Top

ഓണ്‍ലൈന്‍ കേന്ദ്രങ്ങള്‍ വഴി വ്യാജ പെര്‍മിറ്റ് സുലഭം; കര്‍ണാടകയില്‍ നിന്നെത്തിയ ലോറി പിടിയില്‍

വ്യാജ പെര്‍മിറ്റ് തട്ടിപ്പിനെ കുറിച്ച് കൂടുതല്‍ അന്വേഷണം നടക്കുകയാണെന്ന് ഉദ്യോഗസ്ഥര്‍ അറിയിച്ചു

8 Feb 2023 8:55 AM GMT
റിപ്പോർട്ടർ നെറ്റ്‌വർക്ക്

ഓണ്‍ലൈന്‍ കേന്ദ്രങ്ങള്‍ വഴി വ്യാജ പെര്‍മിറ്റ് സുലഭം; കര്‍ണാടകയില്‍ നിന്നെത്തിയ ലോറി പിടിയില്‍
X

കണ്ണൂര്‍: വ്യാജ ഓണ്‍ലൈന്‍ പെര്‍മിറ്റുമായി കണ്ണൂര്‍ മാക്കൂട്ടത്ത് ലോറി പിടിയില്‍. കര്‍ണാടകയില്‍ നിന്നും പച്ചക്കറിയുമായി വന്ന ലോറിയാണ് വ്യാജ പെര്‍മിറ്റ് ഉപയോഗിച്ച് കേരളത്തിലേക്ക് കടക്കാന്‍ ശ്രമിച്ചത്. പരിശോധനയില്‍ ഇത് വ്യക്തമായതോടെ ലോറി കസ്റ്റഡിയിലെടുക്കുകയായിരുന്നു. അറസ്റ്റിലായ ലോറി ഡ്രൈവറെ കോടതിയില്‍ ഹാജരാക്കി റിമാന്റ് ചെയ്തു.

വ്യാജ പെര്‍മിറ്റ് തട്ടിപ്പിനെ കുറിച്ച് കൂടുതല്‍ അന്വേഷണം നടക്കുകയാണെന്ന് ഉദ്യോഗസ്ഥര്‍ അറിയിച്ചു. പെര്‍മിറ്റുകള്‍ ഓണ്‍ലൈന്‍ മാര്‍ഗമാക്കിയതിനു പിന്നാലെയാണ് പഴയ പെര്‍മിറ്റുകള്‍ എഡിറ്റ് ചെയ്ത് ഇത്തരത്തില്‍ ലോറികള്‍ അതിര്‍ത്തി കടക്കുന്നത്. ഒറ്റനോട്ടത്തില്‍ വ്യാജ പെര്‍മിറ്റ് രേഖകള്‍ മനസിലാകില്ലെന്നതാണ് തട്ടിപ്പ് ആവര്‍ത്തിക്കാന്‍ കാരണവും ഉദ്യോഗസ്ഥരെ കുഴപ്പിക്കുന്നതും.

പ്രധാനമായും കര്‍ണാടകയിലെ ഓണ്‍ലൈന്‍ കേന്ദ്രങ്ങളിലാണ് ഇത്തരം തട്ടിപ്പുകള്‍ നടക്കുന്നത്. പഴയ പെര്‍മിറ്റുകളിലെ വാലിഡിറ്റി തിയതി ഉള്‍പ്പടെ ഫോട്ടോഷോപ്പില്‍ എഡിറ്റ് ചെയ്താണ് തട്ടിപ്പ്. പെര്‍മിറ്റുകളിലെ ക്യൂ ആര്‍ കോഡുകള്‍ ഉള്‍പ്പെടെ സൂക്ഷ്മപരിശോധന നടത്തിയാല്‍ മാത്രമേ യഥാര്‍ത്ഥ രേഖകളാണോ എന്ന് വ്യക്തമാകൂ. അതേസമയം വസ്തുത അറിയാതെ ലോറി ഉടമകള്‍ ഉള്‍പ്പടെ തട്ടിപ്പിന് ഇരയാകുന്നുണ്ടെന്നാണ് വിവരം. നിരവധി വാഹന ഉടമകള്‍ തട്ടിപ്പുകള്‍ക്ക് ഇരയാകാന്‍ സാധ്യതയുണ്ടെന്ന് അധികൃതരും പറയുന്നു.

Story Highlights: Karnataka Lorry In Custody For Using Fake Permit

Next Story