Top

ഇന്ന് വമ്പന്‍ പോരാട്ടങ്ങള്‍; റൊണാള്‍ഡോക്കും നെയ്മറിനും ആദ്യ മത്സരം

ഫുട്‌ബോള്‍ ലോകം ഒന്നടങ്കം ഉറ്റുനോക്കുന്ന പോര്‍ച്ചുഗല്‍-ഘാന മത്സരം ഇന്ത്യന്‍ സമയം 9.30 നും ബ്രസീല്‍-സെര്‍ബിയ മത്സരം ഇന്ത്യന്‍ സമയം അര്‍ധരാത്രി 12.30 നുമാണ്

24 Nov 2022 8:48 AM GMT
റിപ്പോർട്ടർ നെറ്റ്‌വർക്ക്

ഇന്ന് വമ്പന്‍ പോരാട്ടങ്ങള്‍; റൊണാള്‍ഡോക്കും നെയ്മറിനും ആദ്യ മത്സരം
X

ദോഹ: ഖത്തറില്‍ ഇന്ന് വമ്പന്മാരുടെ പോരാട്ടങ്ങള്‍. സൂപ്പര്‍ താരങ്ങളായ റൊണാള്‍ഡോയും നെയ്മറും തങ്ങളുടെ ആദ്യ മത്സരങ്ങള്‍ക്കായി ഇന്ന് കളത്തിലിറങ്ങും. ഫുട്‌ബോള്‍ ലോകം ഒന്നടങ്കം ഉറ്റുനോക്കുന്ന പോര്‍ച്ചുഗല്‍-ഘാന മത്സരം ഇന്ത്യന്‍ സമയം 9.30 നും ബ്രസീല്‍-സെര്‍ബിയ മത്സരം ഇന്ത്യന്‍ സമയം അര്‍ധരാത്രി 12.30 നുമാണ്. വൈകിട്ട് 3.30ന് സ്വിറ്റ്‌സര്‍ലന്‍ഡ്-കാമറൂണ്‍, 6.30ന് ഉറുഗ്വെ-ദക്ഷിണ കൊറിയ എന്നിവയാണ് ഇന്നത്തെ മറ്റു മത്സരങ്ങള്‍.


കളം വാഴാന്‍ കാനറിപ്പട

ആറാം കിരീടം തേടിയിറങ്ങുന്ന ബ്രസീലിന് ആദ്യ മത്സരത്തില്‍ സെര്‍ബിയയാണ് എതിരാളികള്‍. ആരാധകര്‍ ഏറെ കാത്തിരിക്കുന്ന കാനറികളുടെ പടയിറക്കത്തിന് ഇന്ന് അര്‍ധരാത്രി 12.30 ന് ലോകം സാക്ഷ്യം വഹിക്കും. 2002ന് ശേഷം ഫൈനലിലെത്താന്‍ സാധിച്ചിട്ടില്ലെങ്കിലും ആത്മവിശ്വാസത്തിലും ശുഭപ്രതീക്ഷയിലുമാണ് ലോക റാങ്കിങ്ങിലെ ഒന്നാം സ്ഥാനക്കാരും ആരാധകരും.

മുഖ്യ എതിരാളികളായ അര്‍ജന്റീന തങ്ങളുടെ ആദ്യ മത്സരത്തില്‍ താരതമ്യേന ദുര്‍ബലരായ സൗദി അറേബ്യയോട് പരാജയപ്പെട്ടിരുന്നു. ഇതോടെ ബ്രസീല്‍-സെര്‍ബിയ മത്സരം പതിവിലും ശ്രദ്ധ നേടിയിട്ടുണ്ട്. വമ്പന്‍ ടീമുകള്‍ കുഞ്ഞന്‍ ടീമുകളോട് അപ്രതീക്ഷിതമായി തോല്‍വി വഴങ്ങുന്ന 'അട്ടിമറി ട്രെന്‍ഡ്' ആണ് ഇപ്പോള്‍ ഖത്തര്‍ ലോകകപ്പില്‍ ഉള്ളത്. അര്‍ജന്റീനക്കെതിരെ സൗദി നേടിയ വിജയം സെര്‍ബിയയ്ക്കടക്കം ആത്മവിശ്വാസം നല്‍കിയിട്ടുണ്ട്. റാങ്കിങ്ങില്‍ ഇരുപത്തിയൊന്നാം സ്ഥാനക്കാരായ സെര്‍ബിയ ബ്രസീലിനെ വിറപ്പിച്ച് 'അട്ടിമറി ട്രെന്‍ഡി'ന്റെ ഭാഗമാകുമോ എന്ന് ഇന്നറിയാം. എന്നാല്‍ സെര്‍ബിയയെ തോല്‍പ്പിച്ചാല്‍ ആദ്യ മത്സരം തോറ്റ അര്‍ജന്റീനയെക്കാള്‍ മുന്‍തൂക്കം കാനറികള്‍ക്ക് ലഭിക്കും.




