Top

'അത്ഭുതമില്ല, സുധാകരനാണ്'; അക്രമവും അശ്ലീലവുമല്ലാതെ മറ്റൊന്നും പ്രതീക്ഷിക്കേണ്ടെന്ന് എ എ റഹീം

കേരളം കേള്‍ക്കാന്‍ ആഗ്രഹിക്കാത്ത തരംതാണ ഭാഷാ പ്രയോഗമാണ് സുധാകരന്‍ മുഖ്യമന്ത്രിയ്‌ക്കെതിരെ നടത്തിയതെന്ന് റഹീം.

17 May 2022 4:42 PM GMT
റിപ്പോർട്ടർ നെറ്റ്‌വർക്ക്

അത്ഭുതമില്ല, സുധാകരനാണ്; അക്രമവും അശ്ലീലവുമല്ലാതെ മറ്റൊന്നും പ്രതീക്ഷിക്കേണ്ടെന്ന് എ എ റഹീം
X

മുഖ്യമന്ത്രി പിണറായി വിജയന് നേരെ അധിക്ഷേപ പരാമര്‍ശം നടത്തിയ കെപിസിസി അധ്യക്ഷന്‍ കെ സുധാകരനെതിരെ രൂക്ഷവിമര്‍ശനവുമായി ഡിവൈഎഫ്‌ഐ അഖിലേന്ത്യ പ്രസിഡന്റ് എഎ റഹീം എംപി.

സുധാകരന്റെ പരാമര്‍ശത്തില്‍ അത്ഭുതമില്ലെന്നും അക്രമവും അശ്ലീലവുമല്ലാതെ മറ്റൊന്നും അദ്ദേഹത്തില്‍ നിന്ന് പ്രതീക്ഷിക്കേണ്ടതില്ലെന്ന് റഹീം പറഞ്ഞു. ആരെയെങ്കിലും വെല്ലുവിളിക്കാതെ അദ്ദേഹത്തിന്റെ ഒരു ദിവസവും കടന്നുപോകാറില്ല. ഒരു പരിഷ്‌കൃത സമൂഹത്തിനും ചേരാത്ത രാഷ്ട്രീയ വ്യക്തിത്വമാണ് സുധാകരന്റേത്. തൃക്കാക്കരയില്‍ കോണ്‍ഗ്രസിന് പരാജയ ഭീതിയാണ്. അത് കാരണമാണ് മുഖ്യമന്ത്രിയ്‌ക്കെതിരെ ഇത്തരം തരംതാണ പ്രസ്താവന സുധാകരന്‍ നടത്താന്‍ കാരണമെന്നും റഹീം പറഞ്ഞു.

എഎ റഹീമിന്റെ വാക്കുകള്‍: മുഖ്യമന്ത്രിയെ ചെത്തുകാരന്റെ മകനെന്ന് പറഞ്ഞു അധിക്ഷേപിക്കാന്‍ ശ്രമിച്ച അതേ നാവുകൊണ്ട് തന്നെയാണ് ഇപ്പോള്‍ വീണ്ടും മലിനമായ വാക്കുകള്‍ ആവര്‍ത്തിക്കുന്നത്. അത്ഭുതമില്ല, സുധാകരനാണ്, ആയുധവും അക്രമവും, അശ്ലീലവുമല്ലാതെ മറ്റൊന്നും അദ്ദേഹത്തില്‍ നിന്ന് പ്രതീക്ഷിക്കേണ്ടതില്ല. ആധുനിക കേരളം കേള്‍ക്കാന്‍ ആഗ്രഹിക്കാത്തത് മാത്രമേ ശ്രീ കുമ്പക്കുടി സുധാകരന്റെ മലിനമായ നാക്കില്‍ നിന്നും കേള്‍ക്കാന്‍ കഴിയൂ.

വ്യാജഡോക്ടറായ മോണ്‍സണ്‍ മാവുങ്കലിന്റെ മുന്നില്‍ ചികിത്സയ്ക്കായി പോയ മഹാനാണ്. എന്തു ചികിത്സയെന്നു കേരളത്തിന് ഇതുവരെ മനസ്സിലായിട്ടുമില്ല. എനിക്ക് തോന്നിയാല്‍ ഞാന്‍ ബിജെപിയില്‍ പോകുമെന്ന് പറഞ്ഞയാള്‍...ബിജെപിയില്‍ പോകാനും തട്ടിപ്പു ഡോക്ടറുടെ മുന്നില്‍ ചികിത്സ തേടി പോകാനും പ്രാപ്തമായ മനസും ശരീരവുമാണ് ഖദറില്‍ മൂടിക്കെട്ടി വച്ചിരിക്കുന്ന സുധാകരന്‍.

ഉടയാത്ത ഖദറും കറപുരണ്ട മനസ്സുമാണ് സുധാകരന്‍. ധാര്‍ഷ്ട്യവും ധിക്കാരവുമാണ് അദ്ദേഹത്തിന്റെ നടപ്പിലും വാക്കിലും. ആരെയെങ്കിലും വെല്ലുവിളിക്കാതെ അദ്ദേഹത്തിന്റെ ഒരു ദിവസവും കടന്നുപോകാറില്ല. ഒരു പരിഷ്‌കൃത സമൂഹത്തിനും ചേരാത്ത രാഷ്ട്രീയ വ്യക്തിത്വമാണ് കെപിസിസി പ്രസിഡന്റിന്റേത്.

തൃക്കാക്കരയില്‍ സുധാകരന് പരാജയ ഭീതിയാണ്. ആ ഭീതി കാരണമാണ് മുഖ്യമന്ത്രിയ്‌ക്കെതിരെ ഇത്തരം തരം താണ പ്രസ്താവന നടത്താന്‍ കാരണം. ബോധപൂര്‍വ്വം പ്രകോപനം സൃഷ്ടിക്കലുമാണ് ലക്ഷ്യം. കേരളം ഇതെല്ലാം കേള്‍ക്കുന്നുണ്ട്. തൃക്കാക്കരയും കേരളമാകെയും കേള്‍ക്കാന്‍ ആഗ്രഹിക്കാത്ത തരംതാണ ഭാഷാ പ്രയോഗമാണ് കോണ്‍ഗ്രസ്സ് നേതാവായ ശ്രീ സുധാകരന്‍ മുഖ്യമന്ത്രിയ്‌ക്കെതിരെ നടത്തിയത്.

ജന ഹൃദയങ്ങളിലാണ് സഖാവ് പിണറായി വിജയന്‍. സുധാകരന്റെ അധിക്ഷേപത്തിനു തകര്‍ക്കാന്‍ കഴിയില്ല പിണറായി എന്ന കരുത്തിനെ. കേരളത്തിന്റെ കാവലും കരുതലുമാണ് ജനങ്ങളുടെ പ്രിയപ്പെട്ട പിണറായി.തൃക്കാക്കരയിലെ വോട്ടര്‍മാര്‍ സുധാകരന് മറുപടി നല്‍കും. കേരളം കേള്‍ക്കുന്നുണ്ട്...ഇത് തൃക്കാക്കര കേള്‍ക്കുന്നുണ്ട്.....

Next Story