Top

‘നിയമസഭയില്‍ എന്തുചെയ്യാന്‍ പോകുന്നുവെന്ന് ഗവര്‍ണറെ മുന്‍കൂട്ടി അറിയിക്കേണ്ട കാര്യമില്ല’; ഗവര്‍ണര്‍ ഭരണഘടനാപരമായി പെരുമാറണമെന്ന് എ വിജയരാഘവന്‍

ര്‍ക്കാരിന്റെ നിയമനിര്‍മ്മാണ കാര്യങ്ങളും ജനകീയ വിഷയങ്ങളും ചര്‍ച്ച ചെയ്യുന്നതിനാണ് സഭ. ഇതൊന്നും ഗവര്‍ണറോട് മുന്‍കൂട്ടി വിശദീകരിക്കേണ്ട ആവശ്യമില്ല’. വിജയരാഘവന്‍ മാധ്യമങ്ങള്‍ക്കുമുന്നില്‍ പറഞ്ഞു.

22 Dec 2020 11:24 PM GMT

‘നിയമസഭയില്‍ എന്തുചെയ്യാന്‍ പോകുന്നുവെന്ന് ഗവര്‍ണറെ മുന്‍കൂട്ടി അറിയിക്കേണ്ട കാര്യമില്ല’; ഗവര്‍ണര്‍ ഭരണഘടനാപരമായി പെരുമാറണമെന്ന് എ വിജയരാഘവന്‍
X

കാര്‍ഷികനിയമങ്ങള്‍ക്കെതിരെ നിയമസഭ വിളിച്ചുചേര്‍ക്കാന്‍ അനുമതി നിഷേധിച്ചതിന് ഗവര്‍ണ്ണര്‍ക്കുനേരെ രൂക്ഷവിമര്‍ശനവുമായി സിപിഐഎം. ഗവര്‍ണ്ണര്‍ ഭരണഘടനാപരമായി പെരുമാറണമായിരുന്നുവെന്ന് സംസ്ഥാന ആക്ടിങ് സെക്രട്ടറി എ വിജയരാഘവന്‍ കുറ്റപ്പെടുത്തി. സര്‍ക്കാരാണ് നിയമസഭ ചേരാന്‍ തീരുമാനം എടുക്കേണ്ടത്. നിയസഭയില്‍ എന്തുചെയ്യണമെന്ന് സര്‍ക്കാര്‍ ഗവര്‍ണ്ണറെ മുന്‍കൂട്ടി അറിയിക്കേണ്ട കാര്യമില്ലെന്ന് വിജയരാഘവന്‍ കൂട്ടിച്ചേര്‍ത്തു.

‘നിയമസഭയുടെ കാര്യപരിപാടികള്‍ തീരുമാനിക്കാന്‍ പ്രത്യേക സമിതിയുണ്ട്. അതിനാല്‍ സഭയില്‍ എന്തുചെയ്യണമെന്ന കാര്യം അവര്‍ നോക്കിക്കോളും. സര്‍ക്കാരിന്റെ നിയമനിര്‍മ്മാണ കാര്യങ്ങളും ജനകീയ വിഷയങ്ങളും ചര്‍ച്ച ചെയ്യുന്നതിനാണ് സഭ. ഇതൊന്നും ഗവര്‍ണറോട് മുന്‍കൂട്ടി വിശദീകരിക്കേണ്ട ആവശ്യമില്ല’. വിജയരാഘവന്‍ മാധ്യമങ്ങള്‍ക്കുമുന്നില്‍ പറഞ്ഞു.

സഭവിളിക്കാന്‍ അനുമതി നിഷേധിച്ചതില്‍ എതിര്‍പ്പറിയിച്ച് ഗവര്‍ണര്‍ക്ക് മുഖ്യമന്ത്രി പിണറായി വിജയന്‍ കത്തയച്ചിരുന്നു. ഗവര്‍ണറുടെ നടപടി ഭരണഘടനാ വിരുദ്ധമാണെന്ന് മുഖ്യമന്ത്രി കത്തില്‍ വ്യക്തമാക്കി.

നിയമസഭ വിളിക്കുന്നിതില്‍ ഗവര്‍ണര്‍ക്ക് വിവേചനാധികാരമില്ല. സര്‍ക്കാരിന്റെ ശുപാര്‍ശ തള്ളാന്‍ ഗവര്‍ണര്‍ക്ക് അധികാരമില്ലെന്നും മുഖ്യമന്ത്രി വ്യക്തമാക്കി.

ഗവർണർക്ക് മുഖ്യമന്ത്രി നൽകിയ കത്തിൽ ഉന്നയിച്ച കാര്യങ്ങള്‍

1- അടിയന്തര സാഹചര്യം ഇല്ല എന്ന വാദം തെറ്റ്. രാജ്യത്തിന്റെ വിവിധ ഭാഗങ്ങളിൽ കർഷകർ നടത്തുന്ന പ്രക്ഷോഭം ഇന്നത്തെ നിലയിലേക്ക് വളർന്നത് അടുത്ത ദിവസങ്ങളിലാണ്. ഭക്ഷ്യസാധനങ്ങൾക്ക് മറ്റ് സംസ്ഥാനങ്ങളെ ആശ്രയിക്കുന്ന കേരളത്തിന് കർഷക സമൂഹവും കാർഷിക മേഖലയും നേരിടുന്ന പ്രശ്നങ്ങളിൽ വലിയ ഉത്കണ്ഠയുണ്ട്.

