‘ഇരുപത് വര്‍ഷം അഭയം നല്‍കിയ പിണറായിയെ ഒരിക്കലും തള്ളിപറയില്ല’; വീക്ഷണം മുഖപ്രസംഗത്തിന് ചെറിയാന്‍ ഫിലിപ്പിന്റെ മറുപടി

കോണ്‍ഗ്രസിലേക്ക് സ്വാഗതം ചെയ്തുള്ള വീക്ഷണം മുഖപ്രസംഗത്തിന് പിന്നാലെ നിലപാട് വ്യക്തമാക്കി ചെറിയാന്‍ ഫിലിപ്പ്. ലാഭനഷ്ടങ്ങളുടെ കണക്ക് പുസ്തകം സൂക്ഷിച്ചിട്ടില്ലെന്നും ഇരുപത് വര്‍ഷക്കാരം രാഷ്ട്രീയ അഭയം നല്‍കിയ പിണറായി വിജയനെ ഒരിക്കലും തള്ളി പറയില്ലെന്നും ചെറിയാന്‍ ഫിലിപ്പ് പറഞ്ഞു.ചെറിയാന്‍ ഫിലിപ്പിന് സിപിഐഎം രാജ്യസഭാ സീറ്റ് നല്‍കാതെ വന്നതോടെയായിരുന്നു അദ്ദേഹത്തെ കോണ്‍ഗ്രസിലേക്ക് സ്വാഗതം ചെയ്ത് കൊണ്ട് കോണ്‍ഗ്രസ് മുഖപത്രമായ വീക്ഷണത്തില്‍ മുഖപ്രസംഗം വന്നത്. തെറ്റിതിരുത്തിയാല്‍ പാര്‍ട്ടിയിലേക്ക് സ്വാഗതം ചെയ്യാമെന്നും പൂമുഖത്ത് ഒരു കസേരയിട്ട് ഇരുത്താമെന്നുമായിരുന്നു വീക്ഷണം മുഖപ്രസംഗത്തില്‍ പറയുന്നത്. പിന്നാലെയാണ് ചെറിയാന്‍ ഫിലിപ്പ് തന്റെ നിലപാട് വ്യക്തമാക്കിയത്.

ഇടതിനൊപ്പം തന്നെ തുടരുമെന്ന് പറഞ്ഞ ചെറിയാന്‍ ഫിലിപ്പ് എ കെ ആന്റണിക്കും ഉമ്മന്‍ ചാണ്ടിക്കുമെതിരെ ചില സന്ദര്‍ഭങ്ങളില്‍ സമനില തെറ്റി വൈകാരികമായി പ്രതികരിച്ചത് തെറ്റായിരുന്നുവെന്ന് ബോദ്ധ്യപ്പെട്ടുവെന്നും ശരീരത്തിലും മനസ്സിലും കറ പുരളാത്തതിനാല്‍ മരണം വരെ കേരളത്തിലെ പൊതു സമൂഹത്തില്‍ തലയുയര്‍ത്തി നില്‍ക്കുമെന്നും കൂട്ടിചേര്‍ത്തു.

