ബംഗാള്‍ ഉള്‍ക്കടലില്‍ ന്യൂനമര്‍ദം; തെക്കന്‍ കേരളത്തില്‍ കനത്ത മഴയ്ക്ക് സാധ്യത, ടൗട്ടെക്ക് പിന്നാലെ യാസ് ചുഴലിക്കാറ്റ് മുന്നറിയിപ്പ്

ന്യൂഡല്‍ഹി: കേരളത്തില്‍ ഇത്തവണ കാലവര്‍ഷം നേരത്തെ എത്തുമെന്ന് കാലാവസ്ഥാ നിരീക്ഷണ കേന്ദ്രം. കാലവര്‍ഷം ആന്‍ഡമാന്‍ ദ്വീപിലെത്തിയതായി കാലാവസ്ഥാ കേന്ദ്രം അറിയിച്ചു. അതേസമയം, ബംഗാള്‍ ഉള്‍ക്കടലില്‍ നാളെയോടെ രൂപപ്പെടുന്ന ന്യൂനമര്‍ദത്തെ തുടര്‍ന്ന് തെക്കന്‍ കേരളത്തില്‍ കനത്ത മഴയ്ക്ക് സാധ്യതയുണ്ട്.

തിങ്കളാഴ്ച്ചയോടെ ന്യൂനമര്‍ദ്ദം യാസ് ചുഴലിക്കാറ്റായി മാറുമെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി. ഈ വര്‍ഷം ബംഗാള്‍ ഉള്‍ക്കടലില്‍ രൂപം കൊള്ളുന്ന ആദ്യ ചുഴലിക്കാറ്റാണ് യാസ്. വടക്കുപടിഞ്ഞാറ് ദിശയില്‍ സഞ്ചരിക്കുന്ന യാസ് ചുഴലിക്കാറ്റ് ബുധനാഴ്ചയോടെ അതിതീവ്ര ചുഴലിക്കാറ്റായി മാറി ബംഗാള്‍, ഒഡിഷ തീരം തൊടുമെന്നാണ് അറിയിച്ചിരിക്കുന്നത്.

അതേസമയം, ഇന്ന് രാവിലെ മുതല്‍ തന്നെ തിരുവനന്തപുരം, കൊല്ലം ജില്ലകളില്‍ കനത്ത മഴ ആരംഭിച്ചു. ഒപ്പം കാറ്റിനും ഇടിമിന്നലിനും സാധ്യതയുണ്ടെന്നും മുന്നറിയിപ്പുണ്ട്. തിരുവനന്തപുരം, കൊല്ലം, ആലപ്പുഴ, പത്തനംതിട്ട, ഇടുക്കി ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു.

ALSO READ: ഗാസയിലെ മാധ്യമസ്ഥാപനങ്ങൾക്ക് നേരെ നടന്ന ആക്രമണം, ഇസ്രായേലിനെതിരെ കെട്ടിട ഉടമ അന്താരാഷ്ട്ര നീതിന്യായ കോടതിയിൽ

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, കോഴിക്കോട്, കാസര്‍ഗോഡ് എന്നീ ജില്ലകളില്‍ ഒറ്റപ്പെട്ട സ്ഥലങ്ങളില്‍ മണിക്കൂറില്‍ 40 കി. മീ. വരെ വേഗതയില്‍ കാറ്റ് വീശിയടിക്കാനും ഇടിമിന്നലോട് കൂടിയ മഴയ്ക്കും സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്‍കിയിട്ടുണ്ട്.

ALSO READ: ‘മിസ്റ്റർ പ്രധാനമന്ത്രി,ചർച്ചകൾ പുനഃരംഭിക്കാനുള്ള ബാധ്യത താങ്കൾക്കാണ്’, മെയ് 26ന് കരിദിനം ആചരിക്കാൻ കർഷകസംഘടനകൾ