‘മുഖ്യമന്ത്രിയുടെ ഒരു പൊന്നിന്‍കുടമാണ് അവിടെ തോറ്റത്, ഇതെല്ലാം ജാള്യത മറക്കാന്‍’; സ്വരാജിന്റെ തോല്‍വിയില്‍ ബാബു

തൃപ്പൂണിത്തുറയില്‍ ബിജെപി വോട്ട് വാങ്ങിയാണ് യുഡിഎഫ് വിജയിച്ചതെന്ന മുഖ്യമന്ത്രിയുടെ ആരോപണത്തിനെതിരെ നിയുക്ത എംഎല്‍എ കെ ബാബു രംഗത്ത്. ആരോപണം അസംബന്ധമാണെന്നും മുഖ്യമന്ത്രിയുടെ ഒരു പൊന്നിന്‍കുടം തോറ്റതിന്റെ ജാള്യത മറച്ചുവെക്കാനാണ് ഇത്തരമൊരു ആരോപണം ഉന്നയിക്കുന്നതെന്നും കെ ബാബു പറഞ്ഞു.

‘ശ്രീ പിണറായി വിജയന്റെ ഒരു പൊന്നിന്‍ കുടമാണ് അവിടെ മത്സരിച്ചത്. ആ പൊന്നിന്‍കുടം തകര്‍ന്നതിന്റെ ജാള്യത മറച്ചുവെക്കാനാണ് ബിജെപി വോട്ട് കൊണ്ടാണ് ഞാന്‍ ജയിച്ചതെന്ന് പറയുന്നത്. അത് അസംബന്ധമാണ്. കണക്കുകളും ശരിയാവില്ല.’ കെ ബാബു പറഞ്ഞു.

മുഖ്യമന്ത്രിയുടെ ആരോപണത്തിനെതിരെ കഴിഞ്ഞ ദിവസം കണക്കുകള്‍ നിരത്തി കെ ബാബു രംഗത്തെത്തിയിരുന്നു. വസ്തുതയുടെ പിന്‍ബലമില്ലാത്ത ഇത്തരം ആരോപണങ്ങള്‍ ജനങ്ങളെ അപമാനിക്കുന്നതിന് തുല്യമാണെന്നും കെ ബാബു മറുപടി നല്‍കി.