നെയ്മര്‍, വിനീഷ്യസ് ജൂനിയര്‍, തിയാഗോ സില്‍വ തുടങ്ങി താരസമ്പന്നമാണ് ബ്രസീല്‍. അര്‍ജന്റീനയോട് കോപ്പ അമേരിക്ക ഫൈനലില്‍ തോറ്റതൊഴിച്ചാല്‍ ബ്രസീല്‍ അടുത്തൊന്നും പരാജയപ്പെട്ടിട്ടില്ല. എങ്കിലും വലിയ ചരിത്ര വിജയങ്ങളൊന്നും അവകാശപ്പെടാനില്ലാത്ത സെര്‍ബിയയെ ഒരിക്കലും വിലകുറച്ച് കാണാതെയായിരിക്കും ബ്രസീല്‍ കളത്തിലിറങ്ങുക.

പോരാടാന്‍ പോര്‍ച്ചുഗല്‍

ഖത്തര്‍ ലോകകപ്പിലെ കന്നിയങ്കത്തിനായി പറങ്കിപ്പട ഇന്നിറങ്ങും. ഗ്രൂപ്പ് എച്ചിലെ മത്സരത്തില്‍ ഘാനയെയാണ് റൊണാള്‍ഡോയും കൂട്ടരും ഇന്ന് നേരിടുക. ഇന്ത്യന്‍ സമയം രാത്രി 9.30 ന് ദോഹയിലെ സ്‌റ്റേഡിയം 974 ലാണ് കിക്കോഫ്. ഫുട്‌ബോള്‍ ഇതിഹാസം ക്രിസ്റ്റ്യാനോ റൊണാള്‍ഡോയുടെയും സംഘത്തിന്റെയും മത്സരങ്ങള്‍ ലോകമെമ്പാടുമുള്ള ആരാധകര്‍ ഏറെ ആവേശത്തോടെടെയാണ് കാത്തിരിക്കുന്നത്. കരിയറിലെ അവസാന ലോകകപ്പിനെത്തുന്ന റൊണാള്‍ഡോയും ആരാധകരും ലോകകപ്പില്‍ കുറഞ്ഞതൊന്നും പ്രതീക്ഷിക്കുന്നില്ല.




റൊണാള്‍ഡോക്കൊപ്പം ബ്രൂണോ ഫര്‍ണാണ്ടസ്, റൂയി പെട്രീഷ്യ, റാഫേല്‍ ലിയോ തുടങ്ങി താരനിബിഡവും ശക്തവുമായ ടീമാണ് ഇത്തവണ പോര്‍ച്ചുഗല്‍. എതിരാളികളെ വിലകുറച്ച് കാണുന്നുമില്ല. യൂറോപ്യന്‍ യോഗ്യതാ റൗണ്ടില്‍ സെര്‍ബിയയ്ക്ക് പിറകിലായി പോയെങ്കിലും പ്ലേ ഓഫ് കളിച്ചാണ് ഖത്തറിലെത്തിയത്. എന്നാല്‍ കഴിഞ്ഞ ലോകകപ്പില്‍ യോഗ്യത നേടാന്‍ കഴിയാതിരുന്ന ഘാന വമ്പന്മാരായ നൈജീരിയയെ പരാജയപ്പെടുത്തിയാണ് ലോകകപ്പ് പ്രവേശനം നേടിയത്.

ഫിഫ റാങ്കിങ്ങില്‍ നിലവില്‍ ഒമ്പതാം സ്ഥാനത്തുള്ള പോര്‍ച്ചുഗല്‍ ആണ് 61-ാം സ്ഥാനക്കാരായ ഘാനയെ നേരിടുന്നത്. കഴിഞ്ഞ ദിവസം ക്രിസ്റ്റ്യാനോ റൊണാള്‍ഡോ തന്റെ ക്ലബ്ബായ മാഞ്ചസ്റ്റര്‍ യുണൈറ്റഡ് വിട്ടിരുന്നു.

Story highlights: fifa worldcup 2022 matches

Next Story