‘ഇങ്ങനെ വിലപിക്കുന്നതില്‍ എന്തര്‍ത്ഥം’; അഭിജിത്തിനോട് കോണ്‍ഗ്രസ് നേതാവ്

തെരഞ്ഞെടുപ്പ് തോല്‍വിയില്‍ നേതാക്കളെ കുറ്റം പറയുന്ന യുവനേതാക്കളാദ്യം കൃത്യമായ പ്രവര്‍ത്തനം നടത്തണമെന്ന് കോണ്‍ഗ്രസ് നേതാവ് അനില്‍ ബോസ്. തെരഞ്ഞെടുപ്പ് പരാജയം വരുമ്പോള്‍ എല്ലാം നേതാക്കളുടെ കുഴപ്പമാണെന്നും പാര്‍ട്ടിക്ക് അടിത്തറയില്ലെന്നും വിലപിക്കുന്നതില്‍ എന്ത് അര്‍ഥമാണുള്ളതെന്നും അനില്‍ ബോസ് റിപ്പോര്‍ട്ടര്‍ ടിവി എഡിറ്റേഴ്‌സ് അവറില്‍ ചോദിച്ചു.

കെഎസ്‌യു പുനസംഘടന നടന്നില്ലെന്ന് ആരോപിക്കുന്ന കെ എം അഭിജിത്ത് എന്തുകൊണ്ട് തന്റെ സ്ഥാനം രാജി വെയ്ക്കുന്നു എന്നു പറയാനുള്ള ആര്‍ജവം കാണിച്ചില്ലെന്നും അനില്‍ ബോസ് വിമര്‍ശിച്ചു.

യുഡിഎഫ് തട്ടിക്കൂട്ട് സംവിധാനമാണെന്നും കോണ്‍ഗ്രസ് ആള്‍ക്കൂട്ടമായി മാറിയെന്നും വിമര്‍ശിച്ച കെ എം അഭിജിത്തിന്റെ ഫേസ്ബുക്ക് പോസ്റ്റിനോട് പ്രതികരിക്കവെയാണ് കോണ്‍ഗ്രസ് നേതാവിന്റെ പരാമര്‍ശം.

അനില്‍ ബോസിന്റെ പ്രതികരണം:

തെരഞ്ഞെടുപ്പില്‍ സീറ്റ് കിട്ടുന്നതിന് മുന്‍പ് എന്തുകൊണ്ടിവര്‍ പറഞ്ഞില്ല, തിരുത്തേണ്ട കാര്യങ്ങള്‍ തിരുത്തണമെന്ന്? രണ്ട് വര്‍ഷത്തിലൊരിക്കല്‍ കെഎസ്‌യു പുനസംഘടന നടന്നില്ലെങ്കില്‍ ഞാന്‍ ആ സ്ഥാനം രാജി വെയ്ക്കുന്നു എന്നു പറയാനുള്ള ആര്‍ജവം എന്തുകൊണ്ട് കെ എം അഭിജിത്ത് കാണിച്ചില്ല? യൂത്ത് കോണ്‍ഗ്രസിന്റെ കൃത്യമായ പുനസംഘടന നടന്നില്ലെങ്കില്‍ ഞാന്‍ ഈ സ്ഥാനം ഒഴിയുകയാണ് എന്നു പറയാനുള്ള ആര്‍ജവം ഷാഫി കാണിച്ചില്ല?