മുഖ്യമന്ത്രിയുടെ ആരോപണത്തെ തള്ളികൊണ്ടുള്ള കെ ബാബുവിന്റെ വിശദീകരണം

ഐക്യമുന്നണി സ്ഥാനാര്‍ത്ഥിയായ ഞാന്‍ തൃപ്പൂണിത്തുറയില്‍ ജയിച്ചത് ബി.ജെ.പിയുടെ വോട്ട് വാങ്ങിയാണെന്ന മുഖ്യമന്ത്രി പിണറായി വിജയന്റെ ആരോപണത്തിന് വസ്തുതകളുടെ പിന്‍ബലമില്ല, അത് തൃപ്പൂണിത്തുറയിലെ ജനങ്ങളെ അപമാനിക്കുന്നതിന് തുല്യമാണ്.
തൃപ്പൂണിത്തുറയില്‍ 2016 ല്‍ ബി.ജെ.പിയ്ക്ക് ലഭിച്ചത് 29843 വോട്ടായിരുന്നു. പ്രസിദ്ധ ആധ്യാത്മിക പ്രഭാഷകനും മികച്ച കോളേജ് അധ്യാപകനുമായിരുന്ന പ്രൊഫ. തുറവൂര്‍ വിശ്വംഭരനായിരുന്നു സ്ഥാനാര്‍ത്ഥി. അദ്ദേഹത്തിന് ഹൈന്ദവ വിശ്വാസികളുടെയും പൂര്‍വ വിദ്യാര്‍ഥികളായ ശിഷ്യന്മാരുടെയും പിന്തുണ നല്ല തോതില്‍ തന്നെ ലഭിക്കുകയും അത് വോട്ടില്‍ പ്രതിഫലിക്കുകയും ചെയ്തു. ഇത്തവണ ബി.ജെ.പിയ്ക്ക് 6087 വോട്ട് കുറയുവാനുള്ള യഥാര്‍ത്ഥ കാരണം സത്യസന്ധമായി ബി.ജെ.പിയും സി.പി. എമ്മും വിലയിരുത്തണം. ഇന്നലെ വരെ കോണ്‍ഗ്രസ്സില്‍ നിന്ന് എല്ലാം നേടിയ ശേഷം കൂടുതല്‍ ഭാഗ്യം തേടി വന്ന ഇത്തവണത്തെ സ്ഥാനാര്‍ഥിക്ക് പ്രൊഫ. തുറവൂര്‍ വിശ്വംഭരനേക്കാള്‍ ഏറെ എന്തു മികവും ആകര്‍ഷകത്വവുമാണ് ഉള്ളതെന്ന് ചിന്തിക്കണം.
ഇതിനു പുറമെ, 2016 ല്‍ ബി.ജെ.പിയോടൊപ്പം ബിഡിജെഎസ് ശക്തമായി നിലയുറപ്പിച്ചിരുന്നു എന്ന കാര്യം വിസ്മരിക്കാനാവില്ല. പ്രധാനമന്ത്രി നരേന്ദ്ര മോദി തന്നെ പ്രചരണത്തിന് എത്തിയതും അവര്‍ക്ക് നേട്ടമായി മാറിയിരുന്നു. 2006ലെ നിയമസഭാ തെരഞ്ഞെടുപ്പില്‍ 3095 വോട്ടും 2011 ല്‍ 4942 വോട്ടുമാണ് ബി.ജെ.പിയ്ക്ക് ലഭിച്ചത്. 2016 ലെ ഒരു സാഹചര്യവും ഈ തെരഞ്ഞെടുപ്പില്‍ പ്രസക്തം ആയിരുന്നില്ല എന്ന കാര്യവും മറക്കാനാവില്ല.
കഴിഞ്ഞ ലോക്‌സഭാ തെരഞ്ഞെടുപ്പില്‍ ബി.ജെ.പിയ്ക്ക് ലഭിച്ചത് 25,304 വോട്ടുകള്‍ ആയിരുന്നു തദ്ദേശ സ്വയംഭരണ തെരഞ്ഞെടുപ്പില്‍ അത് 23,816 ആയി. ഈ നിയമസഭാ തെരഞ്ഞെടുപ്പില്‍ 23,754 വോട്ട് കിട്ടുകയും ചെയ്തു. 2016ലെ പ്രത്യേക സാഹചര്യത്തില്‍ ലഭിച്ച 29843 വോട്ട് മുഴുവന്‍ അത് ബി.ജെ.പി. വോട്ട് ആയിരുന്നു എന്ന് വിലയിരുത്തുന്നത് ശരിയാണോ എന്ന് ആലോചിക്കണം. 15.1 ശതമാനത്തില്‍നിന്ന് 12.47 ശതമാനമായി ബി.ജെ.പി. വോട്ട് കുറഞ്ഞു
അന്നത്തെ രാഷ്ടീയ കാലാവസ്ഥയും സ്ഥാനാര്‍ത്ഥിയുടെ പൊതുസ്വീകാര്യതയും അന്ന് ബി.ജെ.പിയ്ക്ക് തുണയായി. ഇത്തവണ ഈ അനുകൂല സാഹചര്യമൊന്നും ഉണ്ടായില്ലെന്ന് രാഷ്ടീയം സൂക്ഷ്മമായി നിരീക്ഷിക്കുന്നവര്‍ക്ക് മനസ്സിലാക്കാവുന്നതേയുള്ളൂ. ബി.ജെ.പിയും യു.ഡി.എഫും തമ്മില്‍ വോട്ടുകച്ചവടം നടന്നിട്ടുണ്ടെങ്കില്‍ കോണ്‍ഗ്രസിന്റെ വോട്ട് 39.37 ശതമാനമായി കുറയുമായിരുന്നില്ല. എല്‍.ഡി.എഫിന്റെ വോട്ട് 45.33 ശതമാനമായി വര്‍ദ്ധിക്കുകയും ചെയ്യുമായിരുന്നില്ലല്ലോ.
തെരഞ്ഞെടുപ്പിന് മുമ്പ് തന്നെ സി.പി.എം. ബി.ജെ.പി. ബന്ധം ഉണ്ടെന്ന് ആര്‍.എസ്.എസ്. സൈദ്ധാന്തികന്‍ ആര്‍.
ബാലശങ്കര്‍ വെളിപ്പെടുത്തിയതും അതിന്റെ പേരില്‍ ബി.ജെ.പിയില്‍ ഉണ്ടായ കോലാഹലങ്ങളും മുഖ്യമന്ത്രി സൗകര്യപൂര്‍വം മറക്കുന്നു. ബി.ജെ.പി. വോട്ട് എങ്ങോട്ട് മറിഞ്ഞു എന്ന് മനസ്സിലാക്കാന്‍ അദ്ദേഹത്തിന്റെ വെളിപ്പെടുത്തല്‍ മാത്രം തെളിവായി പരിഗണിച്ചാല്‍ മതി.
ബി.ജെ.പിയുമായി വോട്ട് കച്ചവടം നടത്തിയതുകൊണ്ടാണ് തൃപ്പൂണിത്തുറയില്‍ യു.ഡി.എഫ്. വിജയിച്ചത് എന്ന പിണറായിയുടെ ആരോപണം തന്റെ ‘പൊന്നിന്‍കുടം’ ഉടഞ്ഞു തകര്‍ന്നതിന്റെ ജാള്യത മറയ്ക്കാന്‍ മാത്രമാണ്. സ്വന്തം സ്ഥാനാര്‍ത്ഥിയുടെ പ്രവര്‍ത്തന ശൈലിയും, ഹൈന്ദവ സമൂഹത്തെ അദ്ദേഹം വേദനിപ്പിച്ചതുമൊക്കെ തിരഞ്ഞെടുപ്പ് ഫലത്തെ സ്വാധീനിച്ചിട്ടുണ്ടോ എന്ന് സി.പി.എം. പരിശോധിക്കുന്നത് നന്നായിരിക്കും. കോണ്‍ഗ്രസ്സും ഐക്യമുന്നണിയും പൊരുതി നേടിയ വിജയത്തെ പിണറായി വിജയന്‍ എത്ര തന്നെ ഇകഴ്ത്തിയാലും തൃപ്പൂണിത്തുറയിലെ വോട്ടര്‍മാര്‍ അത് പുച്ഛിച്ചു തള്ളും.