Top

'ലഹരി ഉപയോഗിക്കുന്നവര്‍ മറ്റുള്ളവരെ ബുദ്ധിമുട്ടിക്കരുത്'; സ്വകാര്യതയില്‍ എന്തും ചെയ്യാമെന്ന് നിഖില

ലഹരി ഉപയോഗം ഒരോരുത്തരുടെയും വ്യക്തിപരമായ ചോയ്‌സ് ആണെന്നും നിഖില

22 Sep 2022 11:51 AM GMT
ഫിൽമി റിപ്പോർട്ടർ

ലഹരി ഉപയോഗിക്കുന്നവര്‍ മറ്റുള്ളവരെ ബുദ്ധിമുട്ടിക്കരുത്; സ്വകാര്യതയില്‍ എന്തും ചെയ്യാമെന്ന് നിഖില
X

സിനിമ ഇന്‍ഡസ്ട്രിയിലെ ലഹരി ഉപയോഗത്തെക്കുറിച്ച് നടി നിഖില വിമല്‍. ലഹരി വസ്തുക്കള്‍ കൂടുതല്‍ ഉപയോഗിക്കുന്നത് സിനിമയില്‍ ആണെന്നാണ് പറയുന്നതെന്നും എന്നാല്‍ എല്ലാ മേഖലയിലും ഇതിന്റെ ഉപയോഗം ഉണ്ടെന്നും നിഖില പറഞ്ഞു. ലഹരി ഉപയോഗം ഒരോരുത്തരുടെയും വ്യക്തിപരമായ ചോയ്‌സ് ആണെന്നും തനിക്ക് അതിനോട് താല്‍പ്പര്യമില്ലെന്നും നിഖില വ്യക്തമാക്കി. റിപ്പോര്‍ട്ടര്‍ ടിവി മീറ്റ് ദി എഡിറ്റേഴ്‌സില്‍ ആയിരുന്നു നടിയുടെ പ്രതികരണം.

ലഹരി ഉപയോഗിക്കുന്നത് ചുറ്റുമുള്ളവര്‍ക്ക് ബുദ്ധിമുട്ടുണ്ടാകാത്ത രീതിയില്‍ ആവണമെന്നും നിഖില അഭിപ്രായപ്പെട്ടു. സ്വകാര്യതയില്‍ എന്തും ചെയ്യാനുള്ള സ്‌പേസ് ഇവിടെ ഉണ്ട്. മറ്റുള്ളവരെ സ്വാധീനിക്കാതിരിക്കുക. മറ്റുള്ളവര്‍ക്ക് ബുദ്ധിമുട്ടാവുന്ന സ്ഥലത്ത് അത് ചെയ്യുന്നത് മോശമാണ്. ചെയ്യരുതെന്ന് പറഞ്ഞാല്‍ ആരും ചെയ്യാതിരിക്കുന്ന കാര്യമല്ല അതെന്നും നടി കൂട്ടിച്ചേര്‍ത്തു. താന്‍ ആക്ടീവ് ആയിട്ടുള്ളയാളാണ്. ലഹരി ഉപോഗിക്കാതെ തനിക്ക് ആക്ടീവ് ആയിരിക്കാം എന്നുണ്ടെങ്കില്‍ പിന്നെ താന്‍ എന്തിനാണ് അത് ഉപയോഗിക്കുന്നതെന്നും നിഖില ചോദിക്കുന്നു.

നിഖില വിമലിന്റെ വാക്കുകള്‍

സിഗരറ്റ് വലിക്കുന്നത് പോലെ തന്നെ ഒരു കാര്യമാണ് ലഹരി ഉപോയോഗവും. എന്റെ ചെറുപ്പത്തില്‍ വെള്ളമടിക്കുന്നതും സിഗരറ്റ് വലിക്കുന്നതും എനിക്ക് വലിയ പ്രശ്‌നമായി തോന്നിയിട്ടുണ്ട്. ഇപ്പോള്‍ അത് സോഷ്യല്‍ ഡ്രിങ്കിങ് ആയി, നിങ്ങളുടെ സര്‍ക്കിളില്‍ അത് ചെയ്യുന്നത് കൊണ്ട് തെറ്റില്ല എന്നായി. വൃത്തിയായിട്ട് ചെയ്യാന്‍ അറിയുന്നവര്‍ ചെയ്യുന്നതില്‍ എനിക്ക് എന്തെങ്കിലും ബുദ്ധിമുട്ട് ഉണ്ടെന്ന് തോന്നുന്നില്ല. ആരെയും ബുദ്ധിമുട്ടിപ്പിക്കാതെ ചെയ്യുന്നവര്‍ ഉണ്ടല്ലോ. അത് അവരുടെ വ്യക്തപരമായ ചോയ്‌സ് ആണ്. മറ്റുള്ളവര്‍ക്ക് ബുദ്ധിമുട്ടുണ്ടാക്കുന്ന തരത്തില്‍ ചെയ്യരുത്. നിങ്ങളുടെ സ്വകാര്യതയില്‍ എന്തും ചെയ്യാനുള്ള സ്‌പേസ് ഇവിടെ ഉണ്ട്.

ലഹരി ഉപയോഗിച്ചാല്‍ മാത്രമേ എന്റെ സിനിമയില്‍ അഭിനയിപ്പിക്കൂ എന്ന് പറഞ്ഞ് എന്നെ ആരും സമീപിച്ചിട്ടില്ല. വീടിന് ഉള്ളില്‍ നിന്നും ചെയ്യത് പോലെയല്ല പുറത്തിറങ്ങി ചെയ്യുന്നത്. മറ്റുള്ളവര്‍ക്ക് ബുദ്ധിമുട്ടാവുന്ന സ്ഥലത്ത് അത് ചെയ്യുന്നത് മോശമാണ്. ചെയ്യരുതെന്ന് പറഞ്ഞാല്‍ ആരും ചെയ്യാതിരിക്കുന്ന കാര്യമല്ല അത്. മറ്റുള്ളവരെ സ്വാധീനിക്കാതിരിക്കുക എന്നുള്ളതാണ്. അവര്‍ക്ക് ഇഷ്ടമുണ്ടെങ്കില്‍ അത് ചെയ്യാം. എന്റെ ചോയ്‌സ് അത് വേണ്ട എന്നുള്ളതാണ്. ഞാന്‍ ആക്ടീവ് ആയിട്ടുള്ളയാളാണ്. അതില്ലാതെ എനിക്ക് ആക്ടീവ് ആയിരിക്കാം എന്നുണ്ടെങ്കില്‍ പിന്നെ ഞാന്‍ എന്തിനാണ് അത് ഉപയോഗിക്കുന്നത്. അങ്ങനെ ഉപയോഗിക്കുന്നവരുടെ വൈബിനോട് ചേരുന്ന വൈബ് എനിക്ക് അല്ലാതെ തന്നെ ഉണ്ട്. ഇനി ഉപയോഗിച്ചാലെ അത് കിട്ടൂ എന്നുണ്ടെങ്കില്‍ അത് വേണ്ട. അത് ഓവര്‍ വൈബ് ആയിപോകും, താങ്ങാന്‍ പറ്റില്ല. സിനിമ മേഖലയിലാണ് ലഹരി വസ്തുക്കള്‍ ഉപയോഗിക്കുന്നത് കൂടുതലെന്ന് പറയുന്നു. എല്ലാ മേഖലയിലും ഇതിന്റെ ഉപയോഗം ഉണ്ട്.

Story Highlights: Nikhila Vimal about drugs using in malaylam cinema industry

Next Story