കോണ്‍ഗ്രസ് പാര്‍ട്ടിയുടെ നേതാക്കന്മാരുടെ മുഖത്തുനോക്കി ഇതുപോലെ പറയാന്‍ ഇന്നത്തെ കെഎസ്‌യു നേതാക്കള്‍ക്കും യൂത്ത് കോണ്‍ഗ്രസ് നേതാക്കള്‍ക്കും കഴിയണമെങ്കില്‍ അവര്‍ കൃത്യമായ പ്രവര്‍ത്തനം നടത്തണം. ഒരു തെരഞ്ഞെടുപ്പിന്റെ പരാജയം വരുമ്പോള്‍ ഇതെല്ലാം നേതാക്കളുടെ കുഴപ്പമാണ്, നമുക്ക് അടിത്തറയില്ല എന്നൊക്കെ പറഞ്ഞ് വിലപിക്കുന്നതില്‍ എന്ത് അര്‍ഥമാണുള്ളത്. നമുക്ക് കിട്ടുന്ന ഉത്തരവാദിത്വങ്ങളില്‍ വളരെ അധ്വാനം വേണം ക്രിയാത്മകമായ പ്രവര്‍ത്തനം വേണം. 19 സീറ്റില്‍ ജയിച്ചപ്പോള്‍ ആരും രമേശ് ചെന്നിത്തലയ്ക്കും മുല്ലപ്പള്ളി രാമചന്ദ്രനും ആരും പൊന്മോതിരം ഇട്ടുകൊടുത്തില്ലല്ലോ.

ഒരു തെരഞ്ഞെടുപ്പില്‍ പരാജയം വന്നപ്പോള്‍ പാപഭാരങ്ങളെല്ലാം വെച്ചിട്ട് കേരളത്തില്‍ മുഴുവന്‍ നേതാക്കള്‍ക്കും കുഴപ്പമാണ് എന്നു പറയുന്നതല്ല. നേതാക്കള്‍ക്കും അണികള്‍ക്കും ഒരുപോലെ കുഴപ്പമുണ്ട്. അത് ഫേസ്ബുക്കില്‍ എഴുതുകയും പത്രപ്രസ്താവനകള്‍ നടത്തുന്നതിനും അപ്പുറം ഉത്തരവാദിത്വപ്പെട്ട സ്ഥാനങ്ങളില്‍ ഇരുന്നുകൊണ്ട് അവര്‍ നെഞ്ചില്‍ കൈവെച്ച് അവരോട് ചോദിക്കണം.

അവര്‍ക്ക് ഈ സ്ഥാനമാനങ്ങള്‍ കിട്ടിയിട്ടുള്ളത് ഗ്രൂപ്പുകളുടെ പേരിലാണ്. ആ ഗ്രൂപ്പിന്റെ പേരില്‍ വന്നതുകൊണ്ട് അവര്‍ പലപ്പോഴും മൗനം പാലിച്ചു. ആ മൗനമാണ് ഈ പാര്‍ട്ടിക്കുണ്ടായ അപകടത്തിന് കാരണമെന്ന് ആത്മാര്‍ത്ഥമായി തിരുത്തിപറയാന്‍ കേരളത്തിലെ പുതിയ തലമുറ തയ്യാറാകണം.

ഫിറോസ് കുന്നംപറമ്പിലിനേയും ധര്‍മ്മജന്‍ ബോള്‍ഗാട്ടിയേയും സ്ഥാനാര്‍ത്ഥിയാക്കിയതിനെ വിമര്‍ശിച്ച് പ്രസ്ഥാനവനയിറക്കിയവരും തെരഞ്ഞെടുപ്പ് സമയത്ത് സ്വീകരിച്ച നടപടികളെക്കുറിച്ച് ആക്ഷേപമുള്ളവരും എന്തുകൊണ്ട് ആ സമയത്ത് ഇതിനെക്കുറിച്ച് പ്രതികരിച്ചില്ല? തനിക്ക് എങ്ങനെയെങ്കിലും പാലം കടക്കണമെന്ന് ചിന്തിച്ച്, തനിക്ക് സീറ്റ് കിട്ടി സേഫായാല്‍ ഒകെ എന്ന് ചിന്തിക്കുന്ന വികാരത്തിലേക്ക് പുതിയ തലമുറ മാറി. പാളിച്ചകളുണ്ടെങ്കില്‍ അത് അംഗീകരിച്ച് കൂട്ടായി തിരുത്താന്‍ തയ്യാറാകണം. അത് ഒരാളുടെ തലയില്‍ കെട്ടിവെച്ച്, ഇതെല്ലാം കുത്തഴിഞ്ഞതാണെന്ന് പ്രതികരിക്കുന്നത് ശരിയല്ല.

