Top

മയക്ക് മരുന്ന് ഉപയോഗം, ലൈംഗിക പീഡനം, വേട്ട; സൈജുവിന്റെ ഫോണിലുള്ളത് ഞെട്ടിക്കുന്ന വിവരങ്ങള്‍

1 Dec 2021 3:12 AM GMT
റിപ്പോർട്ടർ നെറ്റ്‌വർക്ക്

മയക്ക് മരുന്ന് ഉപയോഗം, ലൈംഗിക പീഡനം, വേട്ട; സൈജുവിന്റെ ഫോണിലുള്ളത് ഞെട്ടിക്കുന്ന വിവരങ്ങള്‍
X

മുന്‍ മിസ് കേരള ജേതാക്കള്‍ ഉള്‍പ്പെടെ കൊല്ലപ്പെടാന്‍ ഇടയാക്കിയ വാഹനാപകടകേസിലെ മുഖ്യ പ്രതി സൈജു എം തങ്കച്ചന്റെ ഫോണില്‍ നിന്ന് ലഭിച്ചത് ഞെട്ടിക്കുന്ന വിവരങ്ങള്‍. ലഹരി ഉപയോഗം, പ്രതൃതി വിരുദ്ധ പീഡനം, കാട്ടു പോത്തിനെ വേട്ടയാടല്‍ തുടങ്ങി നിരവധി നിയമ വിരുദ്ധ പ്രവര്‍ത്തനങ്ങളാണ് 41 കാരനായ സൈജുവിന്റെ ഫോണില്‍ നിന്നും അന്വേഷണ സംഘം കണ്ടെത്തിയത്. കസ്റ്റഡി റിപ്പോര്‍ട്ടിലാണ് നിര്‍ണായക വിവരങ്ങള്‍ അന്വേഷണ സംഘം പങ്കുവയ്ക്കുന്നത്.

പ്രകൃതി വിരുദ്ധ പീഡനം ഉള്‍പ്പെടെ ലൈംഗിക ചൂഷണത്തിന്റെ അന്‍പതില്‍ അധികം വീഡിയോകളാണ് ഫോണില്‍ ഉണ്ടായിരുന്നത്. മാരക ലഹരി മരുന്നായ എംഡിഎംഎ ഒരു സ്ത്രീയുടെ ശരീരത്തില്‍ വിതറി ഒന്നിലധികം പേര്‍ ഉപയോഗിക്കുന്ന ദൃശ്യങ്ങളും കണ്ടെത്തിയതില്‍ ഉള്‍പ്പെടുന്നു എന്നാണ് വിവരങ്ങള്‍.

സൈജുവിന്റെ ചാറ്റുകളിലാണ് കാട്ടു പോത്തിനെ വേട്ടയാടിയത് ഉള്‍പ്പെടെയുള്ള വിവരങ്ങളുള്ളത്. കാട്ടുപോത്തിനെ വനത്തില്‍ വച്ച് വെടിവച്ച് കൊന്ന് കറിവെച്ചെന്നും മാരക മയക്കുമരുന്നുകള്‍ ഉപയോഗിച്ചിരുന്നു എന്നും സൈറ ബാനു എന്ന പ്രൊഫൈലിനോടാണ് സൈജു വെളിപ്പെടുത്തുന്നത്. 2021 ജൂലൈ 26 നാണ് ഈ ചാറ്റ് നടന്നിട്ടുള്ളത്. ഇതോടെ വനം വകുപ്പും ഇയാള്‍ക്കെതിരെ കേസ് എടുക്കുന്ന നിലയുണ്ടാവും.

കൊച്ചി, മൂന്നാര്‍, ഗോവ എന്നിവിടങ്ങളില്‍ നടത്തിയ പാര്‍ട്ടികളുടെ ദൃശ്യങ്ങളാണ് സൈജുവില്‍ നിന്ന് ലഭിച്ചിട്ടുള്ളത്. ഇയാള്‍ സംഘടിപ്പിച്ച പാര്‍ട്ടികളില്‍ പങ്കെടുത്തവരെയും ചോദ്യം ചെയ്യാന്‍ ഒരുങ്ങുകയാണ് അന്വേഷണ സംഘം. ചിലവന്നൂരിലെ ഫ്‌ലാറ്റില്‍ 2020 സെപ്റ്റംബര്‍ 7നു സൈജു നടത്തിയ പാര്‍ട്ടിയില്‍ പങ്കെടുത്തവരെന്നു പറയുന്ന അമല്‍ പപ്പടവട, നസ്‌ലിന്‍, സലാഹുദീന്‍ മൊയ്തീന്‍, ഷിനു മിന്നു എന്നിവരെ പൊലീസ് ചോദ്യം ചെയ്യും. പൊലീസ് കോടതിയില്‍ സമര്‍പ്പിച്ച റിമാന്‍ഡ് റിപ്പോര്‍ട്ടിലാണ് ഇവരുടെ പേരുകള്‍ പരാമര്‍ശിക്കുന്നത്.

മോഡലുകള്‍ മരിച്ച വാഹനാപകട കേസില്‍ വാഹനത്തെ പിന്തുടര്‍ന്ന സൈജു എം. തങ്കച്ചനെ ഇന്നലെ കോടതി മൂന്നു ദിവസത്തേക്കു കൂടി പൊലീസ് കസ്റ്റഡിയില്‍ വിട്ടിരുന്നു. പിന്തുടര്‍ന്ന സൈജുവില്‍നിന്ന് രക്ഷപ്പെടാന്‍ അമിത വേഗത്തില്‍ വാഹനം ഓടിച്ചതാണ് അപകട കാരണമെന്നാണ് അന്വേഷണ സംഘത്തിന്റെ നിഗമനം. ഇതിന് പുറമെ സൈജു ഗുരുതരമായ കുറ്റങ്ങള്‍ ചെയ്തിട്ടുണ്ടെന്ന് തിരിച്ചറിഞ്ഞതായി ജില്ലാ ക്രൈംബ്രാഞ്ച് നിലപാട് സ്വീകരിച്ചതോടെയായിരുന്നു കോടതിയുടെ നടപടി. സ്ത്രീകളെ ദുരുദ്ദേശ്യത്തോടെ പിന്തുടര്‍ന്നു, അപമര്യാദയായി പെരുമാറി, മനഃപൂര്‍വമല്ലാത്ത നരഹത്യ തുടങ്ങിയ വകുപ്പുകള്‍ ചേര്‍ത്താണ് നിലവില്‍ സൈജുവിനെ അറസ്റ്റ് ചെയ്തിരുന്നത്. എന്നാല്‍ മയക്ക് മരുന്ന് ഇടപാടുകളും കാട്ടില്‍ കയറി വേട്ടയാടല്‍ തുടങ്ങിയ ആരോപണങ്ങളും ഉയര്‍ന്ന നിലയ്ക്ക് കേസുകള്‍ കൂടുതല്‍ ശക്തമാവാനും ഇടയാക്കും.

Next Story

Popular Stories