ചെറിയാന്‍ ഫിലിപ്പിന്റെ പ്രതികരണം-

“രാഷ്ട്രീയത്തില്‍ തുടര്‍ന്നാലും ഇല്ലെങ്കിലും ഇരുപതു വര്‍ഷം രാഷ്ടീയ അഭയം നല്‍കിയ പിണറായി വിജയനെ ഒരിക്കലും തള്ളിപ്പറയില്ല.
ബാല്യം മുതല്‍ എന്റെ ജീവിതത്തിന്റെ ഭാഗമായിരുന്ന എ കെ ആന്റണിക്കും ഉമ്മന്‍ ചാണ്ടിക്കുമെതിരെ ചില സന്ദര്‍ഭങ്ങളില്‍ സമനില തെറ്റി വൈകാരികമായി പ്രതികരിച്ചത് തെറ്റായിരുന്നുവെന്ന് പിന്നീട് ബോദ്ധ്യപ്പെട്ടു.. ഇക്കാര്യം ആന്റണിയേയും ഉമ്മന്‍ ചാണ്ടിയേയും വര്‍ഷങ്ങള്‍ക്കു മുമ്പുതന്നെ നേരില്‍ അറിയിച്ചിട്ടുണ്ട്. ഇവര്‍ രണ്ടു പേരും ആത്മബന്ധമുള്ള ജേഷ്ഠ സഹോദരന്മാരാണ്.
കോണ്‍ഗ്രസിനും തനിക്കും നല്‍കിയ സേവനങ്ങള്‍ക്ക് പ്രത്യുപകാരമായി ചെറിയാന്‍ ഫിലിപ്പിന് ഒരു സഹായവും ചെയ്യാന്‍ കഴിയാത്തതില്‍ തനിക്ക് തീവ്ര ദു:ഖമുണ്ടെന്നു് കേന്ദ്ര മന്ത്രിയായിരിക്കെ എ കെ ആന്റണി 2010 ല്‍ കെ.ടി ഡി.സിയുടെ ഒരു ചടങ്ങില്‍ പറഞ്ഞത് ടൂറിസം മന്ത്രി കോടിയേരി ബാലകൃഷ്ണന്റെ സാന്നിദ്ധ്യത്തിലാണ്.
ചെറിയാന്‍ ഫിലിപ്പ് ആദര്‍ശവാനാണെന്നും പറയുന്നതില്‍ മാത്രമല്ല നടപ്പാക്കുന്നതില്‍ നിര്‍ബന്ധമുള്ളയാളാണെന്നും നിയമസഭാ സാമാജികത്വത്തിന്റെ അമ്പതാം വാര്‍ഷികത്തില്‍ ഒരു അഭിമുഖത്തില്‍ ഉമ്മന്‍ ചാണ്ടി പറഞ്ഞിരുന്നു.
അരനൂറ്റാണ്ടിലേറെക്കാലത്തെ രാഷ്ട്രിയ ജീവിതത്തില്‍ ആരെയും ദ്രോഹിക്കുകയോ ശത്രുക്കളെ സൃഷ്ടിക്കുകയോ ചെയ്തിട്ടില്ല. കോണ്‍ഗ്രസിലും സി പി ഐ എം ലും ഇതര രാഷ്ട്രീയ കക്ഷികളിലും വിവിധ മത-സമുദായ സംഘടനകളിലും മാദ്ധ്യമങ്ങളിലും ആയിരക്കണക്കിന് ഉറ്റ സുഹൃത്തുക്കളാണുള്ളത്.
ശരീരത്തിലും മനസ്സിലും കറ പുരളാത്തതിനാല്‍ മരണം വരെ കേരളത്തിലെ പൊതു സമൂഹത്തില്‍ തലയുയര്‍ത്തി നില്‍ക്കും. ഒരു രാഷ്ടീയ ഭിക്ഷാംദേഹിയോ ഭാഗ്യാന്വേഷിയോആകില്ല. ലാഭനഷ്ടങ്ങളുടെ കണക്കു പുസ്തകം സൂക്ഷിച്ചിട്ടില്ല.
1976 മുതല്‍ 1982 വരെ ഞാന്‍ വീക്ഷണത്തിന്റെ രാഷ്ട്രീയ ലേഖകനായിരുന്നു. ഗോഹട്ടി എ.ഐ സി സി സമ്മേളനത്തില്‍ അടിയന്തിരാവസ്ഥക്കെതിരായ എ കെ ആന്റണിയുടെ പ്രസംഗം സെന്‍സര്‍ഷിപ്പ് നിയമങ്ങള്‍ ലംഘിച്ച് റിപ്പോര്‍ട്ട് ചെയ്തത് ഞാനാണ്. വീക്ഷണത്തില്‍ ചില വേളകളില്‍ മുഖപ്രസംഗം എഴുതിയിട്ടുമുണ്ട്.”

രാഷ്ട്രീയത്തിൽ തുടർന്നാലും ഇല്ലെങ്കിലും ഇരുപതു വർഷം രാഷ്ടീയ അഭയം നൽകിയ പിണറായി വിജയനെ ഒരിക്കലും തള്ളിപ്പറയില്ല.ബാല്യം…

Posted by Cherian Philip on Monday, April 19, 2021

കഴിഞ്ഞ തവണയും രാജ്യസഭാ സീറ്റിലേക്ക് ചെറിയാന്‍ ഫിലിപ്പിന്റെ പേര് ഉയര്‍ന്നു കേട്ടിരുന്നു. എന്നാല്‍ കഴിഞ്ഞ തവണ സീറ്റ് നല്‍കിയില്ലെങ്കിലും ഇത്തവണ പ്രതീക്ഷിച്ചിരുന്നു. എന്നാല്‍ ഇത്തവണയും പേര് ഇല്ലാതെ വന്നതോടെയാണ് ചെറിയാന്‍ ഫിലിപ്പിനെ സിപിഐഎം അവഗണിച്ചുവെന്ന തരത്തില്‍ ചര്‍ച്ച ഉയര്‍ന്നത്.
രണ്ടുതവണ രാജ്യസഭാ സീറ്റ് വാഗ്ദാനം ചെയ്ത് ചെറിയാന്‍ ഫിലിപ്പിനെ സിപിഐഎം ചതിച്ചെന്നും അപരാധങ്ങള്‍ ഏറ്റുപറഞ്ഞ് കോണ്‍ഗ്രസിലേക്ക് തിരിച്ചുവരികയാണെങ്കില്‍ പാര്‍ട്ടി അദ്ദേഹത്തെ അര്‍ഹിക്കുന്ന പ്രാധാന്യത്തോടെ സ്വീകരിക്കുമെന്നും വീക്ഷണത്തിന്റെ മുഖപ്രസംഗത്തില്‍ പറയുന്നു. എന്നാല്‍ വീക്ഷണത്തിനെതിരെ കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ രംഗത്തെത്തി.
ചെറിയാന്‍ ഫിലിപ്പിന് വേണ്ടി മുഖപത്രം എഴുതേണ്ടിയിരുന്നില്ല എന്ന് അഭിപ്രായപ്പെട്ട മുല്ലപ്പള്ളി വീക്ഷണത്തിന്റെ ചുമതലയുള്ള ജനറല്‍ സെക്രട്ടറിയില്‍ നിന്നും വിശദീകരണം തേടുകയായിരുന്നു. പാര്‍ട്ടി അധ്യക്ഷന്‍ അറിയാതെ എങ്ങനെയാണ് മറ്റൊരു പാര്‍ട്ടി നേതാവിനെ പാര്‍ട്ടിയിലേക്ക് സ്വാഗതം ചെയ്തത് എന്നാണ് മുല്ലപ്പള്ളിയുടെ ചോദ്യം. പിന്നാലെ
ജനറല്‍ സെക്രട്ടറി ജയ്സണ്‍ ജോസഫ് മുഖപ്രസംഗത്തില്‍ ഖേദം അറിയിച്ചു.