Also Read: ‘യുഡിഎഫ് തട്ടിക്കൂട്ട് സംവിധാനം, കോണ്‍ഗ്രസ് ആള്‍ക്കൂട്ടം’; തുറന്നടിച്ച് കെഎസ്‌യു സംസ്ഥാന പ്രസിഡന്റ്

കെഎം അഭിജിത്ത് പറഞ്ഞത്:
”ഇവിടെ പറയാന്‍ ഉദ്ദേശിച്ചതല്ല..,
പതിനഞ്ചാമത് കേരള നിയമസഭാ തെരഞ്ഞെടുപ്പില്‍ വലിയ തിരിച്ചടിയാണ് കേരളത്തില്‍ കോണ്‍ഗ്രസ്സ് പാര്‍ട്ടി നേരിട്ടതെന്ന കാര്യത്തില്‍ തര്‍ക്കമില്ല. മുഖ്യമന്ത്രിയുടെ ഓഫീസ് കേന്ദ്രീകരിച്ച് നടന്ന സ്വജനപക്ഷപാതവും, അഴിമതികളും വേണ്ട രീതിയില്‍ ജനങ്ങളിലേക്കെത്തിക്കാന്‍ സാധിക്കാത്തതും, കഴിഞ്ഞ സര്‍ക്കാരില്‍ അഞ്ച് മന്ത്രിമാര്‍ രാജിവെക്കേണ്ടി വന്ന ക്യാബിനറ്റായിരുന്നുവെന്നതുള്‍പ്പടെ ജനങ്ങള്‍ക്കിടയില്‍ ചര്‍ച്ചയാക്കാന്‍ യു.ഡി.എഫിന് സാധിക്കാതെ പോയതും, കഴിഞ്ഞ ഒരു വര്‍ഷക്കാലമായി കോവിഡ് മഹാമാരിക്കിടയില്‍ മുഖ്യമന്ത്രിയുടെ ദിനംപ്രതിയുള്ള പത്രസമ്മേളനങ്ങളും, കിറ്റ് വിതരണവുമെല്ലാം ജനങ്ങളെ സ്വാധീനിക്കാന്‍ സാധിച്ചതും, മത-സാമുദായിക സംഘടനകളെ കൂടെ നിര്‍ത്താന്‍ സാധിച്ചതും, കോണ്‍ഗ്രസ്സിനെ പരാജയപ്പെടുത്താന്‍ സംഘപരിവാറിന്റെയും-ബിജെപിയുടെയും പിന്തുണ ലഭിച്ചതുമൊകെ ഇടതുപക്ഷം വിജയിക്കാനുള്ള കാരണങ്ങളായി.”

