Top

'ഉറച്ച നിലപാടും സാമൂഹ്യ പ്രതിബന്ധതയുമുള്ള കലാകാരൻ'; വിനയന്റെ മാതൃകാപരമായ ഇടപെടലാണ് 'പത്തൊമ്പതാം നൂറ്റാണ്ടെ'ന്ന് മന്ത്രി കെ രാജൻ

'ചരിത്രകാരൻമാർ തമസ്കരിച്ച ആ വീര ചേകവരെ മനോഹരമായി അവതരിപ്പിച്ചിരിക്കുകയാണ് വിനയൻ'

11 Sep 2022 7:59 AM GMT
ഫിൽമി റിപ്പോർട്ടർ

ഉറച്ച നിലപാടും സാമൂഹ്യ പ്രതിബന്ധതയുമുള്ള കലാകാരൻ; വിനയന്റെ മാതൃകാപരമായ ഇടപെടലാണ് പത്തൊമ്പതാം നൂറ്റാണ്ടെന്ന് മന്ത്രി കെ രാജൻ
X

വിനയന്റെ സംവിധാനത്തിലൊരുങ്ങിയ ചരിത്ര സിനിമ 'പത്തൊമ്പതാം നൂറ്റാണ്ടി'ന് മികച്ച പ്രതികരണമാണ് ലഭിച്ചുകൊണ്ടിരിക്കുന്നത്. ബി​ഗ് സ്ക്രീനിൽ ആവേശമുണർത്തുന്ന ചിത്രത്തെ പ്രശംസിച്ചെത്തിയിരിക്കുകയാണ് ഇപ്പോൾ റവന്യൂ മന്ത്രി കെ രാജന്‍. സിനിമ വിനയൻ്റെ മാതൃകാപരവും ശ്ലാഖനീയവുമായ ഇടപെടലാണ് എന്നും 'പത്തൊമ്പതാം നൂറ്റാണ്ടി'ലൂടെ ചരിത്രകാരൻമാർ തമസ്കരിച്ച ആ വീര ചേകവരെ മനോഹരമായി അവതരിപ്പിച്ചിരിക്കുകയാണ് എന്നും മന്ത്രി ഫേസ്ബുക്കിലൂടെ കുറിച്ചു.

മന്ത്രി കെ രാജന്റെ കുറിപ്പ്

ചരിത്രകാരന്മാർ അർഹിച്ച പ്രാധാന്യത്തോടെ അവതരിപ്പിക്കാത്ത വീര നായകനാണ് ആദ്യത്തെ കേരളീയ നവോത്ഥാന നായകൻ ശ്രീ ആറാട്ടുപുഴ വേലായുധപ്പണിക്കർ. സവർണ്ണ മേധാവിത്വത്തിനെതിരെ പാർശ്വവൽക്കരിക്കപ്പെട്ട ഒരു ജനതയെ അണിനിരത്തി അയിത്തത്തിനും അനാചാരങ്ങൾക്കുമെതിരെ ഐതിഹാസിക പോരാട്ടങ്ങളാണ്. ആ ധീര പോരാളി നടത്തിയത്. ചരിത്രകാരൻമാർ തമസ്കരിച്ച ആ വീര ചേകവരെ അതി മനോഹരമായി ആവേശം തുളുമ്പുന്ന മുഹൂർത്തങ്ങളിലൂടെ അവതരിപ്പിച്ചിരിക്കുകയാണ് മലയാളത്തിൻ്റെ ജനകീയ ചലച്ചിത്രകാരൻ ശ്രീ വിനയൻ.

