Top

ഐഎന്‍ടിയുസി - വിഡി സതീശന്‍ തര്‍ക്കം പരിഹരിക്കാന്‍ കെപിസിസി ഇടപെടല്‍; ചന്ദ്രശേഖരന്‍ ഇന്ന് കെ സുധാകരനെ കാണും

പ്രതിപക്ഷ നേതാവിനെതിരെ ശക്തമായി നീങ്ങാന്‍ ഐഎന്‍ടിയുസി പദ്ധതിയിടുന്നു എന്ന റിപ്പോര്‍ട്ടുകള്‍ക്കിടെയാണ് കൂടിക്കാഴ്ച.

4 April 2022 1:36 AM GMT
റിപ്പോർട്ടർ നെറ്റ്‌വർക്ക്

ഐഎന്‍ടിയുസി - വിഡി സതീശന്‍ തര്‍ക്കം പരിഹരിക്കാന്‍ കെപിസിസി ഇടപെടല്‍; ചന്ദ്രശേഖരന്‍ ഇന്ന് കെ സുധാകരനെ കാണും
X

തിരുവനന്തപുരം: പ്രതിപക്ഷ നേതാവ് വിഡി സതീശനും ഐഎന്‍ടിയുസിയും തമ്മിലുള്ള തര്‍ക്കം പരിഹരിക്കാന്‍ കെപിസിസി ഇടപെടുന്നു. പ്രശ്‌ന പരിഹാരത്തിന് ഐഎന്‍ടിയുസി പ്രസിഡന്റ് ആര്‍ ചന്ദ്രശേഖരനുമായി കെപിസിസി അധ്യക്ഷന്‍ കെ സുധാകരന്‍ ചര്‍ച്ച നടത്തും. ഇന്ന് രാവിലെയാണ് ചര്‍ച്ച.

വിഷയത്തില്‍ പാര്‍ട്ടി നേതൃത്വം ഇടപെട്ടില്ലെങ്കില്‍ പ്രതിപക്ഷ നേതാവിനെതിരെ ശക്തമായി നീങ്ങാന്‍ ഐഎന്‍ടിയുസി പദ്ധതിയിടുന്നു എന്ന റിപ്പോര്‍ട്ടുകള്‍ക്കിടെയാണ് കൂടിക്കാഴ്ച. ഇക്കാര്യം ഉള്‍പ്പെടെ വ്യക്തമാക്കാന്‍ ഇന്ന് ചന്ദ്രശേഖരന്‍ വാര്‍ത്താ സമ്മേളനം വിളിക്കുകയും ചെയ്തിരുന്നു. ഇതിനിടെയാണ് കെ സുധാകരന്റെ ഇടപെടല്‍.

ഐഎന്‍ടിയുസി കോണ്‍ഗ്രസിന്റെ പോഷക സംഘടനയല്ലെന്ന വിഡി സതീഷന്റെ പ്രസ്താവനയിലുള്ള അതൃപ്തി ആര്‍ ചന്ദ്രശേഖരന്‍ കെ സുധാകരനെ അറിയിക്കും. എന്നാല്‍ വിഷയം കൂടുതല്‍ വഷളാവാതെ തീര്‍ക്കുന്നതിലുള്ള നിര്‍ദേശമായിരിക്കും കെപിസിസി സ്വീകരിക്കുക. ഈ സാഹചര്യത്തില്‍ വിഷയം ഇന്നത്തെ കൂടിക്കാഴ്ചയോടെ ഒത്തുതീര്‍പ്പാവാനാണ് സാധ്യതകള്‍. നേതൃത്വത്തെ വിഷയത്തില്‍ ഇടപെടുത്തുകയും തങ്ങളുടെ അതൃപ്തി അറിയിക്കുകയും ചെയ്യും എന്ന് നേരത്തെ തന്നെ ഐന്‍ടിയുസി നേതാക്കള്‍ അറിയിച്ചിരുന്നു. ഇക്കാര്യം സാധ്യമായെന്ന നിലപാടായിരിക്കും ഐഎന്‍ടിയുസി സ്വീകരിക്കുക.

ദേശീയ പണിമുടക്ക് ബന്ദിനും ഹര്‍ത്താലിനും സമാനമായി മാറിയെന്ന പരാമര്‍ശത്തോടെയാണ് ഐഎന്‍ടിയുസി കോണ്‍ഗ്രസിന്റെ പോഷക സംഘടനയല്ലെന്ന പരാമര്‍ശം വിഡി സതീശന്‍ നടത്തിയത്. ഇതിനെതിരെ വ്യാപക പ്രതിഷേധം ഉയരുകയും ചെയ്തു. പിന്നാലെ ചെങ്ങന്നൂരില്‍ വലിയ പ്രതിഷേധം ഉയരുകയും ചെയ്തു. കോണ്‍ഗ്രസും ഐഎന്‍ടിയുസിയും ഒന്നാണ്, വിഡി സതീശന്‍ പ്രസ്താവന പിന്‍വലിക്കണം എന്നീ മുദ്രാവാക്യങ്ങള്‍ ഉയര്‍ത്തിയായിരുന്നു ഐഎന്‍ടിയുസി പ്രവര്‍ത്തകര്‍ തെരുവിലിറങ്ങിയത്.

Content Highlight: KPCC intervenes to resolve INTUC VD Satheesan dispute

Next Story