Top

'സുജീഷ് പ്രണയപ്പകയില്‍ ഇല്ലാതാക്കിയത് സമൂഹത്തെ നയിക്കേണ്ട പൊതുപ്രവര്‍ത്തകയെ'; നീതി ലഭിക്കാന്‍ ഒപ്പമുണ്ടെന്ന് ഡിവൈഎഫ്‌ഐ

''നാളെയുടെ പ്രതീക്ഷകളെ തല്ലികെടുത്തുന്ന ഇത്തരം പകകളെ ഇല്ലാതാക്കാന്‍ യുവ സമൂഹത്തെ ബോധവത്കരിക്കണം.''

10 Aug 2022 1:49 PM GMT
റിപ്പോർട്ടർ നെറ്റ്‌വർക്ക്

സുജീഷ് പ്രണയപ്പകയില്‍ ഇല്ലാതാക്കിയത് സമൂഹത്തെ നയിക്കേണ്ട പൊതുപ്രവര്‍ത്തകയെ; നീതി ലഭിക്കാന്‍ ഒപ്പമുണ്ടെന്ന് ഡിവൈഎഫ്‌ഐ
X

ഭാവിയില്‍ നേതൃപരമായി സമൂഹത്തെ നയിക്കേണ്ട പൊതുപ്രവര്‍ത്തകയായ പെണ്‍കുട്ടിയാണ് പാലക്കാട് പ്രണയപ്പകയിലൂടെ ഇല്ലാതായതെന്ന് ഡിവൈഎഫ്‌ഐ.

നാളെയുടെ പ്രതീക്ഷകളെ തല്ലികെടുത്തുന്ന ഇത്തരം പകകളെ ഇല്ലാതാക്കാന്‍ യുവ സമൂഹത്തെ ബോധവത്കരിക്കണം. ഇത്തരം സംഭവങ്ങള്‍ ആവര്‍ത്തിക്കാതിരിക്കാനുള്ള സാമൂഹ്യ ഇടപെടലുകള്‍ ഡിവൈഎഫ്‌ഐ തുടരും. കേസിലെ പ്രതിയായ സുജീഷിന് അര്‍ഹമായ ശിക്ഷ നേടിയെടുക്കാനും സൂര്യപ്രിയക്ക് നീതി ലഭ്യമാക്കാനും ഒപ്പമുണ്ടെന്ന് ഡിവൈഎഫ്‌ഐ വ്യക്തമാക്കി.

ഡിവൈഎഫ്‌ഐ പ്രസ്താവന: ''പ്രണയാഭ്യര്‍ത്ഥന നിരസിച്ചതിന്റെ പേരില്‍ പെണ്‍കുട്ടികള്‍ അതിക്രൂരമായി കൊല ചെയ്യപ്പെടുന്ന സംഭവങ്ങള്‍ തുടര്‍ക്കഥയാവുകയാണ്. വലിയ ഞെട്ടലോടെയാണ് പാലക്കാട് കോന്നലൂര്‍ സ്വദേശി സൂര്യ പ്രിയയുടെ കൊലപാതക വാര്‍ത്തയും കേരള സമൂഹം കേട്ടത്. ഡിവൈഎഫ്‌ഐ ആലത്തൂര്‍ ബ്ലോക്ക് കമ്മിറ്റി അംഗവും മേലാര്‍കോട് പഞ്ചായത്ത് സിഡിഎസ് അംഗവുമായിരുന്നു സൂര്യ പ്രിയ.''

''സാമൂഹ്യ രാഷ്ട്രീയ രംഗത്ത് നിറ സാന്നിധ്യമായ ധീരയായ സഖാവും ഭാവിയില്‍ നേതൃപരമായി സമൂഹത്തെ നയിക്കേണ്ട പൊതുപ്രവര്‍ത്തകയുമായ പെണ്‍കുട്ടിയെയാണ് പ്രതി സുജീഷ് പ്രണയപ്പകയില്‍ ഇല്ലാതാക്കിയത്. വ്യക്തികളെയും അവരുടെ സ്വാതന്ത്ര്യത്തെയും അഭിപ്രായത്തെയും അംഗീകരിക്കാനാവാത്ത സ്വഭാവ രൂപീകരണം യുവതയെ ഇത്തരത്തിലുള കുറ്റകൃത്യങ്ങളിലേക്ക് എത്തിക്കുകയാണ്.''

''നാളെയുടെ പ്രതീക്ഷകളെ തല്ലികെടുത്തുന്ന ഇത്തരം പകകളെ ഇല്ലാതാക്കാന്‍ യുവ സമൂഹത്തെ ബോധവത്കരിക്കണം. പ്രണയമുണ്ടെന്ന് പറയുന്നത് പോലെ ഏറ്റവും സ്വതന്ത്ര്യമായി അത് നിരസിക്കാനും ഇല്ലെന്നു പറയാനും ഓരോ വ്യക്തിക്കും അവരുടേതായ സ്വാതന്ത്ര്യമുണ്ട്. മനുഷ്യ ബന്ധങ്ങള്‍ക്കിടയില്‍ ഈ ബോധം വളര്‍ത്താന്‍ ചിന്താശേഷിയുള്ള യുവ സമൂഹം ആവശ്യമാണ്. ഇതിനായി നമുക്ക് ഒരുമിച്ച് പ്രവര്‍ത്തിക്കാം.''

''ഇത്തരം സംഭവങ്ങള്‍ ആവര്‍ത്തിക്കാതിരിക്കാനുള്ള സാമൂഹ്യ ഇടപെടലുകള്‍ തുടര്‍ന്നു കൊണ്ടിരിക്കാം. കൊലപാതകിക്ക് അര്‍ഹമായ ശിക്ഷ നേടിയെടുക്കാന്‍ സൂര്യപ്രിയക്ക് നീതി ലഭിക്കാന്‍ ഒപ്പമുണ്ട്. വിട...സഖാവ് സൂര്യ പ്രിയാ..''

Next Story