കേരളീയ നവോത്ഥാനത്തിലെ ജ്വലിക്കുന്ന അദ്ധ്യായമായ ചേർത്തല നങ്ങേലിയെയും അച്ചിപ്പുടവസമരവും മുക്കൂത്തി സമരവുമുൾപ്പടെയുള്ള യുള്ള ഐതിഹാസിക പോരാട്ടങ്ങൾ പത്തൊമ്പതാം നൂറ്റാണ്ട് എന്ന ചിത്രത്തിലൂടെ പുതുതലമുറക്കായി ശീ. വിനയൻ അവതരിപ്പിച്ചിരിക്കുന്നു. ഒരു സാംസ്കാരിക പ്രവർത്തകൻ എന്ന നിലയിൽ ശ്രീ.വിനയൻ്റെ മാതൃകാപരവും ശ്ലാഖനീയവുമായ ഇടപെടലാണ് പത്തൊമ്പതാം നൂറ്റാണ്ട് എന്ന ചരിത്ര സിനിമ. ഉറച്ച നിലപാടും സാമൂഹ്യ പ്രതിബന്ധതയുമുള്ള കലാകാരൻ, ഏറെ പ്രിയങ്കരനായ വിനയേട്ടനും ഈ ചരിത്രദൗത്യത്തിൻ്റെ ഭാഗമായ ചിത്രത്തിൻ്റെ അണിയറ പ്രവർത്തകർക്കും ഹൃദയാഭിവാദനങ്ങൾ.

വിനയന്റെ ഗംഭീര തിരിച്ചുവരവെന്നാണ് പല പ്രേക്ഷകരും 'പത്തൊമ്പതാം നൂറ്റാണ്ടിനെ'ക്കുറിച്ച് അഭിപ്രായപ്പെടുന്നത്. ബിഗ് ബജറ്റിലൊരുങ്ങിയ ചിത്രത്തിന്റെ വിഷ്വല്‍ ക്വാളിറ്റിയെക്കുറിച്ചും മികച്ച പ്രതികരണമാണ് ലഭിക്കുന്നത്. മലയാളത്തിലെ എക്കാലത്തെയും മികച്ച പിരിയോഡിക് ഡ്രാമയെന്നുമാണ് പറയുന്നു. ആറാട്ടുപുഴ വേലായുധപ്പണിക്കരായി എത്തി സിജു വിൽസണിന്റെ അടക്കമുള്ള അഭിനേതാക്കളുടെ പ്രകടനം സിനിമയ്ക്ക് ഗുണം ചെയ്തിട്ടുണ്ടെന്നും അഭിപ്രായങ്ങളുണ്ട്.

സാമൂഹിക പരിഷ്‌കര്‍ത്താവായിരുന്ന ആറാട്ടുപുഴ വേലായുധപ്പണിക്കരുടെ ജീവിതമാണ് സിനിമയുടെ പ്രമേയം. ചിത്രത്തില്‍ വന്‍ താരനിരയാണുള്ളത്. വിനയന്‍ തന്നെ തിരക്കഥയെഴുതിയ പത്തൊമ്പതാം നൂറ്റാണ്ട് നിര്‍മ്മിക്കുന്നത് ഗോകുലം മൂവീസിന്റെ ബാനറില്‍ ഗോകുലം ഗോപാലന്‍ ആണ്. കയാദു ലോഹര്‍ ആണ് നായിക. അനൂപ് മേനോന്‍, ചെമ്പന്‍ വിനോദ്, സുദേവ് നായര്‍, വിഷ്ണു വിനയന്‍, സുരേഷ് കൃഷ്ണ, സുധീര്‍ കരമന, ദീപ്തി സതി, സെന്തില്‍, മണികണ്ഠന്‍ ആചാരി, പൂനം ബജുവ, ടിനി ടോം തുടങ്ങിയവര്‍ക്കൊപ്പം നിര്‍മ്മാതാവ് ഗോകുലം ഗോപാലനും വളരെ ശ്രദ്ധേയമായ വേഷം ചെയ്യുന്നു. പത്തൊമ്പതാം നൂറ്റാണ്ടിന്റെ പശ്ചാത്തല സംഗീതം ഒരുക്കിയത് തമിഴിലെ പ്രശ്‌സ്ത സംഗീതജ്ഞന്‍ സന്തോഷ് നാരായണനാണ്.

Story highlights: Minister K Rajan About Pathonpatham Noottandu movie directed by Vinayan

Next Story