വിലയിരുത്തി.

​ഗവർണർക്ക് എതിരെ ഇടതുമുന്നണിയുടെ നേതൃത്വത്തിൽ യോജിച്ച പ്രതിഷേധ പരിപാടികൾ സംഘടിപ്പിക്കാനും അത് എങ്ങനെ വേണമെന്ന് തീരുമാനിക്കാനുമാണ് ഇന്ന് യോ​ഗം വിളിച്ചത്. സർക്കാരിനെതിരെയുളള ഗവർണറുടെ നീക്കങ്ങൾക്ക് തടയിടാനായി പരസ്യ പ്രചരണത്തിന് സിപിഐഎം നേരത്തെ തീരുമാനിച്ചിരുന്നു.

STORY HIGHLIGHTS: Left Front dharna in front of Raj Bhavan against Governor