Top

'അതെന്റെ ശബ്ദരേഖ അല്ല, ആരോ കെട്ടിച്ചമച്ചത്'; 'പദവിയും സ്റ്റേറ്റ് കാറും' സംഭാഷണം നിഷേധിച്ച് ജോണി നെല്ലൂര്‍

വ്യാജ ഓഡിയോ സംഭാഷണത്തില്‍ ഉചിതമായ നിയമ നടപടി സ്വീകരിക്കുമെന്ന് ജോണി നെല്ലൂര്‍.

6 Jun 2022 11:07 AM GMT
റിപ്പോർട്ടർ നെറ്റ്‌വർക്ക്

അതെന്റെ ശബ്ദരേഖ അല്ല, ആരോ കെട്ടിച്ചമച്ചത്; പദവിയും സ്റ്റേറ്റ് കാറും സംഭാഷണം നിഷേധിച്ച് ജോണി നെല്ലൂര്‍
X

കോഴിക്കോട്: പദവി നല്‍കിയാല്‍ പാര്‍ട്ടി മാറാമെന്ന ശബ്ദരേഖ തന്റേതല്ലെന്ന് കേരള കോണ്‍ഗ്രസ് (ജേക്കബ്) വിഭാഗം ചെയര്‍മാനും മുന്‍ എംഎല്‍എയുമായ ജോണി നെല്ലൂര്‍. പുറത്തുവന്ന ശബ്ദരേഖ തന്റേതല്ലെന്നും ആരോ മനപ്പൂര്‍വ്വം തന്റെ പേരില്‍ കെട്ടിച്ചമച്ചതാണെന്നുമാണ് ജോണി നെല്ലൂര്‍ റിപ്പോര്‍ട്ടര്‍ ടിവിയോട് പറഞ്ഞത്.

താന്‍ ഒരു പാര്‍ട്ടിയിലേക്കും പോകുന്നില്ല. ഇത് സംബന്ധിച്ച് ആരുമായും ചര്‍ച്ച നടത്തിയിട്ടില്ല. വ്യാജ ഓഡിയോ സംഭാഷണത്തില്‍ ഉചിതമായ നിയമ നടപടി സ്വീകരിക്കുമെന്ന് ജോണി നെല്ലൂര്‍ അറിയിച്ചു. തൃക്കാക്കര ഉപതെരഞ്ഞെടുപ്പിലെ ജാള്യത മറയ്ക്കാന്‍ യുഡിഎഫ് നേതാക്കളെ അപകീര്‍ത്തിപെടുത്താനുള്ള ശ്രമങ്ങളാണ് നടക്കുന്നതെന്നും അദ്ദേഹം കൂട്ടിച്ചേര്‍ത്തു.

പദവിയും സ്റ്റേറ്റ് കാറും തന്നാല്‍ താന്‍ എല്‍ഡിഎഫിലേക്ക് വരാമെന്ന ജോണി നെല്ലൂരിന്റെ ശബ്ദ സന്ദേശമാണ് പുറത്ത് വന്നത്. കേരള കോണ്‍ഗ്രസ് എം നേതാവ് എച്ച് ഹാഫീസുമായുള്ള ഫോണ്‍ സംഭാഷണത്തിലാണ് ജോണി നെല്ലൂര്‍ ഇക്കാര്യം പറയുന്നത്. കോര്‍പ്പറേഷന്‍ ചെയര്‍മാന്‍ സ്ഥാനവും കാറും മതിയെന്നാണ് ജോണി നെല്ലൂരിന്റെ ആവശ്യം. ബിജെപിയിലേക്ക് പോകാന്‍ തനിക്ക് താല്‍പര്യമില്ലെന്നും അദ്ദേഹം പറയുന്നു.

പുറത്തുവന്ന സംഭാഷണത്തിന്റെ പ്രസക്ത ഭാഗം:

ജോണി നെല്ലൂര്‍: നാലോളം പദവി അവര്‍ എനിക്ക് ഓഫര്‍ ചെയ്തിട്ടുണ്ട്.

എച്ച് ഹാഫീസ്: ആര് ബിജെപിക്കാരോ

ജോണി നെല്ലൂര്‍: ന്യൂനപക്ഷ ചെയര്‍മാന്‍, അല്ലെങ്കില്‍ കോഫി ബോര്‍ഡ് ചെയര്‍മാന്‍, അതും അല്ലെങ്കില്‍ സ്‌പൈസസ് ബോര്‍ഡ് ചെയര്‍മാന്‍. കേര വികസന കോര്‍പ്പറേഷന്‍ ചെയര്‍മാന്‍. ഇത്രയും അവര്‍ ഓഫര്‍ ചെയ്തിട്ടുണ്ട്.

എച്ച് ഹാഫീസ്: ഷിപ്പ് യാര്‍ഡ് ഓഫര്‍ ചെയതില്ലല്ലോ സാറേ...

ജോണി നെല്ലൂര്‍: അതാന്നും ഇല്ല. അതിനൊക്കെ വേറെ ആളുകളുണ്ട്.

എച്ച് ഹാഫീസ്: അത് നമ്മുടെ കൂട്ടത്തിലെയോ, യുഡിഎഫിലെയോ എല്‍ഡിഎഫിലെയോ ആളുകള്‍ ഒന്നും അല്ലല്ലോ

ജോണി നെല്ലൂര്‍: ഏതായാലും മാത്യൂ സ്റ്റീഫന്‍ ഒക്കെ കൂടെ പോവുകയാ.

എച്ച് ഹാഫീസ്: അയ്യയ്യയ്യോ.. അവരെയൊക്കെ ക്രോഡീകരിച്ച് ഒരു സംവിധാനം ഉണ്ടാക്കിക്കൂടെ

ജോണി നെല്ലൂര്‍: അത് ഉണ്ടാക്കി ബിജെപിയില്‍ പോകാന്‍ എനിക്ക് ഇഷ്ടമില്ലെന്ന്

എച്ച് ഹാഫീസ്: ബിജെപിയില്‍ പോകാനല്ല സാറെ, ഇടതുപക്ഷത്തേക്ക്.

ജോണി നെല്ലൂര്‍: നീ ഒരു കാര്യം ചെയ്യ്, നിന്റെ ഇപ്പോഴത്തെ സ്വാധീനം വെച്ച് ഇക്കാര്യത്തില്‍ ഒരു തീരുമാനം ഉണ്ടാക്കാന്‍ നോക്ക്. എന്നിട്ട് പറയ്. എന്തുകൊണ്ട് നിങ്ങള്‍ പോയി എന്ന് ചോദിച്ചാല്‍ പറയാന്‍ മിനിമം ഒരു കോര്‍പ്പറേഷന്‍ ചെയര്‍മാന്‍ സ്ഥാനമെങ്കിലും വേണം. ഒരു സ്റ്റേറ്റ് കാര്‍ വേണം. അത് നീ ആലോചിച്ചോ.

എച്ച് ഹാഫീസ്: ശരി സാറേ.



Next Story