”എന്നാല്‍ യു.ഡി.എഫിനും, കോണ്‍ഗ്രസ്സിനും സ്ഥാനാര്‍ത്ഥികളെ പ്രഖ്യാപിക്കാന്‍ സാധിച്ചത് തിരഞ്ഞെടുപ്പിന് മൂന്നാഴ്ച മുന്‍പ് മാത്രമാണ്. മറ്റുള്ളവര്‍ തിരെഞ്ഞെടുപ്പ് കമ്മിറ്റികള്‍ മാസങ്ങള്‍ക്കുമുന്‍പ് പ്രഖ്യാപിക്കുന്നിടത്താണ് സ്ഥാനാര്‍ത്ഥി പ്രഖ്യാപനത്തിനുശേഷം യു.ഡി.എഫ് സ്ഥാനാര്‍ത്ഥികള്‍ക്ക് തിരെഞ്ഞെടുപ്പ് കമ്മിറ്റി രൂപീകരണത്തിന് ഓടേണ്ടി വന്നത്. യു.ഡി.എഫ് നേതാക്കള്‍ തിരെഞ്ഞെടുപ്പ് വരാനിരിക്കുന്നുവെന്ന് തിരിച്ചറിഞ്ഞതും, തിരഞ്ഞെടുപ്പിന് ദിവസങ്ങള്‍ക്ക് മുന്‍പ് മാത്രമാണ്. കോണ്‍ഗ്രസ്സ് സംഘടനാ സംവിധാനം ദുര്‍ബലമായിരുന്നു കേരളത്തിലുടനീളം( ചില സ്ഥലങ്ങളില്‍ ഇതിന് അപവാദമുണ്ടാകാം). തിരഞ്ഞെടുപ്പ് സമയത്ത് മാത്രം തട്ടിക്കൂട്ടുന്ന ഒന്നായി ‘യു.ഡി.എഫ് സംവിധാനം’ പലയിടത്തും മാറിയിട്ടുമുണ്ട്. കോണ്‍ഗ്രസ് ആള്‍ക്കൂട്ടമായതും തിരഞ്ഞെടുപ്പ് പരാജയ കാരണങ്ങളില്‍ ഒന്നാണ് (പോഷക സംഘടനകളെ വേണ്ട രീതിയില്‍ സംഘടിപ്പിക്കപ്പെട്ടോ എന്നതും ചോദ്യമാണ് ഞാന്‍ ഉള്‍പ്പെടെ മറുപടി പറയാന്‍ ബാധ്യസ്ഥനുമാണ്). ഇനിയും ഒട്ടനവധി കാര്യങ്ങളുണ്ട്, പക്ഷേ ഇതെല്ലാമാണ് യു.ഡി.എഫ് പരാജയത്തിനു കാരണം എന്നിരിക്കെ ഏതെങ്കിലും ചില വ്യക്തികള്‍ക്കുമേല്‍ തിരെഞ്ഞെടുപ്പ് പരാജയം കെട്ടിവയ്ക്കുന്നത് ഉചിതമാണെന്ന് കരുതുന്നില്ല.”

”വിജയിച്ചിരിക്കുന്ന 21 കോണ്‍ഗ്രസ്സ് എം.എല്‍.എമാര്‍ പാര്‍ട്ടി പ്രവര്‍ത്തകരുടെയും,ജനങ്ങളുടെയും പ്രതീക്ഷയ്‌ക്കൊത്ത് നിയമസഭയ്ക്കകത്തെ കാര്യങ്ങളില്‍ തീരുമാനമെടുക്കുമെന്ന് പ്രതീക്ഷിക്കുന്നു. 21 നിയമസഭാംഗങ്ങളും കോണ്‍ഗ്രസ്സിന്റെ ശബ്ദമായി നിയമസഭയ്ക്കകത്തുണ്ടാകുമെന്നതു തന്നെയാണ് പ്രതിസന്ധിഘട്ടത്തിലെ പ്രതീക്ഷയും.
നിയമസഭയ്ക്ക് പുറത്ത് കേരളത്തിലുടനീളം കോണ്‍ഗ്രസ്സ് സംഘടനാ സംവിധാനം ചലിപ്പിക്കാന്‍ കഴിയേണ്ടതുണ്ട്. കോണ്‍ഗ്രസ്സിനെ സംഘടനാ സംവിധാനത്തിലൂടെ തിരികെ കൊണ്ടു വന്നേ മതിയാകൂ. എല്ലാ തലങ്ങളിലും മാറ്റമുണ്ടാകുമെന്ന പ്രതീക്ഷയില്‍ തന്നെയാണ്. ഏതെങ്കിലും വ്യക്തികളെ മാറ്റിയല്ല ഒന്നാകെയുള്ള മാറ്റം ജനങ്ങള്‍ ആഗ്രഹിക്കുന്നു.”

