ഇമ്രാൻഖാൻ കോടതിയിൽ, വീട്ടിലേക്ക് അതിക്രമിച്ച് കയറി പൊലീസ്; സംഘർഷം

ഇസ്ലാമാബാദ്: പാകിസ്താൻ മുൻ പ്രധാനമന്ത്രി ഇമ്രാൻ ഖാന്റെ ലാഹോറിലെ വസതിയിലേക്ക് പൊലീസ് ഇരച്ചുകയറി അക്രമം നടത്തിയതായി റിപ്പോർട്ട്. സംഭവത്തിൽ പത്ത് തെഹ്‌രീകെ ഇൻസാഫ് പ്രവർത്തകർക്ക് പരുക്കേറ്റു. 30 പേരെ അറസ്റ്റ് ചെയ്ത് നീക്കിയെന്ന് പിടിഐ റിപ്പോർട്ട് ചെയ്തു.

അഴിമതിക്കേസിലെ വിചാരണയുമായി ബന്ധപ്പെട്ട് ഇസ്ലാമാബാദിലെ കോടതിയിലേക്ക് ഇമ്രാൻ ഖാൻ പോയതിന് പിന്നാലെ പൊലീസ് വീട്ടിലേക്ക് പ്രവേശിക്കുകയായിരുന്നുവെന്ന് പാർട്ടി പ്രവർത്തകർ പറഞ്ഞതായി എൻഡിടിവി റിപ്പോർട്ട് ചെയ്തു.

വീടിന് മുൻവശത്ത് സ്ഥാപിച്ചിരുന്ന ബാരിക്കേഡുകൾ തകർത്ത് ആണ് പൊലീസ് അകത്ത് കയറിയത്. ഈ സമയത്ത് ഇമ്രാൻ ഖാന്റെ ഭാര്യ ബുഷ്റ ബീ​ഗം മാത്രമെ ഉണ്ടായിരുന്നൊളളു. തുടർന്ന് അവിടെയുണ്ടായിരുന്ന പാർട്ടി പ്രവർത്തകരും പൊലീസും ഏറ്റുമുട്ടുകയായിരുന്നു. പ്രവർത്തകരെ പൊലീസ് ലാത്തി കൊണ്ട് അടിക്കുന്ന ദൃശ്യങ്ങൾ പുറത്തുവന്നിട്ടുണ്ട്.

'ബുഷ്റ ബീഗം മാത്രം വീട്ടിലുണ്ടായിരുന്ന സമയത്ത് പഞ്ചാബ് പൊലീസ് സമൻ പാർക്കിലെ വീട്ടിലേക്ക് ഇരച്ചുകയറി അതിക്രമം കാട്ടി. ഏതു നിയമത്തിന്റെ പിൻബലത്തിലാണ് അവർ ഇതു ചെയ്തത്? ഒരു നിയമനം അംഗീകരിച്ചതിന്റെ പ്രത്യുപകാരമായി ഒളിവിലുള്ള നവാസ് ഷരീഫിനെ തിരികെയെത്തിച്ച് അധികാരത്തിലേറ്റാനുള്ള 'ലണ്ടൻ പ്ലാനി'ന്റെ ഭാഗമാണിത്,' സംഭവത്തിന് പിന്നാലെ ഇമ്രാൻ ഖാൻ ട്വീറ്റ് ചെയ്തു.

നേരത്തെ തോഷഖാന കേസിൽ ഇമ്രാൻ ഖാനെ പൊലീസ് അറസ്റ്റ് ചെയ്യാൻ ശ്രമിച്ചത് സംഘർഷത്തിലേക്ക് നയിച്ചിരുന്നു. പ്രധാനമന്ത്രി ആയിരുന്നപ്പോൾ ലഭിച്ച സമ്മാനങ്ങൾ അമിത വിലയ്ക്ക് വിറ്റ് നികുതിവെട്ടിപ്പു നടത്തിയതാണ് തോഷഖാന കേസ്. പാകിസ്താൻ പൊലീസിന്റെ പദ്ധതി അറസ്റ്റല്ല തന്നെ തട്ടിയെടുത്തു കൊലപ്പെടുത്തുകയാണ് ലക്ഷ്യമെന്നും ഇമ്രാൻ ഖാൻ ബുധനാഴ്ച ആരോപിച്ചു.

STORY HIGHLIGHTS: Police Break Into Imran Khan's Home Hours After He Leaves For Court