Top

ബിജെപി നേതൃത്വം വേണ്ടത്ര ഫണ്ട് നല്‍കിയില്ലെന്ന പരാതിയുമായി സികെ ജാനു; നേതാക്കള്‍ ഒരു കോടി തട്ടിയെടുത്തെന്ന് വ്യാപക ആരോപണം

തന്റെ പാര്‍ട്ടിയുടെ രണ്ട് നേതാക്കളെ ബിജെപി പ്രവര്‍ത്തകര്‍ വാഹനത്തില്‍ നിന്ന് ഇറക്കിവിട്ട് അപമാനിച്ചെന്ന ഗുരുതരമായ ആരോപണവും ജാനു ഉയര്‍ത്തി.

30 April 2021 10:56 PM GMT

ബിജെപി നേതൃത്വം വേണ്ടത്ര ഫണ്ട് നല്‍കിയില്ലെന്ന പരാതിയുമായി സികെ ജാനു; നേതാക്കള്‍ ഒരു കോടി തട്ടിയെടുത്തെന്ന് വ്യാപക ആരോപണം
X

തെരഞ്ഞെടുപ്പ് പ്രചാരണത്തിനായി ബിജെപി നേതൃത്വം വേണ്ടത്ര പണം നല്‍കിയില്ലെന്ന ആരോപണവുമായി വയനാട് സുല്‍ത്താന്‍ ബത്തേരിയിലെ എന്‍ഡിഎ സ്ഥാനാര്‍ഥി സികെ ജാനു. ബിജെപി തെരഞ്ഞെടുപ്പ് പ്രചരണത്തിന് വേണ്ടരീതിയില്‍ സഹകരിച്ചില്ലെന്നും ആവശ്യത്തിന് ഫണ്ട് എത്തിച്ചില്ലെന്നും ചൂണ്ടിക്കാട്ടി ജാനു പാര്‍ട്ടി സംസ്ഥാന അധ്യക്ഷന്‍ കെ സുരേന്ദ്രനാണ് പരാതി നല്‍കിയത്. തെരഞ്ഞെടുപ്പ് പ്രചരണത്തിനായി മണ്ഡലത്തിലെത്തിച്ച ഒരുകോടി രൂപ ബിജെപിയിലെ ചിലര്‍ തട്ടിയെടുത്തതായി സികെ ജാനു അധ്യക്ഷയായ ജനാധിപത്യ രാഷ്ട്രീയ പാര്‍്ട്ടിയ്ക്കുള്ളില്‍ വ്യാപകമായ ആരോപണം ഉയരുന്നതായി ദേശാഭിമാനി ദിനപ്പത്രം റിപ്പോര്‍ട്ട് ചെയ്യുന്നു.

ബിജെപി പ്രവര്‍ത്തകര്‍ തെരഞ്ഞെടുപ്പില്‍ മനപ്പൂര്‍വ്വം വീഴ്ച്ച വരുത്തിയെന്ന് ആരോപിച്ചുകൊണ്ടാണ് ജാനുവിന്റെ പരാതി. കഴിഞ്ഞ തെരഞ്ഞെടുപ്പില്‍ തനിക്ക് ലഭിച്ച വോട്ടിനേക്കാള്‍ താഴെയാകും തനിക്ക് ഇത്തവണ ലഭിക്കുന്ന വോട്ടുകളെന്ന് ജാനു തന്നെ പരാതിയില്‍പ്പറയുന്നു. അതിന് കാരണം പ്രചരണത്തില്‍ സംഭവിച്ച വീഴ്ച്ചയാണ്. പ്രചരണം ആരംഭിച്ചപ്പോള്‍ മുതല്‍ ജില്ലാ നേതൃത്വം നിസ്സഹരിച്ചെന്നും ജാനു പറഞ്ഞു. തന്റെ പാര്‍ട്ടിയുടെ രണ്ട് നേതാക്കളെ ബിജെപി പ്രവര്‍ത്തകര്‍ വാഹനത്തില്‍ നിന്ന് ഇറക്കിവിട്ട് അപമാനിച്ചെന്ന ഗുരുതരമായ ആരോപണവും ജാനു ഉയര്‍ത്തി. കേന്ദ്ര ആഭ്യന്തരമന്ത്രി അമിത് ഷാ പ്രചരണത്തിനെത്തിയത് തനിക്ക് തീരെ പ്രയോജനം ചെയ്യില്ല. ജില്ലയിലെ യഥാര്‍ഥ വിഷയങ്ങള്‍ ഉയര്‍ത്തി പ്രചരണം നടത്താന്‍ സാധിച്ചില്ലെന്നും ജാനു പരാതിയില്‍ വ്യക്തമാക്കി.

ജെആര്‍പി പ്രവര്‍ത്തകരെ വാഹനത്തില്‍ നിന്നും ഇറക്കിവിട്ട സംഭവം ഒരു രാഷ്ട്രീയ പാര്‍ട്ടി എന്ന നിലയില്‍ തങ്ങളുടെ ആത്മാഭിമാനത്തെ മുറിപ്പെടുത്തിയെന്ന് ജാനു പരാതിയില്‍ സൂചിപ്പിച്ചു. ഇത് തങ്ങളുടെ നിലനില്‍പ്പിനെത്തന്നെ ബാധിക്കുന്ന സംഭവമായിപ്പോയി. ബിജെപിയെ സംബന്ധിച്ച് ദളിത് വിരുദ്ധര്‍ എന്ന ലേബല്‍ ഊട്ടിയുറപ്പിക്കുന്നതാണ് ഈ സംഭവമെന്നും ജാനു പരാതിയില്‍പ്പറഞ്ഞിട്ടുണ്ട്. ബിജെപി നേതാക്കള്‍ ഒരു കോടി രൂപ തട്ടിയെടുത്തെന്ന് വ്യാപകമായ ആക്ഷേപം നിലനില്‍ക്കുന്ന പശ്ചാത്തലത്തില്‍ കൊടകര കുഴല്‍പ്പണ കവര്‍ച്ചയായി വയനാട്ടിലെ വിവാദങ്ങള്‍ക്ക് ബന്ധമുണ്ടോയെന്നും പൊലീസ് അന്വേഷിച്ചുവരികയാണ്.

Next Story