”കെ.എസ്.യു പു:നസംഘടന ഉള്‍പ്പെടെ കൃത്യം രണ്ടു കൊല്ലത്തിനുശേഷം അഖിലേന്ത്യ കമ്മിറ്റിയോട് ആവശ്യപ്പെട്ട സമയത്ത് പല സംസ്ഥാനങ്ങളിലും പു:നസംഘടന നടക്കുന്നതുകൊണ്ട് മൂന്നു വര്‍ഷമാണ് കാലാവധി അതുവരെ തുടരാനാണ് നേതൃത്വം പറഞ്ഞിരുന്നത്.
മൂന്നുവര്‍ഷത്തിനുശേഷം കഴിഞ്ഞ ഒരുവര്‍ഷക്കാലത്തിലേറെയായി രാജ്യമാകമാനം കോവിഡ് പ്രതിസന്ധിയാണ്, പു:നസംഘടന നടന്നിട്ടില്ല. ആ സമയത്താണ് ബ്ലോക്ക് കമ്മിറ്റികള്‍ക്ക് കീഴില്‍ പ്രാദേശിക കമ്മിറ്റികള്‍ രൂപീകരിക്കാനുള്ള തീരുമാനം കെ.എസ്.യു സംസ്ഥാന എക്‌സിക്യൂട്ടീവില്‍ കൈക്കൊണ്ടത്. പല സഹപ്രവര്‍ത്തകരും ആത്മാര്‍ത്ഥമായി ‘പ്രാദേശിക യൂണിറ്റ് രൂപീകരണമുള്‍പ്പെടെ’ നടപ്പിലാക്കിയപ്പോള്‍ ചിലര്‍ ഭാരവാഹിത്വത്തില്‍ ഇരുന്നിട്ടും ഇതൊന്നും അറിഞ്ഞതേ ഇല്ലായിരുന്നു. ഭാരവാഹിത്വത്തില്‍ ഇരുന്ന് സംഘടനയോട് നീതിപുലര്‍ത്താന്‍ സാധിക്കാത്ത ഇടങ്ങളില്‍ മാറ്റം അനിവാര്യമാണെന്ന പക്ഷക്കാരനാണ് ഞാനും.”

”കോണ്‍ഗ്രസ്സിന്റെ ‘വിശാലമായ ഉള്‍പ്പാര്‍ട്ടിജനാധിപത്യം’ കൊണ്ട് പലപ്പോഴും പോഷക സംഘടനകളും സമ്പന്നമാണ്. ‘അത്തരം വിശാലമായ ഉള്‍പ്പാര്‍ട്ടി ജനാധിപത്യത്താല്‍ പലരും പലയിടങ്ങളിലും സംരക്ഷിക്കപ്പെട്ടു പോകാറുണ്ട്, തീരുമാനം എടുക്കേണ്ടവര്‍ എന്ന് മറ്റുള്ളവര്‍ കരുതുന്നവര്‍ നിസ്സഹായരാകാറുണ്ട് ‘ മാറ്റം വരേണ്ടത് അവിടെ കൂടിയാണ്. മാറ്റം അനിവാര്യമാണ്.
പരാജയത്തിന്റെ ഉത്തരവാദികള്‍ ഒന്നോ, രണ്ടോ ആളുകള്‍ മാത്രമല്ല കൂട്ടുത്തരവാദിത്വമുണ്ട്. അതിന് പരിഹാരം എന്തെന്ന് തീരുമാനിക്കേണ്ടതും അവര്‍ തന്നെയാണ്. ഉചിതമായ സമയം ഇതു കൂടിയാണ്. പറയാനുള്ള അഭിപ്രായങ്ങള്‍ നേതൃത്വത്തോട് പറഞ്ഞിട്ടുണ്ട്. ഒരിക്കല്‍ പോലും ഈ പ്ലാറ്റ്‌ഫോമില്‍ ഇങ്ങനെയൊന്നും പറയണമെന്ന് കരുതിയതല്ല സോഷ്യല്‍ മീഡിയയില്‍ അതിരുകവിഞ്ഞുള്ള അഭിപ്രായങ്ങള്‍ പലരും പങ്കുവെക്കുന്നത് കൊണ്ടാണ് ഇത്ര മാത്രം ഇവിടെ കുറിച്ചത്.!”

Also Read: കെ.കെ.രാഗേഷ് മുഖ്യമന്ത്രിയുടെ പ്രൈവറ്റ് സെക്രട്ടറി