2- ഗവർണറുടെ നടപടി ഭരണഘടനയുടെ 174 (ഒന്ന് ) അനുഛേദത്തിന് വിരുദ്ധമാണ്. സഭ വിളിക്കുന്നതിനോ സഭാ സമ്മേളനം അവസാനിപ്പിക്കുന്നതിനോ ഗവർണർക്ക് വിവേചനാധികാരം ഇല്ല.

3 – രാഷ്ട്രപതിയും ഗവർണറും മന്ത്രിസഭയുടെ ഉപദേശപ്രകാരമാണ് പ്രവർത്തിക്കേണ്ടത്. പഞ്ചാബ് സംസ്ഥാനവും ഷംസീർ സിങും തമ്മിലുള്ള കേസിൽ ( 1975 ) സുപ്രീംകോടതി ഇക്കാര്യം വ്യക്തമാക്കിയിട്ടുണ്ട്.

4- നിയമസഭയിൽ ഭൂരിപക്ഷമുള്ള സർക്കാർ നിയമസഭ വിളിക്കാനോ പിരിയാനോ ശുപാർശ ചെയ്താൽ അത് അനുസരിക്കാൻ ഗവർണർ ബാധ്യസ്ഥനാണെന്ന് സർക്കാരിയ കമ്മീഷനും (കേന്ദ്ര-സംസ്ഥാന ബന്ധങ്ങളെ കുറിച്ച് ശുപാർശ സമർപ്പിച്ച കമ്മീഷൻ ) അടിവരയിട്ട് പറഞ്ഞിട്ടുണ്ട്. നിയമസഭ വിളിക്കുവാൻ മന്ത്രിസഭ ശുപാർശ ചെയ്താൽ അത് നിരസിക്കാൻ ഗവർണർക്ക് അധികാരമില്ല. കീഴ് വഴക്കങ്ങളും അതുതന്നെയാണ്.”

കൃഷിമന്ത്രി വിഎസ് സുനില്‍കുമാര്‍ ക്ലിഫ്ഹൗസിലെത്തി മുഖ്യമന്ത്രിയുമായി കൂടിക്കാഴ്ച നടത്തിയിരുന്നു.

പ്രത്യേക നിയമസഭാ സമ്മേളനം ചേരേണ്ട ആവശ്യമില്ലെന്ന് ചൂണ്ടിക്കാട്ടിയാണ് ഗവര്‍ണര്‍ അനുമതി നിഷേധിച്ചത്. സര്‍ക്കാരിന്റെ വിശദീകരണം തൃപ്തികരമല്ലെന്നും ഗവര്‍ണര്‍ അറിയിച്ചു. ഇതോടെ ബുധനാഴ്ച നടക്കാനിരുന്ന പ്രത്യേക നിയമസഭാ സമ്മേളനം നടക്കില്ലെന്ന് ഉറപ്പായി.

ബുധനാഴ്ച ഒരുമണിക്കൂര്‍ പ്രത്യേക നിയമസഭാ സമ്മേളനം ചേരാനുള്ള സര്‍ക്കാര്‍ ശുപാര്‍ശയില്‍ ഗവര്‍ണര്‍ വിശദീകരണം തേടിയിരുന്നു. മുഖ്യമന്ത്രിയുടെ ഓഫീസ് നല്‍കിയ വിശദീകരണമാണ് ഇപ്പോള്‍ തള്ളിയത്. ഇത് രണ്ടാം തവണയാണ് ഗവര്‍ണര്‍ അനുമതി നിഷേധിക്കുന്നത്. സംസ്ഥാന ചരിത്രത്തില്‍ ആദ്യമായിട്ടാണ് നിയമസഭാ സമ്മേളനം നടത്താനുള്ള സര്‍ക്കാര്‍ തീരുമാനത്തിന് ഗവര്‍ണര്‍ അനുമതി നിഷേധിക്കുന്നത്.

ജനുവരി എട്ടിന് ബജറ്റ് സമ്മേളനം തുടങ്ങാനിരിക്കെ എന്തിനാണ് അടിയന്തിരമായി സഭ ചേരുന്നത് എന്ന് വ്യക്തമാക്കണമെന്നാണ് ഗവര്‍ണര്‍ സര്‍ക്കാരിനോട് ആശ്യപ്പെട്ടത്. പ്രത്യേക നിയമസഭ ചേരേണ്ട സാഹചര്യമില്ലെന്നായിരുന്നു ഗവര്‍ണറുടെ നിലപാട്. കാര്‍ഷിക നിയമ ഭേദഗതി വോട്ടിനിട്ട് തള്ളാനായിരുന്നു സര്‍ക്കാര്‍ പ്രത്യേക സമ്മനം വിളിക്കുന്നതിന് ഗവര്‍ണറോട് ശുപാര്‍ശ തേടിയത്. ഇതില്‍ വിശദീകരണം തേടിയ ഗവര്‍ണര്‍ സര്‍ക്കാരിന്റെ വിശദീകരണം തള്ളുകയായിരുന്നു.

Popular Stories

    Next Story