ഗ്രൂപ്പ് ഘട്ട ഫിക്‌സ്ചറായി; മെസി 22-ന് ഇറങ്ങും, റൊണാള്‍ഡോയും നെയ്മറും 24-നും

ഈ വര്‍ഷം നവംബറില്‍ ഖത്തറില്‍ ആരംഭിക്കുന്ന ഫിഫ ഫുട്‌ബോള്‍ ലോകകപ്പിന്റെ ഗ്രൂപ്പുകള്‍ നിശ്ചയിച്ചതിനു പിന്നാലെ ഗ്രൂപ്പ് പോരാട്ടങ്ങളുടെ ഫിക്‌സ്ചറുകളും പുറത്തുവിട്ടു. നവംബര്‍ 21-ന് നടക്കുന്ന ഉദ്ഘാടന മത്സരത്തില്‍ ആതിഥേയരായ ഖത്തറും ലാറ്റിനമേരിക്കന്‍ ടീമായ ഇക്വഡോറും ഏറ്റുമുട്ടും.

പതിവില്‍ നിന്നു വ്യത്യസ്തമായി ആദ്യ ദിനം നാലു മത്സരങ്ങള്‍ അരങ്ങേറും. ഗ്രൂപ്പ് എയിലെയും ഗ്രൂപ്പ് ബിയിലെയും മുഴുവന്‍ ടീമുകളും ആദ്യദിനം തന്നെ കളത്തിലുണ്ടാകൂം. ആരാധകര്‍ കാത്തിരിക്കുന്ന ലയണല്‍ മെസിയുടെയും ക്രിസ്റ്റിയാനോ റൊണാള്‍ഡോയുടെയും നെയ്മറിന്റെും ആദ്യ മത്സരങ്ങളുടെ തീയതിയും വ്യക്തമായിക്കഴിഞ്ഞു.

അര്‍ജന്റീനയും മെസിയും 22-ന് സൗദി അറേബ്യയ്‌ക്കെതിരേ ഇറങ്ങുമ്പോള്‍ 24-നാണ് നെയ്മറും ക്രിസ്റ്റിയാനോയും കളത്തില്‍ ഇറങ്ങുന്നത്. ബ്രസീലിന് ആദ്യ മത്സരത്തില്‍ സെര്‍ബിയയാണ് എതിരാളികളെങ്കില്‍ പോര്‍ച്ചുഗലിന് ഘാനയാണ് വെല്ലുവിളി ഉയര്‍ത്തുന്നത്. നിലവിലെ ചാമ്പ്യന്മാരായ ഫ്രാന്‍സ് 22-ന് പ്ലേ ഓഫ് കളിച്ചെത്തുന്ന ടീമിനെതിരേ(ഓസ്‌ട്രേലിയ/യു.എ.ഇ./പെറു) ആദ്യ മത്സരം കളിക്കുമ്പോള്‍ മുന്‍ ചാമ്പ്യന്മാരായ ജര്‍മനി 23-ന് ജപ്പാനെയും സ്‌പെയിന്‍ ന്യൂസിലന്‍ഡിനെയും നേരിടും.

നവംബര്‍ 21 മുതല്‍ ഡിസംബര്‍ രണ്ടു വരെയാണ് ഗ്രൂപ്പ് ഘട്ട മത്സരങ്ങള്‍ അരങ്ങേറുക. പ്രീ ക്വാര്‍ട്ടര്‍ പോരാട്ടങ്ങള്‍ ഡിസംബര്‍ മൂന്നു മുതല്‍ ആറു വരെയാണ്. ഡിസംബര്‍ ഒമ്പതിനും പത്തിനുമാണ് ക്വാര്‍ട്ടര്‍ പോരാട്ടങ്ങള്‍. 13-നും 14-നുമായി സെമി ഫൈനലും 17-ന് ലൂസേഴ്‌സ് ഫൈനലും അരങ്ങേറും. 18-നാണ് ഫൈനല്‍.

ഗ്രൂപ്പ് ഘട്ട ഫിക്‌സ്ചര്‍